کراچی(پی پی آ ئی)تمام پاکستانی اپنے اور اپنے اہل خانہ کے ووٹ کے اندراج کو یقینی بنائیں، ووٹ کے اندراج میں صرف 10 دن رہ گئے ہیں۔ ترجمان الیکشن کمیشن کے مطابق 25 اکتوبر 2023 کو ملک بھر میں تمام انتخابی فہرستوں کو منجمد (Freeze) کر دیا جائے گا، جس کے بعد کسی بھی ووٹ کا نہ ہی اندراج ہو سکے گا اور نہ ووٹ کی منتقلی ہو سکے گی،الیکشن کمیشن نے 28 ستمبر سے 25 اکتوبر 2023 تک انتخابی فہرستوں کو غیر منجمد کیا ہوا ہے، 25 اکتوبر 2023 تک تمام اہل افراد جن کے پاس شناختی کارڈ موجود ہو وہ اپنے ووٹ کا اندراج کر سکتے ہیں۔ یہ بھی پڑھیں: یااللہ خیر!! ہمسائیہ ملک میں زلزلہ،افسوسناک خبر آگئی ترجمان الیکشن کمیشن کا مزیدکہنا ہے کہ تمام اضلاع میں ڈسٹرکٹ الیکشن کمشنر بطور رجسٹریشن آفیسر تعینات ہیں، ووٹ اندراج میں تمام افراد کو مکمل سہولت (Facilitation) دی جارہی ہے،ووٹ کا اندراج اور منتقلی فارم 21 پر ہوتی ہے، اگر کوائف یا ایڈریس میں کوئی غلطی ہو وہ بھی درست کی جا سکتی ہے، انتخابی فہرستوں کو ملک بھر میں 20 جولائی 2023 کو منجمد (Freeze) کر دیا گیا تھا، ووٹ کا اندراج ووٹر کے شناختی کارڈ  کے مطابق مستقل یا موجودہ پتہ پر کیا جاتا ہے۔ ترجمان الیکشن کمیشن نے سرکاری ملازمین سے متعلق کہا کہ سرکاری ملازمین اگر کسی دوسرے ضلع  یا صوبے میں تعینات ہیں تو اپنی پوسٹگ والی جگہ پر  اپنا اور فیملی کا  ووٹ درج کرا  سکتا ہے، تمام اہل افراد آئندہ عام انتخابات میں اپنا حق رائے دہی  استعمال کر یں گے، ایسے تمام افراد جن کو 25 اکتوبر 2023 تک شناختی کارڈ  جاری ہوں گے ان کے ووٹوں کے اندراج  کو یقینی بنایا جائے گا۔

اسلام آباد)پی پی آ ئی) بجلی چوروں کے خلاف آئیسکو آپریشن, ایم اینڈ ٹی اور سرویلنس کی ٹیموں کی کاروائیاں بلا تعطل جاری ہیں،آئیسکو ترجمان کے مطابق ایک ہی دن میں کاروائیاں کرتے ہوئے ڈیٹیکشن ٹیموں نے مزید 43 بجلی چوروں کو پکڑ لیا 19 لاکھ 61  ہزار سے زائد کے جرمانے عائد کئے گئے. تفصیلات کے مطابق الیکٹرک سپلائی کمپنی (آئیسکو) آپریشن، حکومت اور وزارت توانائی کی براہ راست مانیٹرنگ میں شروع کی گئی اس مہم میں ماہ ستمبر 2023 سے آج تک اسلام آباد،راولپنڈی سٹی، راولپنڈی کینٹ، اٹک،جھلم اور چکوال سرکلز میں 1 لاکھ 29 ہزار سے زائد میٹرز چیک کئے گئے 2 ہزار سے زائد میٹرز سے بجلی کا غیر قانونی استعمال کیا جا رہا تھا۔ترجمان کے مطابق  متعلقہ صارفین کو 28 لاکھ 22 ہزار سے زائد یونٹس کی مد میں بجلی چوروں کو 13 کڑوڑ 7 لاکھ 41 لاکھ سے زائد کے جرمانے عائد کئے گئے،434 ایف آئی آرز کا اندراج اور 336 بجلی چوروں کو  پولیس نے گرفتار کیا۔ چیف ایگزیکٹیو آئیسکو ڈاکٹر محمد امجد خان نے کہا ہے کہ آئیسکو کی تمام ڈیٹیکشن ٹیموں کو پولیس اور ضلعی انتظامیہ کا بھرپور تعاون حاصل ہے اور جو بجلی استمال کرے اور بل ادا نہ کرے ایسا ہرگز ممکن نہیں ملک اداروں اور عوام کی خوشحالی کی ضامن اس مہم کو 100 فیصد کامیاب بنائیں گے اور عوام اس مہم میں ہمارا مکمل ساتھ دیں اور بجلی چوروں اور سہولت کاروں کی اطلاع ہلپ لائن 118 اور کمپلینٹ اینڈ مانیٹرنگ سیل کے نمبر 0519252933 پر دیں اطلاع دینے والوں کا نام مکمل طور پر راز میں رکھا جائے گا۔

