لندن: سابق انگلش کرکٹر کیون پیٹرسن نے کاﺅنٹی کلب سرے سے رواں سیزن کیلئے نیا معاہدہ کرلیا ۔ 33سالہ پیٹرسن فی الحال ٹی ٹوئنٹی مقابلوں میں کاﺅنٹی کلب کی نمائندگی کریں گے ۔پیٹرسن کے مطابق اگر گزشتہ معاہدوں سے مسئلہ پیدا نہ ہوا تو وہ فرسٹ کلاس اور محدود اوورز کی کرکٹ کیلئے بھی دستیاب ہوں گے ۔

بلفاسٹ: آئرش گالفر روری میکلرائے نے اوپن گالف چیمپئن شپ کی تیاریوں کو حتمی شکل دینے کیلئے جولائی مٰں اسکاٹش اوپن کھیلنے کا فیصلہ کرلیا۔میکلرائے نے آخری مرتبہ اس ٹورنامنٹ میں 2008-9میں حصہ لیا تھا ۔

اسٹاک ہوم: فن لینڈ کے میٹی لٹوالا نے تیسری مرتبہ سوئیڈن کار ریلی کا ٹائٹل جیت لیا ۔ سوئیڈن کار ریلی میں برف پوش ٹریک اور سخت سردی بھی ڈرائیورز کے حوصلے پست نہ کرسکی ۔فنش ڈرائیور میٹی لٹوالا نے مقررہ فاصلہ تین گھنٹے تیس اعشاریہ ایک سیکنڈ میں طے کرکے کیرئیر میں تیسری مرتبہ سوئیڈن کار ریلی جیت لی ۔ناروے کے اینڈریاس مک کیلسن دوسرے جبکہ ناروے ہی کے میڈز اوسٹبرگ تیسرے نمبر پررہے ۔

ویلنگٹن: نیوزی لینڈ کرکٹ ٹیم کے کوچ مائیک ہیسن نے کہا ہے کہ آل راﺅنڈر جیسی رائیڈر اور ڈگ بریسویل بھارت کے خلاف دوسرے اور آخری ٹیسٹ میں شرکت نہیں کریں گے ۔ جیسی رائیڈر اور ڈگ بریسویل نے آکلینڈ ٹیسٹ شروع ہونے سے ایک دن قبل مقامی شراب خانے میں شراب نوشی کرکے غل غپاڑہ مچایا ۔ کوچ مائیک ہیسن کے مطابق نیوزی لینڈ کرکٹ بورڈ دونوں کھلاڑیوں کے رات گئے تک باہر رہنے والے واقعے کی تحقیقات کررہا ہے ۔

ممبئی: بگ تھری کے باس اور بی سی سی آئی کے سربراہ سری نواسن کے داماد گروناتھ می اپن پرآئی پی ایل میچ فکسنگ کے الزامات ثابت ہو گئے۔ آئی پی ایل کرپشن ا سکینڈل کی تحقیقاتی رپورٹ بھارتی سپریم کورٹ میں جمع کروا دی گئی۔رپورٹ کے مطابق گروناتھ می اپن پر کرپشن الزامات درست ہیں۔گروناتھ می اپن آئی پی ایل ٹیم چنائی سپر کنگز کے چیف اور بی سی سی آئی کے سربراہ سری نواسن کے داماد ہیں۔کرکٹ پریمیئر لیگ کے چھٹے ایڈیشن میں پانچ کھلاڑیوں کے ساتھ گروناتھ می اپن پر بھی میچوں پر سٹے بازی کے الزامات لگائے گئے تھے لیکن چند روز جیل کی ہوا کھانے کے بعد گروناتھ ضمانت پر رہا ہو گئے تھے۔تحقیقاتی رپورٹ سامنے آنے کے بعد گروناتھ می اپن پر فرد جرم عائد کر دی گئی ہے۔بھارتی ذرائع کے مطابق الزامات ثابت ہوئے تو ان کی ٹیم چنائی سپر کنگز پر پابندی لگ سکتی ہے۔سٹے بازی کے الزامات میں ملوث راجھستان رائلز کی مالک شلپا شیٹھی اور انکے شوہر کے خلاف بھی مزید تحقیقات کی جائیں گی۔