میرپورخاص: ممبر سندھ اسمبلی خیرالنساءمُغل نے سرجن سول اسپتا ل ڈاکٹر غلام حسین انڑکت سول اسپتا ل میر پور خاص کے انتظامی اموربہتر طور چلانے کی ہدایت کی۔ رکن سندھ اسمبلی خیرالنسامُغل نے سخت برہمی کا اظہار کرتے ہوئے سول سرجن ڈاکٹر غلام حسین اُنڑ کو ہدایت کی ہے کہ وہ ہسپتال کے انتظامی امور کو بہتر طور پر چلائیں ۔رکن اسمبلی نے سول ہسپتال میرپورخاص میں ہسپتال کے مسائل کے متعلق منعقدہ اجلاس کی صدارت کرتے ہوئے سول سرجن کو ہدایت کی کہ گھوسٹ ڈاکٹروں اور اسٹاف کی رپورٹ دی جائے تا کہ ان کے خلاف قانونی کارروائی کی جاسکے۔ایم پی اے نے ہدایت کی کہ ہسپتال میں علاج و معالج اور صحت و صفائی کی بگڑتی ہوئی صورتحال کو درست کیا جائے بصورت دیگر کوتاہی کے مرتکب افسران ،ڈاکٹروں اور اسٹاف کے خلاف سخت قانونی کارروائی کی جائے گی۔انھوں نے ہسپتال کے انتظامی امور بہتر طور پر نہ چلانے پر سول سرجن پر برہمی کا اظہار کرتے ہوئے سخت ہدایت کی کہ و ہ اپنی کارکردگی بہتر کریں۔اس موقع پر سول سرجن ،ڈائریکٹر ایڈمنسٹریشن ہیلتھ سندھ حیدرآباد ڈاکٹر رفیق کھوکھر اور ڈاکٹر اشتیاق نے ہسپتال میں ڈاکٹروں کی کمی ،فنڈز کی کمی اور دیگر مسائل کی نشاندہی کی جس پر ایم پی اے نے یقین دلایا کہ ہسپتال کے جائز مسائل حل کرانے کیلئے اعلیٰ حکام سے بات چیت کی جائے گی۔بعدازاں ایم پی اے نے صحافیوں سے گفتگو کرتے ہوئے کہا کہ پیپلز پارٹی جب بھی اقتدار میں آئی ہے تعلیم، صحت اور روزگارکی فراہمی کو ترجیح دی ہے ۔ایک سوال کے جواب میںانھوںنے کہا کہ گائنی وارڈ میں آپریشن نہ ہونا ،مردہ خانہ میں لاوارث ظاہر کرکے لاش کو جلد فارغ کرنا ،جنریٹر نہ چلانا انسانیت کی تذلیل ہے جس پر انھوں نے سول سرجن کو ہدایت کی کہ آئندہ اس قسم کی کوتاہی ہر گز برداشت نہیں کی جائے گی۔ایک اور سوال کے جواب میں انھوںنے کہا کہ سول ہسپتال کی بگڑتی ہوئی صورت حال کو کافی حد تک سدھارا جارہا ہے اور کہا کہ انتظامیہ کی نااہلی کی وجہ سے مسائل پیداہورہے ہیں۔

لاہور: پاکستان اولمپک ایسوسی ایشن کے صدر ریٹائر جنرل عارف حسن کا کہنا ہے کہ ایشین گیمز میں پاکستان کا 218 رکنی دستہ شرکت کرے گا۔لاہور میں پریس کانفرنس کرتے ہوئے پی او اے کے صدر عارف حسن نے کہا کہ پاکستان ایشین گیمز میںفٹ بال، ٹینس، کبڈی، اتھلیٹکس سمیت بائیس مختلف کھیلوں میںحصہ لے گا، انھوں نے کہا کہ پاکستان ہاکی فیڈریشن نے ایشین گیمز کے لئے ابھی تک رابطہ نہیں کیا۔ عارف حسن نے کہا کہ کامن ویلتھ گیمز میں پاکستان کا 53 رکنی دستہ شرکت کرے گا، انھوں نے کہا کہ اگر قومی کھیل ہاکی ٹیم کو ایشین گیمز میں نہ بھیجا گیا تو ملک کا نقصان اور بدنامی ہوگی۔

