لاہور(پی پی آئی) لاہور ہائیکورٹ نے سابق وزیراعلیٰ پنجاب چودھری پرویز الہٰی کے خلاف اینٹی کرپشن کے مقدمے میں انٹراکورٹ اپیل پر سماعت آئندہ ہفتے تک ملتوی کردی۔لاہور ہائیکورٹ کے جسٹس شہرام سرور چودھری کی سربراہی میں دو رکنی بنچ نے پرویز الہٰی کی انٹراکورٹ اپیل پر سماعت کی، عدالت عالیہ نے ایڈووکیٹ جنرل کو معاونت کیلئے طلب کرتے ہوئے کیس کی سماعت آئندہ ہفتے تک ملتوی کردی۔پی پی آئی کے مطابق پرویز الہٰی کی جانب سے انٹراکورٹ اپیل میں مؤقف اختیار کیا گیا ہے کہ سابق وزیراعلیٰ کو گوجرانوالہ کے مجسٹریٹ نے اینٹی کرپشن کے مقدمے سے ڈسچارج کرنے کا حکم دیا، پنجاب حکومت نے جوڈیشل مجسٹریٹ کے فیصلے کے خلاف لاہور ہائیکورٹ سے رجوع کیا۔اپیل میں مزید کہا گیا کہ سنگل بنچ نے جوڈیشل مجسٹریٹ کی جانب سے پرویز الہٰی کو ڈسچارج کرنے کا فیصلہ کالعدم قرار دیا، سنگل بنچ کا فیصلہ حقائق کے بر عکس ہے، عدالت عالیہ سے استدعا ہے کہ ہائیکورٹ سنگل بنچ کا فیصلہ کالعدم قرار دیتے ہوئے سابق وزیراعلیٰ پنجاب کو اینٹی کرپشن کے مقدمے میں ڈسچارج کرنے کا فیصلہ برقرار رکھے۔

 اسلام آباد (پی پی آئی) ڈسٹرکٹ اینڈ سیشن کورٹس اسلام آباد نے شہبازگِل کے بغاوت پراکسانے کے کیس میں دوبارہ ناقابلِ ضمانت وارنٹ گرفتاری جاری کردئے۔ بغاوت پر اکسانے کے مقدمے میں ڈسٹرکٹ اینڈ سیشن عدالت نے شہباز گِل کے دوبارہ ناقابلِ ضمانت وارنٹ گرفتاری جاری کر دیئے، عدالت نے مقدمے میں شریکِ ملزم عمادیوسف کے خلاف ٹرائل ختم کر دیا۔ پی پی آئی کے مطابق ڈسٹرکٹ اینڈ سیشن عدالت کے جج طاہرعباس سِپرا نے بغاوت پر اکستانے کے کیس کی سماعت کی، دوران سماعت جج طاہرعباس سِپرا نے ریمارکس دیئے کہ سپریم کورٹ نے شریکِ ملزم عمادیوسف کے خلاف ٹرائل ختم کرنے کی ڈائریکشن دی، شریک ملزم عمادیوسف کی حد تک کیس میں ٹرائل ختم کیاجاتاہے۔ فاضل جج نیحکم دیا کہ کیس میں اشتہاری شہبازگِل کے ناقابلِ ضمانت وارنٹ گرفتاری دوبارہ جاری کیے جاتے ہیں۔ عدالت نے ایس ایچ او کو ہدایت کی کہ شہبازگِل جب بھی نظر آئیں، گرفتار کرکے عدالت پیش کیا جائے۔

 کراچی (پی پی آئی)حکومت  سندھ نے سرمایہ کاروں، تاجروں، صنعتکاروں اور بزنس کمیونٹی کا دیرینہ مطالبہ پورا کرتے ہوئے صوبے بھر میں بزنس فسلیٹیشن سنٹرز کے قیام کا فیصلہ کیاہے۔ اس حوالے سے سمری جلد وزیراعلیٰ کو بھجوائی جائے گی ان سنٹرز میں کاروبار شروع کرنے کے لئے تمام ضروری این او سیز کا اجرا  ایک چھت تلے ممکن ہو جائے گا۔ پی پی آئی کے مطابق بزنس فسلیٹیشن سنٹرزمیں آنے والے درخواست گزار  کو اس کی درخواست پروسیس کرنے میں مدد کرنے کے علاوہ اسے ٹریکنگ آئی ڈی اور این او سی حاصل کرنے آنے کے لئے تاریخ بھی بتا ئی جائے گی۔

 کراچی (پی پی آئی)پراسٹیٹ کینسر کے علاج  میں طبی سائنس میں بڑی کامیابی سامنے آئی ہے  جس کے بعد توقع کی جا رہی ہے کہ اس حوالے سے ہونے والی تحقیق کے نتیجے میں یہ معلوم کرنے میں مدد ملے گی کہ مرض دواوں کے خلاف کس طرح مزاحمت کرتا ہے اور اس پر کس طرح قابو پایا جاسکتا ہے۔ پی پی آئی کے مطابق ریسرچرز ابتدائی کلینیکل ٹرائل میں کینسر کی جانب سے خون کے سفید خلیوں کو ہائی جیک کرنے کیلئے جاری کئے جانے والے پیغامات روکنے کیلئے مختلف دواوں کو استعمال کیا۔ ان دواوں نے کینسر کے ایڈوانسڈ مرحلے میں اس پر کنٹرول کیا اور ٹیومرز مزید نہ بڑھنے یا سکڑنے پر مجبور کردیا۔ ریسرچرز کا کہنا ہے کہ اس عمل سے ظاہر ہوا کہ خون کے سفید خلئے کینسر کے بڑھنے میں مددگار ہوتے ہیں اور اگر ان کو ٹارگٹ کیا جائے تو مرض کی جانب سے مزاحمت ختم ہوجاتی ہے، ٹیومر کے بڑھنے کا عمل سست پڑ جاتا ہے۔ یہ تحقیق کرنے والی ٹیم کینسر ریسرچ انسٹی ٹیوٹ لندن، رائل مارسڈین این ایچ ایس فاونڈیشن ٹرسٹ اور آنکولوجی ریسرچ انسٹی ٹیوٹ سوئٹزرلینڈ پر مشتمل تھی۔ کینسر ریسرچ انسٹی ٹیوت کے تجرباتی کینسر میڈیسن انسٹی ٹیوٹ کے پروفیسر جوہن ڈی بونو کا کہنا ہے کہ اس ریسرچ سے پہلی دفعہ یہ ثابت ہوا ہے کہ کینسر کو ٹارگٹ کرنے کے بجائے خون کے سفید خلیوں کو ٹارگٹ کر کے مرض کے پھیلاو کو روکنا ممکن ہے، اس سے ٹیومر سکڑ جاتے ہیں اور مریض کو آرام ملتا ہے۔۔ یہ اسٹڈی ریسرچرز کی کم وبیش ایک عشرے کی کوششوں کا نتیجہ ہے۔ پروفیسر اندریا ایلی مونٹی کا کہنا ہے کہ اب ریسرچرز کی ٹیم کلینیکل ٹرائل شروع کرنے کا منصوبہ بنا رہی ہے۔ پراسٹیٹ کینسر یوکے کے ڈائریکٹر ریسرچ ڈاکتر ماتھیو ہوبس کا کہنا ہے کہ ان نتائج سے انھیں بہت خوشی ہوئی ہے۔