سری نگر/مقبوضہ جموں و کشمیر +مظفر آباد/آزاد کشمیر(پی پی آئی)مقبوضہ کشمیر میں بھی یوم آزادی پاکستان کے موقع پر مختلف تقریبات کا اہتمام کیا گیا، کشمیریوں نے گھروں کی چھتوں پر سبز ہلالی پرچم لہرا کر جذبات کی عکاسی کی۔ کشمیر میڈیا سروس کے مطابق قابض بھارتی فوج کی کڑی نگرانی کے باوجود وادی میں پاکستانی پرچم لہرائے گئے،کشمیر کے کپواڑہ، سری نگر، بارہ مولا، راجوڑی، کلگام اور  پلوامہ سیکٹرز سمیت کئی علاقوں میں جشن آزادی کے موقع کی مناسبت سے تقریبات کا انعقاد کیا گیا۔  پی پی آئی کے مطابق 14 اگست کا آغاز ہوتے ہی کشمیریوں نے پاکستان کے حق میں جبکہ بھارت کیخلاف نعرے لگائے، آزاد کشمیر میں بھی مقبوضہ کشمیر کے مسلمانوں کے ساتھ اظہار یکجہتی کی تقریبات اور ریلیاں نکالی گئی، کشمیری عوام نے پاکستان کیاستحکام کیلئے دعائیں بھی مانگیں۔ کشمیری  قابض بھارت کا یوم آزادی ہر سال کی طرح یوم سیاہ کیطور پرمنائیں گے۔

 اسلام آباد (پی پی آئی) ملک بھر میں پیر کوجشن آزادی ملی جوش وجذبے کے ساتھ منایا گیا۔جشن آزادی کے موقع پر متوالوں نے رنگ برنگی لائٹس، ہری بھری جھنڈیاں،جھنڈے لگاکر پورا دیس سجا دیا۔ بچے، نوجوان، خواتین سمیت سب ہی تیاریوں میں مگن رہے،پی پی آئی کے مطابق ہر طرف سبز ہلالی پرچموں کی بہار دیکھنے میں آئی۔، بڑی شاہراہوں کے اردگرد قائم عمارتوں کی سجاوٹ نے شہر کے رنگ ڈھنگ ہی بدل دیے۔ملک کے مختلف شہروں میں آتشبازی کا شاندار مظاہرہ کیا گیا۔ پاکستان کے   یوم آزادی کا آغازتوپوں کی سلامی سے ہوا۔ پاک فوج اورنیوی کے چاق وچوبند دستوں کی جانب سے توپوں کی سلامی دی گئی۔وفاقی دارالحکومت میں 31 جبکہ صوبائی دارالحکومتوں میں 21،21 توپوں کی سلامی دی گئی۔ اس موقع پرپاک فوج اور نیوی کے دستے کی جانب سے نعرہ تکبیر، اللہ اکبر کے فلک شگاف نعرے بھی بلند کئے گئے۔دوسری جانب پاکستان کے 76 ویں یوم آزادی کے موقع پر کراچی میں مزار قائد پر بھی گارڈز کی تبدیلی کی پروقار تقریب منعقد ہ ہوئی۔ تقریب کے مہمان خصوصی کمانڈنٹ پاکستان نیول اکیڈمی کموڈور محمد خالد تھے، انہوں نے مزار قائد پر پھولوں کی چادر رکھی اور فاتحہ خوانی کی۔لاہورمیں علامہ اقبال کے مزار پر گارڈز کی تبدیلی کی پروقارتقریب منعقد ہوئی جس میں پاک فوج کے چاق و چوبند دستے نے شاعر مشرق کو سلامی پیش کی۔مزار علامہ اقبال پر پاک فوج کے دستے نے رینجرز کی جگہ گارڈز کے اعزازی فرائض سنبھال لیے ہیں۔ میجرجنرل قیصرسلیمان،گیریژن کمانڈر لاہور نے مزاراقبال پر فاتحہ خوانی کی۔

اسکردو(پی پی آئی)قومی ایئر لائن(پی آئی اے) کی پہلی انٹرنیشنل پرواز پی کے 234دبئی سے ا سکردو لینڈ کر گئی، پرواز اترنے کے بعد اسکردو کو انٹرنیشنل ایئرپورٹ کا درجہ مل گیا۔پی پی آئی کے مطابق پی آئی کی دبئی سے ا سکردو کی ہفتہ وار پروازیں شروع کی جائینگی،پرواز پاکستان کے شمالی علاقہ جات کی سیاحت کے فروغ میں اہم کردار ادا کریں گی،سیاح دبئی سے براہ راست ساڑھے 3گھنٹے کی پرواز سے سکردو پہنچ سکیں گے۔اس حوالے سے سکردو ایئرپورٹ پر پروقار تقریب کا اہتمام کیا گیا،پی پی آئی کے مطابق سی ای او پی آئی اے ایئروائس مارشل عامر حیات نے مسافروں کا استقبال کیا،سول ایوی ایشن حکام اور دیگر سیاسی و سماجی شخصیات بھی موجود تھیں،جہاز کے کپتان نے کاک پٹ کا شیشہ کھول کر پاکستان کا جھنڈا لہرایا۔پرواز اتار کر پی آئی اے نے  اسکردو کو پوری دنیا میں متعارف کروا دیا،سیاح جنت نظیر گلگت بلتستان کے دلکش نظاروں سے لطف اندوز ہو سکیں گے،دوران پرواز سیاحوں کو برف پوش پہاڑوں کے خوبصورت نظارے بھی دیکھنے کو ملیں گے،سیاح کے ٹو اور نانگا پربت کے خوبصورت اور یادگار مناظر سے لطف اندوز ہو سکیں گے۔