میرپورخاص: میرپورخاص شہر میں پینے کے پانی کا بحران شدت اختیار کر گیا ۔ میرپورخاص شہر میں پینے کے پانی کا شدید بحران پیدا ہو گیا ہے شہر کے علاقوں آدم ٹاون، کھری کواٹر ، ٹورآباد، غریب آباد ، اقبال نگر ، سمیت دیگر علاقے گزشتہ کئی ماہ سے واٹر سپلائی کے پانی سے محروم ہیں، علاقہ مکین میٹھا پانی کی عدم دستیابی کے سبب بورنگ کا کھارا پانی پینے پر مجبور ہو گئے ہیں، آدم ٹاون،کھری کواٹر ،اقبال نگر کے رہائشیوں کا کہنا ہے کہ ہمارے علاقوں میں واٹر سپلائی کا پانی گزشتہ ایک ماہ سے نہیں آرہا جس کی وجہ سے ہم بازار سے مہنگے داموں منرل واٹر کا پانی خریدنے پر مجبور ہیں نہانے اور کپڑے وغیرہ دھونے کے لےے دور دراز علاقوں میں پانی کی تلاش میں دن رات سرگرداں رہتے ہیں، ان کا کہنا تھا کہ ٹی ایم اے کے افسران کو بھی اس سلسلے میں کئی بار آگاہ کیا جاچکا ہے مگرتاحال کو ئی اقدام نہیں اٹھا یا گیا ہے، شہر کی اکثر مساجد میں بھی نمازی زمین کے کڑوے پانی سے وضو کرنے پر مجبو ر ہیں، شہریوں کا کہنا ہے کہ جب کبھی پانی آ بھی جائے تو وہ انتہائی گندا بدبودار اور جاگ والا ہوتا ہے جس کے پینے سے بیماریا ں جنم لینے کا خدشہ ہوتا ہے، شہریوں نے میرپورخاص کی انتظامیہ سے مطالبہ کیا ہے کہ شہریوں کو واٹر سپلائی کی فراہمی کو یقینی بنایا جائے۔

میرپورخاص:  جمعیت علماءپاکستان کے صدر ڈاکٹر صاحبزادہ ابوالخیر محمد زبیر نے کہا ہے کہ چیئرمین نیب کی تقرری میں حکومت اور حزب اختلاف دونوں مخلص نہیں ۔ صاحبزادہ ابوالخیر محمد زبیر نے اپنے ایک بیان میں کہا کہ نیب کے چیئر مین کے تقرر میں حکومت اور اپوزیشن دونوں مخلص نظر نہیں آرہی ہیں بلکہ دونوں ملی بھگت سے اس معاملہ کو کئی مہینوں سے ملتوی کرتے آئے ہیں اور اب مزید اس کو التواءکا شکار کرنا چاہتے ہیں تاکہ ان دونوں کے کرپٹ عناصر کو تحفظ مل جائے ،انھوں نے کہا کہ ایسا محسوس ہوتا ہے کہ الیکشن میں کرپشن ختم کرنے اور کرپٹ عناصر کو پکڑنے کے مسلم لیگ ن کے تمام وعدے صرف انتخابی نعرہ تھا حقیقت میں مسلم لیگ ن سابقہ حکمرانوںکی طرح کرپٹ عناصر پر ہاتھ نہیں ڈالنا چاہتی بلکہ چیئرمین نیب کے مسلہ کو التواءمیں ڈال کر کرپٹ عناصر کو تحفظ فراہم کرنا چاہتی ہے ،انھوں نے کہا کہ افسوس تو اس بات پر ہے کہ سپریم کورٹ کے بار بار تنبیہ کے باوجود وہ چیئرمین نیب کی تقرری کرنے پر آمادہ نہیں، گویا کرپٹ عناصر کو تحفظ فراہم کرنے کے لئے سپریم کورٹ کی ہدایات تک کو پس پشت دالاجارہا ہے جس سے موجودہ حکمرانوں کی کرپٹ عناصر اور کرپشن میں ملوث سابق حکمرانوں سے خفیہ سازباز کی نشاندہی ہوتی ہے۔

