میرپور خاص: میر پور خاص چیمبر آف کامرس نے شہر میں شہر میں بڑھتے ہوئے جرائم کے خلاف احتجاجی تحریک چلانے کا اعلان کر دیا۔میرپورخاص چیمبرز آف کامرس نے جرائم کی بڑھتی ہوئی وارداتوں اور ڈاکو راج کے خلاف ایوان صنعت وتجارت نے میدان میںآکر احتجاجی تحریک چلانے کا اعلان کر دیا، ایوان صنعت و تجارت کے صدر مرزا اعظم بیگ نے بزنس کمیونٹی کے ہنگامی اجلاس سے خطاب کرتے ہوئے کہا کہ میرپورخاص میں اس وقت جنگل کا قانون نافذ ہو چکا ہے ،نا اہل پولیس افسران کی بدولت عوام عدم تحفظ کا شکار ہے ،اور دن دیہاڑے جرائم کی وارداتیں ہو رہی ہیں ،پولیس کی جانب سے اب تک کسی بھی واردات میں ملوث ملزمان کو گرفتار نہیں کیا گیا ہے ،انھوں نے جرائم کے خلاف احتجاجی تحریک چلانے کا اعلان کرتے ہوئے کہا کہ پہلے مرحلے کے طور پر وفاقی وزیر داخلہ ،گورنر سندھ ،وزیر اعلیٰ سندھ اور اعلیٰ پولیس افسران کو مراسلے بھیج دیئے گئے ہیں ،جس میں مقامی پولیس افسران کی ناقص کارکردگی کے حوالے سے مطلع کیا گیا ہے ،جبکہ دوسرے مرحلے میں قانون نافذ کرنے والے اداروں کی ناقص کارکردگی کے حوالے سے عوامی شعور اجاگر کرنے کے لےے شہر بھر میں احتجاج بینرز آویزاں کئے جائیں گے ، تیسرے مرحلے میں عوامی حلقوں ،سماجی ،سیاسی اور کاروباری طبقے کے ساتھ مل کر مشترکہ تحریک شروع کی جائے گی ۔

حیدرآباد: حکومت سندھ کے ادارے کھیلوں اور امور نوجوانان کی جانب سے ڈسٹرکٹ آفیسر اسپورٹس ارشاد علی مخدوم کی زیر نگرانی ٹنڈو قیصر تعلقہ حیدرآباد دیہی میں کوڈی کوڈی کا مقابلہ منعقد کیا گیا۔ پہلے میچ میں موسیٰ کھٹیان کی ٹیم نے ٹنڈو جام کی ٹیم کو 2-0سے شکست دیکر فائنل کھیلنے کا اعزاز حاصل کیا۔ فائنل میچ میں ٹنڈو قیصر کی ٹیم نے موسیٰ کھٹیان کی ٹیم کو2-0سے شکست دے کر مقابلہ اپنے نام کیا۔ اس موقعہ پر اسسٹنٹ ڈائریکٹر اسپورٹس لاڑکانہ محمد حسین مکانی مہمان خصوصی تھے انھوں نے کھلاڑیوں میں انعامات تقسیم کیے۔ اس موقع پر تماشائیوں کی بڑی تعداد نے مقابلے کو بڑے جوش سے دیکھا اور کھلاڑیوں کو داد دی۔

میر پور خاص: ایم کیو ایم کے ممبر سندھ اسمبلی ڈاکٹر ظفر کمالی نے کہا ہے کہ بجلی کی لوڈ شیڈنگ سے میرپور خاص میں کاروباری سر گرمیاں متاثر ہونے کا خدشہ ہے ۔ ڈاکٹر ظفر کمالی نے میرپور خاص میں عوامی شکایات پر کہاکہ میر پور خاص میںبجلی کی لوڈشیڈنگ کا دورانیہ 9گھنٹے سے تجاوز کرگیاہے، کاروباری سرگرمیاں شدید متاثر اور صنعتیں بند ہونے کا خدشہ ہے۔انھوں نے کہا کہ گرمی کی شدت میں اضافے کے ساتھ ہی میرپورخاص میں بجلی کی لوڈشیڈنگ کا دورانیہ بڑھا دیا گیا ہے جس سے کاروباری سرگرمیاں شدید متاثر ہورہی ہیں،جبکہ نکاسی و فراہمی آب کا کام بھی شدید متاثر ہورہا ہے۔انھوں نے کہا کہ دن بھر بجلی کی آنکھ مچولی اور پھر طویل دورانیہ کی لوڈشیڈنگ سے صنعتیں بند ہونے کا بھی خدشہ پیدا ہوگیا ہے ، طلباءو طالبات کو امتحانات کے دوران سخت مشکلات کا سامنا ہے ۔انھوں نے مزید کہا کہ حیسکو افسران کی من مانیوں کے باعث اسپتالوں میں زیر علاج مریض شدید ذہنی اذیت سے دوچار ہیں اور مختلف اسپتالوں میں بجلی کی طویل لوڈشیڈنگ کے پیش نظر آپریشن ملتوی کردیئے گئے ہیں۔انھوں نے ارباب اختیار سے مطالبہ کیا کہ میرپورخاص کے عوام کو درپیش مشکلات کا فوری نوٹس لیتے ہوئے بجلی کی لوڈشیڈنگ کا دورانیہ کم کیا جائے تاکہ عوام سکھ کا سانس لے سکیں۔

