کراچی(پی پی آئی)سندھ میں ایک جانب ڈینگی نے سر اٹھانا شروع کر دیا ہے تودوسری جانب ملیریا کے پھیلاو میں بھی اضافہ دیکھا گیا ہے۔پی پی آئی کے مطابق ذرائع نے بتایا کہ کراچی کے ایک بڑے سرکاری ہسپتال میں ایک دن میں ملیریا کے 100 سے زائد کیسز رپورٹ کیے گئے ہیں۔لیکن سرکاری اعداد و شمار حقیقت کی عکاسی نہیں کررہے۔ کراچی میں گزشتہ چند ماہ کے دوران ملیریا کے چند سو کیسز رپورٹ ہوئے ہیں، اندرون سندھ صورتحال اس کے برعکس ہے جہاں ہزاروں افراد ملیریا سے متاثر ہو رہے ہیں۔سرکاری اعداد و شمار کے مطابق اگست میں صرف حیدرآباد ڈویژن میں 31 ہزار سے زائد کیسز رپورٹ ہوئے، کراچی میں کسی ہلاکت کی اطلاع موصول نہیں ہوئی۔اعداد و شمار سے یہ بھی پتا چلتا ہے کہ کراچی میں رواں برس اب تک ڈینگی کے کْل 828 کیسز رپورٹ ہوچکے ہیں جن میں سے کسی بھی متاثرہ شخص کی موت واقع نہیں ہوئی۔تاہم سندھ کے متعدی امراض کے ہسپتال اور ریسرچ سینٹر سے جمع کیے گئے اعداد و شمار سے پتا چلتا ہے کہ رواں سال مئی میں ملیریا سے 2 اور جون میں ڈینگی سے ایک مریض جان سے ہاتھ دھو بیٹھا۔

 طورخم  (پی پی آئی)افغان سرحد پر سیکیورٹی چیک پوسٹ کے معاملے پر افغانستان اور پاکستان کے درمیان مذاکرات میں کوئی پیش رفت نہ ہونے کے باعث طورخم بارڈر کراسنگ تجارتی سرگرمیوں اور پیدل آمد و رفت کے لیے بند رہا۔ کابل میں افغان طالبان کی حکومت کے ’سخت مؤقف‘ کی وجہ سے سرحد کو دوبارہ کھولنے کے حوالے سے کوئی سمجھوتہ نہیں ہو سکا۔ان کا کہنا تھا کہ افغان سیکیورٹی حکام سمجھوتا نہیں کر رہے، انہوں نے سرحد کی اپنی جانب چیک پوسٹ کے قیام پر اصرار کرتے ہوئے جاری مذاکرات کے دوران کوئی لچک نہیں دکھائی۔پی پی آئی کے مطابق  لنڈی کوتل میں خواتین اور بچوں کے ہمراہ پھنسے ہوئے افغان شہری سرحد دوبارہ کھلنے کے شدت سے منتظر رہے۔زیادہ تر پھنسے ہوئے مردوں نے لنڈی کوتل بازار کی مرکزی مسجد میں عارضی پناہ لی جہاں مقامی تاجروں اور دکانداروں نے ان کے لیے کھانے پینے کا بندوبست کیا۔

ریاض/دبئی/  اسلام آباد (پی پی آئی) عالمی منڈی میں ایک ہفتے کے دوران خام تیل کی قیمتوں میں اضافہ  دیکھنے میں آیا ہے جس کے بعد 16ستمبر سے  پاکستان میں بھی پیٹرولیم مصنوعات کی قیمتیں مزید بڑھ سکتی ہیں۔ 16ستمبر سے پیٹرولیم مصنوعات کی قیمتوں میں پندرہ روپے فی لیٹر اضافہ ہوسکتا ہے۔،گلف مارکیٹ میں خام تیل کی قمیت 88ڈالر بیرل سے بڑھ کر 93ڈالر فی بیرل تک پہنچ گئی ہے۔پی پی آئی کے مطابق خام تیل کی قیمت میں 5 ڈالر  فی بیرل  اضافہ ہوگیا ہے،پاکستانی کرنسی کے مطابق یکم ستمبر کو خام تیل کی قمیت 25ہزار 344روپے فی بیرل بنتی تھی،قیمتیں بڑھنے کے بعد پاکستان کرنسی میں خام تیل کی قمیت 28ہزار86روپے بنتی ہے۔  پاکستانی کرنسی میں خام تیل کی قمیت میں 2742روپے فی بیرل اضافہ  ہوا، پاکستان میں ڈالر کی قیمت میں کمی کے باوجود اب بھی یکم ستمبر سے 15روپے اضافہ ہوا ہے،ڈالر کی قیمت میں مزید کمی نہ ہوئی تو 16ستمبر سے پیٹرولیم مصنوعات کی قیمتیں بڑھ سکتی ہیں۔ 16ستمبر سے پیٹرولیم مصنوعات کی قیمتوں میں پندرہ روپے فی لیٹر اضافہ ہوسکتا ہے۔

 اسلام آباد (پی پی آئی)عدالتی حکم کے باوجود پی ٹی آئی کی سابق رہنما شیریں مزاری کی گرفتاری پر آئی جی اسلام آباد کے خلاف توہین عدالت کیس سماعت کے لیے مقرر کردیا گیا۔پی پی آئی کے مطابق  اسلام آباد ہائیکورٹ نے عدالتی حکم کے باوجود شیریں مزاری کی گرفتاری پر آئی جی اسلام آباد ناصر خان کے خلاف توہین عدالت کیس 28 ستمبر کو سماعت کیلئے مقرر کیا ہے،اس کیس میں آئی جی اسلام غیرمشروط معافی نامہ جمع کراچکے ہیں، آئی جی کی معافی منظور ہوگی یا کارروائی آگے بڑھے گی؟ اس کا فیصلہ آئندہ سماعت پر ہوگا۔ خیال رہے کہ عدالت نے شیریں مزاری کو گرفتار کرنے پر  آئی جی اسلام آباد پر 25 ہزار روپے جرمانہ بھی عائد کیا تھا اور جرمانے کی رقم شیریں مزاری کو دینے کا کہا تھا جس پر  آئی جی اسلام آباد نے شیریں مزاری کو جرمانہ ادا کردیا۔