میرپورخاص: تیز رفتار چنگ چی رکشہ اور ٹریکڑ ٹرالی میںتصادم سے دوخواتین جاں بحق اور تین افراد شدید زخمی ہو گئے ۔ تفصیلات کے مطابق میروا ہ روڈ سمن گوٹھ اسٹاپ کے قریب ایک تیز رفتار چنگ چی رکشہ اور ٹریکڑ ٹرالی کے درمیان تصادم کے نتیجے میں چنگ چی رکشہ میں سوار فرادمسمات سیتا ،مسمات سمتی دیوی،میرخان،امرسنگھ، اور رائے سنگھ شدید زخمی ہوگئے جنھیں فوری طور پر سول ہسپتال میرپورخاص منتقل کیا گیا جہاں زخموں کی تاب نہ لاتے ہوئے مسمات سیتا اور مسمات سمتی دیوی دم توڑ گئیں، شدید زخمی میرخان کو تشویش ناک حالت میں حیدر آباداسپتال منتقل کر دیا گیا، پولیس نے حادثے کا شکار ہونے والی ٹریکڑ ٹرالی اور چنگ چی رکشہ کو قانونی کاروائی کے لےے اپنی تحویل میں لے لیاجب کہ ٹریکڑ ڈرائیور موقع سے فرار ہونے میں کامیاب ہوگیا۔

بدین : بدین کے قریب گولاڑچی روڈ بجلی پر آگ لگنے کے باعث ایک گھر جل کر راکھ ہو گیا۔تفصیلات کے مطابق بدین کے قریب گولاڑچی روڈ پر بجلی کے شارٹ سرکٹ سے آگ لگنے کے باعث رجب علی خاص خیلی کے گھر میں بجلی کے شارٹ سرکٹ کی وجہ سے ٹیلی ویژ ن سے لگنے والی آگ بڑھک اٹھی اور پورے گھر کو لپیٹ میں لے لیا جس سے گھریلو مصنو عات کے علاوہ قیمتی اشیا جل کر خاکستر ہوگئیں۔غریب متاثرین نے میڈیا کو بتا یاکہ بے نظیر انکم سپورٹ پروگرام سے ملنے والی امداد سے گھر یلو مصنوعات اور دیگر قیمتی اشیا خریدی جو کہ جل کر خاکستر ہو گئی ۔

کراچی:  وفاقی جامعہ اردو شعبہ جغرافیہ کے تحت سیاحتی نمائش و سمینا ر کاانعقاد 26اور27ستمبر کو گا۔ وفاقی جامعہ اردو گلشن اقبال کیمپس میں شعبہ جغرافیہ کے زیر اہتمام سیاحتی نمائش اور سیمینا ر منعقد ہ ہو گا ،سیمینا رجمعرات اورجمعہ26اور27ستمبر کو صبح دس بجے ہو گا جس کے مہمان خصوصی جامعہ کے وائس چانسلر پروفیسر ڈاکٹر ظفر اقبال اور مہمان اعزازی ڈاکٹر ایس ایم معین قریشی ہو ں گے۔

کوٹ غلام محمد: کوٹ غلام محمد میں منشیات ،ہیروئن ،شراب اور جان لیوا گٹکے کی کھلے عام فروخت کے خلا ف عوام کی جانب سے احتجاج کیا گیا ۔ کوٹ غلام محمد میں جوئے کے اڈوں،منشیات ہیروئن، شراب ،چرس ،جان لیوا گٹکا اور دیگر منشیات کے کھلے عام فروخت کے خلاف علاقے کے عوام اور سماجی شخصیا ت نے احتجاج کیا، عوام کا کہنا ہے کہ منشیات کی کھلے عام فروخت بھاری بھتے کے عوض کی ہورہی ہے جس سے معصوم طلبا ءاور نوجوانون کی بڑی تعداد منشیات کا شکار ہو رہی ہے ، علاقے کے سماجی حلقوں کی جانب سے آئی جی سندھ ،ڈی آئی میر پور خاص اور ایس ایس پی میر پور خاص سے مطالبہ کیا گیا ہے کہ منشیات اور جوئے کے اڈوں کے خلاف کارروائی کر کے علاقے کو ان سے وا گزار کر ایاجائے۔