نووی ساڈ: ڈیوس کپ ٹینس ورلڈ گروپ میں سوئٹزرلینڈ نے سربیا کے خلاف دو صفر کی برتری حاصل کرلی ۔ سربیا کے شہر نووی ساڈ میں کھیلے جانے والے ڈیوس کپ ورلڈ گروپ میں آسٹریلین اوپن کے چیمپئن سوئٹزرلینڈ کے اسٹینلاس واورینکا نے سربیا کے ڈوسان لیجووک کو چار سیٹ میں مقابلے کے بعد زیر کرلیا ۔سوئس کھلاڑی کی فتح کا اسکور چھ چار، چار چھ ،چھ ایک اور سات چھ رہا ۔ایک اور میچ میں سوئٹزرلینڈ ہی کے راجر فیڈرر نے سربیا کے لیجابوزولجک کو اسٹریٹ سیٹس میں شکست دیتے ہوئے برتری کو دگنا کردیا ۔دوسرے ٹائی میں فرانس نے آسٹریلیا کے خلاف دو صفر کی برتری حاصل کرلی ۔جمہوریہ چیک اور نیدرلینڈ کے درمیان مقابلہ ایک ایک سے برابر ہوگیا۔

میڈرڈ: اسپین میں جاری فارمولاون کے چوتھے اور آخری پریکٹس سیشن میں ولیمز کے فلپی ماسا نے سب کو پیچھے چھوڑ دیا ۔ دفاعی چیمپئن ریڈبل کی ٹیم پریکٹس سیشن میں قابل ذکر کارکردگی کا مظاہرہ نہ کرسکی ۔جیریز سرکٹ پر منعقدہ چوتھے پریکٹس سیشن میں فلپی ماسا نے مقررہ فاصلہ ایک منٹ 28اعشاریہ دو سیکنڈز میں طے کیا ۔ ریڈ بل کو ٹیسٹنگ سیشن میں تیکنیکی خرانی کا سامنا کرنا پڑا ۔ فراری کے فرننڈ اولنسو دوسرے نمبر پر رہے ۔مرسڈیز ٹیم کے دو ڈرائیور برطانیہ کے لوئس ہملٹن اور جرمنی کے نیکوروز برگ نے 132لیپس مکمل کیے ۔ فارمولا ون کے نئے سیزن کا آغاز 16مارچ کو آسٹریلیا میں ہوگا۔

سڈنی: آسٹریلیا کے معروف کرکٹر مائیکل ہسی اور انگلش آل راﺅنڈر لیوک رائٹ سمیت آٹھ کھلاڑیوں کو بگ بیش کرکٹ لیگ پلیئرز آف دی ٹورنامنٹ ایوارڈ کیلئے شارٹ لسٹ کرلیا گیا ۔ کھلاڑیوں میں مائیکل ہسی ،لیوک رائٹ کے علاوہ جیکسن برڈ ،بین ڈنک ،جان ہیسٹنگز،موئسز ،ہنریکس،بریڈ ہوگ اور کرس لائن شامل ہیں ۔ فاتح کھلاڑی کو پلیئر آف دی ٹورنامنٹ ایوارڈ سیمی فائنل مرحلے کے آغاز سے قبل 3فروری کو دیا جائے گا۔

ویلنگٹن: نوجوان فاسٹ بولر میٹ ہنر ی ڈیبیو ون ڈے میں 4وکٹیں حاصل کرنے والے نیوزی لینڈ کے تیسرے کرکٹر بن گئے۔ ہنری نے بھارت کے خلاف پانچویں ایک روزہ میچ میں یہ اعزاز حاصل کیا ۔ نیوزی لینڈ کی طرف سے اس سے قبل ڈیبیو ون ڈے میں چار وکٹیں لینے کا اعزاز میکلینا گھان اور رچرڈہیڈلی کو حاصل ہے ۔ ہنری کی شاندار پرفارمنس کی بدولت نیوزی لینڈ کی ٹیم بھارت کیخلاف تاریخی کلین سویپ کرنے میں کامیاب رہی ۔

ویلنگٹن: مایہ ناز مڈل آرڈر بلے باز روس ٹیلر انٹرنیشنل ون ڈے کرکٹ میں 10سنچریاں مکمل کرنے والے نیوزی لینڈ کے دوسرے بلے باز بن گئے ۔ ٹیلر نے یہ اعزاز بھارت کیخلاف سیریز کے آخری ون ڈے میں شاندار سنچری اسکور کرکے حاصل کیا ۔ نیوزی لینڈ کی طرف سے ون ڈے کرکٹ میں سب سے زیادہ سنچریاں بنانے کا اعزاز نیتھن ایسٹل کو حاصل ہے ۔ایسٹل نے 223میچوں میں 16سنچریاں اسکور کی ہیں ۔