لاہور: ہاکی ورلڈ کپ 2014کے اختتام پر ویٹرنز ورلڈ کپ میں پاکستان کے سابق اولمپئینزحصہ لیں گے۔31مئی 2014 سے ہالینڈ میںہاکی ورلڈ کپ کا آغاز ہوگا۔ ورلڈ کپ کی تاریخ میں پہلی بار قومی ہاکی ٹیم حصہ نہیں لے سکے گی۔میگا ایونٹ کے اختتام پر ویٹرنز ورلڈ کپ کھیلا جائے گا جس میں پاکستان کے چالیس سال سے پچاس سال کی عمر کے سابق اولمپئنز اور انٹرنیشنل کھلاڑی ان ایکشن ہوں گے۔سابق اولمپیئنز اور دیگر کھلاڑیوں نے لاہور میں تیاریاں شروع کردی ہیں۔ سابق اولمپئنز کا کہناہے کہ وہ کیمپ میں اپنی فٹنس میں بہتری لائیں گے اور ویٹرنز ورلڈ کپ میں شاندار کھیل پیش کرکے قوم کو مایوس نہیں کریں گے۔ کیمپ میںعمر رسیدہ کھلاڑی ہفتے میں تین روز ٹریننگ کریں گے اور اس کے بعد فٹنس ثابت کرنے میں کامیاب ہونے والے کھلاڑیوں پر مشتمل اسکواڈ تشکیل دیا جائے گا۔

ٹیکساس: امریکن موٹو جی پی کے دوسرے روز اسپین اور اٹلی کے رائیڈرزسر فہرست رہے۔امریکاکی ریاست ٹیکساس میں ہونے والی موٹوجی پی پریکٹس سیشن کے دوسرے روز رائیڈرز نے اپنے فن کا زبردست مظاہرہ کیا۔عالمی چیمپئن ا سپنش رائیڈر مارک مارکیز مقررہ فاصلہ 2 منٹ 4 اعشاریہ سات سیکنڈ میں طے کر کے تیز ترین رائیڈر قرار پائے۔اٹلی کے آندرے ڈویسو دوسرے نمبر پر رہے ،اسپن کے ہی ڈینی پیڈروسا نے تیسری ، اٹلی کے آندرے نے چوتھی پوزیشن اپنے نام کی۔

لاہور: پابندی کا شکار پاکستانی فاسٹ باﺅ لر محمد عامر کے 2015ور لڈ کپ کھیلنے کے امکا نات ختم ہو گئے۔پاکستان کرکٹ بورڈ کے چیف آپریٹنگ آفیسر سبحان احمد کا کہنا ہے کہ محمد عامرکے 2015ورلڈ کپ کھیلنے کے امکانات ختم ہو گئے ہیں ،عامر پر عائد 5سالہ پابندی اگست2015میں ختم ہو رہی جبکہ 2015ورلڈکپ سال کے اوائل میں نیوزی لینڈ اور آسٹریلیا میں کھیلا جانا ہے ۔ان کا مزید کہنا تھا کہ ہماری کوشش ہے کہ عامر کو ڈومیسٹک کرکٹ کھیلنے کی اجازت مل جائے تاکہ وہ پابندی کے خاتمے پر انٹرنیشنل کرکٹ کے لیے تیار ہوں۔واضح رہے کہ چئیرمین پی سی بی نے جمعہ کو پریس کانفرنس کرتے ہوئے کہا تھا کہ وہ عامر کی ڈومیسٹک کرکٹ میں واپسی کے لیے پر امید ہیں ۔چیئرمین پی سی بی نے کہا تھا کہ آئی سی سی کے موجودہ قوانین میں ترمیم کے بعد عامر کی ڈومیسٹک کرکٹ میں واپسی ممکن ہے،ڈومیسٹک کرکٹ میں واپسی سے عامر کو پابندی کے خاتمے پر انٹرنیشنل کرکٹ کی تیاری میں مدد ملے گی۔ دوسری جانب محمد عامرکا کہنا ہے کہ انھیں اللہ پر بھروسہ ہے اور اللہ نے چاہا تو وہ ضرور واپسی کریں گے۔عامر نے آئی سی سی اجلاس میں ان کے لیے آواز اٹھا نے پر پی سی بی چئیرمین نجم سیٹھی کا شکریہ ادا کیا۔

نئی دہلی: راجستھا ن رائلز کے کھلاڑی اور انڈین انڈر 19کر کٹ ٹیم کے نائب کپتان سنجو سیمسن کی تمام ٹرافیاں اور سوونئر چوری کر لیے گئے۔بھارت کی ریاست کیرالا کی ڈسٹرکٹ تری واندرم سے تعلق رکھنے والے نوجوان کرکٹر کے آبائی گھر کو توڑ کر تمام ٹرافیاں اور دیگر میڈلز چوری کر لی گئے ،سیمسن کا خاندان دوسرے گھر میں رہائش پزیر تھا جبکہ وہ خود آئی پی ایل کی تیاری کے سلسلے میں دوسری ریاست میں ہیں ۔ سیمسن کے خاندان کا کہنا ہے کہ چوری کیے گئے میڈلز میں سیمسن کے اسکول اور بچپن سے حاصل کیے گئے تما م میڈلز شامل ہیں ۔ پولیس نے موقع پر پہنچ کر شواہداکھٹے کیے اور انتدائی تفتیش کے بعد پولیس کا کہنا ہے کہ چوروں نے ان کے گھر کا پچھلا دروازہ توڑ کر ان تمام میڈلز اور ٹرافیوں کو جنھیں گھر کے مرکزی ہال میں سجایا ہوا تھا اٹھا کر لے گئے ہیں جبکہ دیگر کو بری طرح نقصان پہنچا یا ہے ۔ پولیس نے نقب زنوں کی جانب سے شیلڈ کو کھرچ کر سونا اور تانبا نکالنے اور لکڑ ی کے حصے کو چھوڑ جانے کے امکا ن کو رد کر دیا ۔