کراچی: قومی ویمن کرکٹ ٹیم تین ملکی ٹورنامنٹ میں شرکت کیلئے قطر روانہ ہوگئی۔ کپتان ثنائ میرکہتی ہیں کہ جنوبی افریقہ اورآئرلینڈ جیسی مضبوط ٹیموں کے خلاف اچھا کارکردگی دکھائیں گے۔ 14رکنی قومی ویمن ٹیم پانچ آفیشلزکے ہمراہ کراچی سے دوحہ روانہ ہوئی۔ قومی ٹیم دوحہ میں دس سے پچیس جنوری تک جنوبی افریقہ اور آئرلینڈ کی ویمن ٹیموں کے خلاف ون ڈے اور ٹی ٹوئنٹی چیمپئن شپ میں حصہ لے گی۔ ٹریننگ کیمپ ٹورنامنٹ کیلئے معاون ثابت ہوگا، کپتان ثنائ میر نے روانگی سے قبل میڈیا سے گفتگو کرتے ہوئے کہا کہ کھلاڑیوں نے کیمپ میں تینوں شعبوں میں سخت محنت کی ہے۔ کھلاڑیوں کی فزیکل فٹنس میں بھی بہتری آئی ہے۔ جنوبی افریقہ اور آئرلینڈ جیسی مضبوط ٹیموں کے خلاف اچھی کارکردگی دکھانے کی کوشش کریں گے۔ انہوں نے کہا کہ تین ملکی ٹورنامنٹ ورلڈ ٹی ٹوئنٹی کی تیاریوں میں معاون ثابت ہوگا۔

سین جوز: فیفا انڈر 17ویمنز ورلڈ کپ 15مارچ سے کوسٹاریکا میں شروع ہوگا۔فیفا کے اعلامیے کے مطابق میگا ایونٹ میں دنیا بھر سے 16ٹیمیں حصہ لیں گی جنہیں چار گروپوں میں تقسیم کیا گیا ہے ۔گروپ اے میں میزبان کوسٹاریکا ،وینزویلا،اٹلی اور زمیبا ۔گروپ بی میں گھانا ،کوریا،جرمنی اور کینیڈا۔گروپ سی میں نیوزی لینڈ ،پیراگوئے ،اسپین اور جاپان جبکہ گروپ ڈی میں میکسیکو ،کولمبیا،چین اور نائیجیریا شامل ہیں ۔

میلبورن: رواں سال کا پہلا گرینڈ سلام آسٹریلین اوپن ٹینس ٹورنامنٹ کا آغاز 13جنوری سے میلبورن میں ہوگا۔میگا ایونٹ کے مینز ایونٹ میں سربیا کے نوواک جوکووچ جبکہ ویمنز ایونٹ میں بیلاروس کی وکٹوریہ آزارینکا اپنے اعزاز کا دفاع کریں گی ۔

لندن: انگلش فٹبالر تھیووالکوٹ انجری کے باعث فیفا ورلڈ کپ سے باہر ہوگئے ۔تفصیلات کے مطابق آرسنل کھلاڑی والکوٹ کا ٹوٹنہم کے خلاف میچ کے دوران گھٹنہ زخمی ہوگیا ۔آرسنل کلب کی طرف سے جاری شدہ بیان کے مطابق والکوٹ کی انجری سنجیدہ نوعیت کی ہے اور انہیں مکمل فٹ ہونے میں چھ ماہ کا عرصہ درکار ہوگا ۔اس طرح وہ سیزن کے بقیہ میچز اور برازیل میں ہونے والے فیفا ورلڈ کپ میں شرکت نہیں کرسکیں گے ۔

ممبئی: بھارتی ایتھلیٹ رام لیلی ریکارڈ ہولڈر اولمپک چیمپئن یوسین بولٹ کے کوچ گلین ملز سے تربیت حاصل کریں گے ۔ایک انٹرویو کے دوران رام لیلی کا کہنا تھا کہ وہ دولت مشترکہ اور ایشیا ئی کھیلوں کو ذہن میں رکھ کر تیاری کرنا چاہتے ہیں ۔اسی سلسلے میں وہ 12جنوری کو جمیکا جائیں گے جہاں یوسین بولٹ کے کوچ گلین ملز سے چار ماہ تک تربیت حاصل کریں گے ۔