لیزبن: فن لینڈ کے میکو ہروونن نے پرتگال ورلڈ کار ریلی کے دوسرے روز زبردست ڈرائیونگ کے ساتھ برتری حاصل کر لی۔پرتگال کے پرخطر راستوں پر ورلڈ کار ریلی کے دوسرے روز بھی دلچسپ مقابلے ہوئے۔دشوار راستوں پر ہونیوالی ریس کے دوران کئی گاڑیوں کو حادثات کا سامنا بھی کرنا پڑا ، مشکل حالات میں ڈرائیونگ میں ناکام ہونیوالوں میں ویلز کے ایونز ، پولینڈ کے رابرٹ کیوبیکا اور فن لینڈ کے ماتا شامل ہیں،دوسرے دن کے ایونٹ میں فن لینڈ کے میکو نے زبردست ڈرائیونگ کرتے ہوئے پہلی پوزیشن اپنے نام کی۔ایونٹ میں مجموعی طور پر ورلڈ چیمپئن سیباسٹین اوگئیر کا ٹاپ پوزیشن پر قبضہ برقرار ہے جبکہ ہروونن3 اعشاریہ 7 سیکنڈ کے فرق سے دوسرے نمبر پر موجود ہیں۔ورلڈ کار ریلی کے تیسرے روز ڈرائیورز 150 کلومیٹر کا فاصلہ طے کریں گے۔

کراچی: دنیا بھر کا تقریباً پچاس فیصد حصہ مچھروںکی وجہ سے ہونے والی بیماریوں کے خطرے سے دوچار ہے۔ ڈاﺅ یونیورسٹی آف ہیلتھ سائینسز کے عالمی یوم صحت کے حوالے سے آگاہی کے سیمینار سے اظہار خیال کر تے ہوئے ماہرین کا کہنا تھا کہ دنیا بھرکا تقریباً 50فیصدحصہ مچھروں کی وجہ سے ہونے والی بیماریوںکے خطرے سے دوچار ہے،ا یسی بیماریوں سے سالانہ ایک ملین سے زائد افراد موت کا شکار ہوجاتے ہیں، تقریباً 100 ممالک میں 2.5 ارب افراد صرف ڈینگی کے خطرے سے دوچار ہیں،2010 سے پاکستان میں مچھروں کے کاٹنے سے ہونے والی بیماریوں کی شدد میں اضافہ ہوا۔ اس صورتحال سے نمٹنے کیلئے ملک کو تکنیکی مدد اور رہنمائی کے ساتھ ساتھ موثر طریقکار کی اشد ضرورت ہے، اس سال عالمی یوم صحت کے دن کا موضوع مچھروںکی وجہ سے ہونے والی بیماریوں کی روک تھام اور کنٹرول کرنا ہے۔ ڈاﺅ یونیورسٹی کا اس آگاہی سیمینار کے انعقاد کا مقصد عوام کی صحت کے مسائل کو اجاگر کرنااور معاشرے کے تعلیم یافتہ نوجوانوں میں بیداری پیداکرنا ہے تاکہ کمیونٹی میں بیماریوں سے بچاﺅ کے احتیاطی پیغام پھیلائیں۔ ماہرین میں ڈاﺅ میڈیکل کالج کے سابق پرنسپل پروفیسر الہی بخش سومرو، ڈاﺅ یونیورسٹی کے پرو وائس چانسلر پروفیسر عمر فاروق، اسکول کو پبلک ہیلتھ کے وائس ڈین ڈاکٹر کاشف شفیق،پروفیسر شاہین شرافت، پروفیسر رفیق خنانی اور ڈاکٹر اختر علی بلوچ شامل تھے۔اس موقع پر ماہرین نے کہاگذشتہ چند سالوں کے دوران دنیا کے کئی ممالک میں مچھروںکے کاٹنے سے ہونے والی بیماریوں دوبار نمودار ہوئی ہیں اور کئی ممالک میں نئی رپورٹیں سامنے آئی ہیں۔ انھوں نے مزید کہا کہ ان بیماریوں سے بچاﺅ اور ان کے تدارک کیلئے حکومت، ڈاکٹرز،میڈیا،کمیونٹی اور معاشرے کے عام افراد اپنا بھرپور کردار ادا کریں اور لوگوں کو اس بیماریوں سے بچاﺅ اور روک تھام کیلئے احتیاتی تدابیر سے آگاہ کریں۔