اسلام آباد: مشرف کا غدا ری کیس لڑنے والے تین وکلا نے دعویٰ کیا ہے کہ انھیں طالبان کی جانب سے دھمکی آمیز خط موصول ہوا ہے جبکہ کیس کی سماعت جمعے تک ملتوی کردی گئی۔ جسٹس فیصل عرب کی سربراہی میں خصوصی عدالت کے تین رکنی بینچ نے پرویزمشرف کے خلاف سنگین غداری کیس کی سماعت کی۔ سماعت کے آغازپرسابق صدر کے وکیل احمد رضا قصوری نے کالعدم تحریک طالبان کی جانب دھمکی آمیز خط عدالت میں پیش کیا۔ احمد رضا قصوری نے عدالت کوبتایا کہ کالعدم تحریک طالبان نے مجھے، انور منصور ایڈووکیٹ اورشریف الدین پیرزادہ کو پرویز مشرف کیس سے علیحدہ ہونے کیلئے دھمکیاں دی ہیں، ان حالات میں کیس کی پیروی نہیں کرسکتے۔ پراسیکوٹراکرم شیخ نے کہا کہ عدالتیں جنگی حالات میں بھی کام کرتی ہیں، ہمیں دہشتگردی کے سامنے جھکنا نہیں چاہئے۔ جسٹس فیصل عرب نے ریمارکس دیے کہ جان کے خطرے کے باعث اپنا کام نہیں چھوڑسکتے، جتنی زندگی اللہ نے دی ہے،وہ ملے گی۔ جسٹس فیصل عرب نے قرار دیا کہ ججزکے تعصب اورعدالت کے دائرہ اختیار سے متعلق درخواستوں پر فیصلہ آئندہ سماعت پرسنایا جائے گا۔ عدالت کے باہر میڈیا سے بات چیت میں احمد رضا قصوری نے کہا کہ انہیں کیس سے الگ ہونے کیلئے دھمکیاں دی جا رہی ہیں۔ عدالت نے قرار دیا ہے کہ مشرف کے وکلا کو دھمکی آمیز خط کا معاملہ گیارہ مارچ کو پرویزمشرف کی پیشی کے موقع پردیکھا جائے گا۔

ملتان: ملتان میں سوائن فلوسے مزید ایک شخص جاں بحق ہو گیاجبکہ مجمو عی تعداد تین ہوگئی۔ملتان میں ناقص سہولیات کی وجہ سے نرسوں نے کام نہ کر نے کی دھمکی دے دی ہے ۔ملتان سمیت جنوبی پنجاب بھر سے سوائن فلو میں مبتلا چودہ مریضوں کو نشتراسپتال میں داخل کیا جاچکا ہے۔جاں بحق ہو نے والے شخص محمودالحسن گذ شتہ کچھ دنوںسے اسپتال میں زیر علاج تھے جبکہ جاں بحق ہو نے والوں کی مجموعی تعداد تین ہوگئی ہے۔ ذرائع کے مطابق نشتراسپتال کے سوائن فلو وارڈ میں ناقص انتظامات کی وجہ سے ایک نرس اور ڈاکٹر بھی اس مرض میں مبتلا ہوچکے ہیں جس پر پیرا میڈیکل سٹاف نے احتجاجاً کام نہ کرنے کی دھمکی دیتے ہوئے کہا ہے کہ سٹاف کو وبائی مرض سے محفوظ رکھنے کے لیے سخت حفاظتی انتظامات کا بندوبست کیا جائے۔ دوسری جانب محکمہ صحت نے اینٹی وائرل اور ٹیمی فلو ادویات اسپتالوں کو فراہم کردی ہیں۔

لاہور: قومی کرکٹر عمر اکمل کے اہل خانہ نے ٹریفک وارڈن ذیشان سے صلح کے لیے رابطہ کرلیا ہے۔ کرکٹر عمر اکمل کا چند روز قبل گلبرگ کے علاقے میں ڈیوٹی پر موجود ٹریفک وارڈن ذیشان سے جھگڑا ہواتھا جس پر اس کے خلاف باقاعدہ مقدمہ درج کرکے گرفتار کیا گیا۔سی ٹی او لاہور سہیل احمد چودھری کا کہناتھا کہ اگر ٹریفک وارڈن کرکٹر عمر اکمل سے صلح کرنا چاہتا ہے تو انہیں اس پر کوئی اعتراض نہیں ہے۔ ان کا کہناتھا کہ عمر اکمل کے ڈرائیونگ لائسنس کو منسوخ کرنے کے لیے جو نوٹس بھجوائے گئے تھے اس کا جواب موصول ہوچکاہے۔

اسلام آباد: جمشید دستی کے الزامات کی تحقیقات کے لیے قومی اسمبلی کی7رکنی کمیٹی قائم کر دی گئی ، کمیٹی15 روز میں رپورٹ دے گی۔قومی اسمبلی اجلاس کے دوران زاہد حامد نے جمشید دستی کے الزامات کی تحقیقات کے لیے7 رکنی کمیٹی کے ناموں پر مشتمل تحریک پیش کی جسے ایوان نے متفقہ طور پر منظور کر لیا۔کمیٹی میں عمران ظفر لغاری، عارف علوی، روحیل اصغر، میاں منان ، شاہدہ اختر علی، سہیل منصور اور کاظم علی شاہ شامل ہیں۔کمیٹی15 روز میں رپورٹ پیش کرے گی۔