حیدر آباد: حیدرآباد میں منگنی کی تقریب میں ہوائی فائرنگ سے نوجوان لڑکی جاں بحق ہوگئی۔لطیف آباد یونٹ نمبر8کی خواجہ کالونی میں منگنی کی رسم کے دوران دولہاعابد قریشی کے بھائی نے زبردست ہوائی فائرنگ کی جس کے نتیجے میں پریٹ آباد سے آئی ہو ئی دلہن کی کزن 16سالہ فریال بنتِ غوث محمد قریشی سر میں گولی لگنے سے جاں بحق ہو گئی ،پولیس نے دولہا کے والد نورو قریشی کو حراست میں لے لیا ہے جبکہ فائرنگ کرنے والا نوجوان مفرور ہو گئے،پولیس نے مقتولہ کے والد کی فریا د پر ایف آئی آر درج کرلی ہے تاہم ملزمان کو دیکھنے کے باوجود گرفتار نہ کرنے پر مقتولہ کے ورثاءنے حیدرآباد پریس کلب اور ایس پی آفس کے سامنے لاش کے ہمراہ احتجاجی مظاہرہ کیا اور کئی گھنٹے تک دھرنا دیا بعد ازاں پولیس کی یقین دہانی پردھرنا ختم کردیا گیا۔

حیدرآباد: حیدر ا ٓباد میں رشتے کے تنازعے پر نامعلوم افراد کی فائرنگ سے ایک شخص جا ں بحق ہوگیا جبکہ پولیس کی کارروائی میں مختلف واقعات میں مطلوب دو ملزمان کو گرفتار کرلیا۔ قاسم آباد کے علاقہ گلستان سجاد مدینہ کالونی میں رشتہ کے تنازعہ پربنگل بلیدی کو قتل کیا گیا۔ سیلاب متاثرہ آباد خاندان میں ایک رشتہ پر تنازعہ تھا جس پر نامعلوم افراد نے فائرنگ کرکے بنگل بلیدی ولد کرم خان بلیدی کو ہلاک کردیا اور فرار ہو گئے ۔حیدرآباد میں پولیس نے کارروائی کرکے قاسم آباد میں دی سٹی اسکول کے عقب سے کار لفٹر نظیر جمالی کو حسین آباد تھانہ کی حدود سے چھینی گئی کار نمبرAFH-458برآمد کرلی ہے جبکہ ٹنڈو جام اور ٹنڈو قیصر لنک روڈ سے رحمن بخش کھوسو کو گرفتار کرکے 1400کلو گرام افیون برآمد کی اور ہوسٹری موڑ سے آرو ماچھی کو گرفتار کرکے اس سے11لیٹر شراب برآمد کرلی ہے۔

حیدرآباد: جمعیت علماءپاکستان کے صدر ڈاکٹر صاحبزادہ ابوالخیر محمد زبیرنے کہاہے کہ موجودہ حکمراں قوت ارادی و قوت فیصلہ سے محروم ہیں جس کے باعث ملک کے حالات دن بدن بد سے بدتر ہوتے جارہے ہیں اور ملک کی باگ ڈور حکمرانوں کے ہاتھ سے نکلتی ہوئی نظر آرہی ہے۔ جمعیت علماءپاکستان کے صدر ڈاکٹر صاحبزادہ ابوالخیر محمد زبیرنے کہا کہ کہ حکومت طالبان کا معاملہ ہویا حامد میر پر قاتلانہ حملے کا سنگین مسلہ ہو کبھی سیاسی قیادت ،میڈیا اور قانون نافذ کرنے والے اداروں کو ایک صفحے پر نہیں لاسکی، حامد میر کے سانحہ پر وزیر اطلاعات میڈیا کے حق میں بیان دے رہے تھے جبکہ وزیرداخلہ اس کے خلاف بیان دے رہے تھے ،وزیر اعظم حامد میر کی عیادت کر کے جیو سے ہمدردی کا اظہار کررہے تھے دوسری جانب وزیر دفاع جیوکو ملک دشمن قرار دے کر پیمرا سے ان کے خلاف کارروائی کے لیے نوٹس بھجوارہے تھے ،حکمرانوں کی اس منافقانہ پالیسی نے ملک کو ایک سخت ترین بحران سے دوچار کردیا ہے اور 1999ءجیسی صورت حال دوبارہ پیدا کردی ہے،انھوں نے کہا کہ اب بھی وقت ہے کہ حکمراں ہوش کے ناخن لیں اور تمام اہم معاملات میں فوج کو اعتماد میں لے کر بالخصوص حامد میر کے سانحہ کے سلسلے میں میڈیا اور عسکری اداروں کے درمیان جو تلخیاں پیدا ہوگئی ہیں اس کو فوری ختم کرنے کی کوشش کریں اس تنازعہ سے پوری دنیا میںملک کا وقار خاک میں مل رہا ہے جس کا حکمرانوں کو کوئی احساس نہیں ہے ۔