کیپ ٹاون: جنوبی افریقہ ٹیسٹ ٹیم کے کپتان گریم اسمتھ نے بین الاقوامی کرکٹ سے ریٹائرمنٹ کا اعلان کر دیا۔ذرائع کے مطابق گریم اسمتھ نے اپنے ساتھی کھلاڑیوں کو بتایا کہ وہ آسٹریلیا کے خلاف جاری ٹیسٹ سیریز کے اختتام پر انٹرنیشنل کرکٹ کو خیر باد کہہ دیں گے۔ ان کا کہنا تھا کہ ریٹائرمنٹ لینا ان کی زندگی کا سب سے مشکل فیصلہ تھا۔ وہ گزشتہ سال اپریل میں ٹخنے کی انجری کے بعد ریٹائرمنٹ پر غور کر رہے تھے۔ گریم اسمتھ نے کہا کہ ملک اور کرکٹ ٹیم کیلئے بہت کچھ چھوڑ کر جا رہے ہیں۔ انہیں انتہائی قابل تعریف کھلاڑیوں کی قیادت کا شرف حاصل ہوا جس پر فخر ہے۔

ڈھاکا: ایشیا کپ کے اہم میچ میں قومی ٹیم کے کپتان مصباح الحق کو اسپنر عبدالرحمان کو ٹیم میں شامل کرنا مہنگا پڑ گیا۔ایشیا کپ میں اپنے پہلے میچ میں شرکت کرنیوالے قومی ا سپنر عبدالرحمان اپنی لائن لینتھ بھول گئے۔عبدالرحمان کی عجیب و غریب بولنگ نے فیلڈ امپائرز کو بھی حیران کر دیا۔امپائرز نے عبدالرحمان کی پہلی نو بال پر تنبیہ کی ، دوسری گیند کے بعد جب عبدالرحمان نے تیسری گیند بھی فل ٹاس کروائی تو بنگلا دیش کے اوپنرز کے لیے کھیلنا مشکل ہو گیا جس کا اثر لیتے گراونڈ میں موجود امپائرز نے انہیں بولنگ کرنے سے روک دیا تاہم اوور کی باقی گیندیں قومی باﺅلر رحمان کی جگہ فواد عالم نے کروائیں۔عبدالرحمان نے میچ میں منفرد ریکارڈ بھی بنا لیا۔ ان کی کسی گیند کو بیٹسمین نے ہاتھ نہیں لگایا لیکن حریف ٹیم کو پھر بھی 8 رنز مل گئے۔

جمرود: جمرود میں نیٹو کنٹینرز پر مسلح افراد کی فائرنگ کے نتیجے میں ڈرائیور سمیت 2 افراد جاں بحق جبکہ ایک زخمی ہوگیا جبکہ حملہ آور فرار ہونے میں کامیاب ہوگیا۔ منگل کے روز خیبر ایجنسی کی تحصیل جمرود کے نواحی علاقے سوکمر میں مسلح افراد نے نیٹو کنٹینر پر اندھا دھند فائرنگ کر دی جس کے نتیجے میں ڈرائیور سمیت دو افراد جاں بحق ہوگئے جبکہ ایک زخمی ہوگیا جسے طبی امداد کے لئے ہسپتال پہنچا دیا گیا۔ بعد ازاں ایف سی کی بھاری نفری موقع واردات پر پہنچ کر کنٹینر کو قبضے میں لے لیا۔

لاہور: پنجاب اوپن ٹینس چیمپئن شپ رشید ملک نے منیر عاشق کو ہرا کر جیت لی۔رشید ملک کہتے ہیں کہ حکومت کی سرپرستی کی صورت میں ہی بہترین ٹینس پلیئرز سامنے لائے جاسکتے ہیں۔ باغ جناح لاہور کے ٹینس کورٹ میں ہونیوالی چھ روزہ چیمپئن شپ میں مختلف ایج گروپ کے مقابلے ہوئے۔مینز سنگل میں رشید ملک نے منیر عاشق کو چھ ایک چھ ایک لیڈیز سنگل میں اوشنا سہیل نے ردا خالد کو شکست دیکر ٹائٹل اپنے نام کئے۔انڈر 18میں میاں بلال،انڈر فورٹین میں حمبل،انڈر ٹوائیلو میں نالعین عباس،انڈر ٹین میں عبداللہ عدنان فاتح رہے۔رشید ملک کا کہنا تھا کہ حکومتی سرپرستی ملنے کی صورت میں ہی ٹینس میں نیا ٹیلنٹ اور چیمپیئن سامنے آئیں گے۔ آخر میں سپانسر ادارے کے حکام نے چیمپئن شپ کے فاتح کھلاڑیوں میں انعامات تقسیم کئے۔