ؒٓلاہور(پی پی آ ئی) مسلم لیگ ن لاہور کی قیادت نے قائد نوازشریف کے استقبال کی تیاریوں اور مینار پاکستان گراؤنڈ میں جلسے کے سلسلے میں گریٹر اقبال پارک کا دورہ کیا۔صدر مسلم لیگ ن لاہور سیف الملوک کھوکھر، خواجہ عمران نذیر و دیگر نے مینار پاکستان میں جلسے کی تیاریوں کا جائزہ لیا۔سابق صوبائی وزیر بلال یاسین نے جلسہ کے حوالے سے پنڈال اور سٹیج کے حوالے سے بریفنگ دی، جلسہ گاہ کے پنڈال اور لاہور سمیت دیگر شہروں سے آنے والے قافلوں کی پارکنگ بارے بھی صدر مسلم لیگ ن لاہور کو بریف کیا گیا۔گریٹراقبال پارک میں سٹیج کی تیاریوں کیلئے کنٹینر جلسہ گاہ پہنچانا شروع کر دیئے گئے۔دوسری جانب ضلعی انتظامیہ نے 21 اکتوبر کو نواز شریف کی آمد پر مسلم لیگ ن کو مینار پاکستان پر جلسے کی اجازت دینے کا فیصلہ کیا ہے۔ضلعی انتظامیہ کا کہنا ہے کہ مسلم لیگ ن کو مینار پاکستان پر جلسہ کرنے کی اجازت دی جا سکتی ہے، ڈسٹرکٹ انٹیلی جنس کمیٹی کا اجلاس آئندہ دو روز میں ہوگا، مسلم لیگ ن کو مینار پاکستان گراؤنڈ میں جلسہ کرنے کی اجازت شرائط کیساتھ دی جائے گی۔

اسلام آباد(پی پی آ ئی)پاک فضائیہ کے آپریشنل ایئر بیس پر 14 ملکی فضائی مشق، انڈس شیلڈ 2023، اپنے پوری آب وتاب سے جاری ہے۔ترجمان پاکستان فضائیہ کے مطابق یہ اعلیٰ سطحی مشق خطے کی سب سے بڑی فضائی جنگی مشقوں میں سے ایک ہونے کی بدولت نمایاں حیثیت کی حامل ہے، یہ فضائی مشق بین الاقوامی تعاون کو تقویت دینے اور ملکی فضائی صلاحیتوں کو فروغ دینے کی جانب ایک اہم سنگ میل ثابت ہوگی۔مشق میں دنیا کی صف اول کی فضائی افواج کے پائلٹس،گراؤنڈ عملہ اور ایئر ڈیفنس کنٹرولرز سمیت جدید لڑاکا طیارے حصہ لے رہے ہیں۔انڈس شیلڈ-2023، 14 ممالک کی بہترین فضائی افواج کو پیشہ ورانہ صلاحیتوں کا مظاہرہ پیش کرنے کے لیے ایک عمدہ پلیٹ فارم فراہم کر رہی ہے، فضائی مشق میں پاکستان، ترکیہ، سعودی عرب، قطر، متحدہ عرب امارات، مصر، عمان، بحرین، آذربائیجان، انڈونیشیا، مراکش، ازبکستان، چین اور ہنگری کی فضائی افواج حصہ لے رہی ہیں۔یہ فضائی مشق انتہائی اہمیت کی حامل ہے کیونکہ یہ تکنیکی ترقی، جدت کے فروغ، فضائی جنگ کی حکمت عملیوں کو جانچنے اور عصر حاضر کے فضائی دفاعی چیلنجوں سے نمٹنے میں پاک فضائیہ کے اہم کردار کی توثیق کرتی ہے۔انڈس شیلڈ مشترکہ مقاصد کے حصول کے لیے اس میں شریک ممالک کے باہمی شرکت داری کے عزم کو اجاگر کرنے کے ساتھ ساتھ انہیں درپیش مشترکہ خطرات کے پیش نظر فضائی جنگ کے نئے ابھرتے ہوئے محرکات کا بھی احاطہ کرے گی۔ان فضائی مشقوں کے باعث بین الاقوامی برادری کی پوری توجہ اس وقت پاکستان کی جانب مبذول ہے، جسکی بدولت پاک فضائیہ جدید فضائی جنگی حکمت عملیوں اور شریک ممالک کے مابین باہمی تعاون کو فروغ دے کر عالمی توجہ کا مرکز بنی ہوئی ہے۔انڈس شیلڈ-2023 شریک فضائی افواج کو نہ صرف اپنی صلاحیتوں اور فضائی برتری کا مظاہرہ پیش کرنے کا پلیٹ فارم مہیا کر رہی ہے بلکہ فضائی دفاع کے دائرہ کار میں افہام و تفہیم اور تعاون کو مزید مستحکم کرنے کا ایک بہترین موقع بھی فراہم کر رہی ہے۔یہ مشق مشترکہ چیلنجز کا سامنا کرنے کے لیے شریک فضائی افواج کے مابین باہمی تعاون کو فروغ دینے اور پاک فضائیہ کی جانب سے پاکستان کی فضائی حدود کے تحفظ کے عزم کا منہ بولتا ثبوت ہے۔