ڈھاکا: سری لنکا کرکٹ ٹیم کے تجربہ کار بلے باز مہیلا جے وردھنے انجری کے باعث بنگلہ دیش کیخلاف ٹی ٹوئنٹی اور ون ڈے سیریز سے باہر ہوگئے ۔سری لنکن بورڈ کی طرف سے جاری کردہ ایک اعلامئے کے مطابق جے وردھنے پریکٹس سیشن کے دوران انگلی کی انجری کا شکار ہوگئے جس پر انہیں فوری طور پر قریبی ہسپتال منتقل کیا گیا جہاں ان کے ہاتھ پر ٹانکے لگائے گئے ۔فٹنس مسائل کی وجہ سے جے وردھنے کو وطن واپس بھیج دیا گیا ۔

روٹرڈیم: عالمی نمبر چھ برطانوی ٹینس اسٹار اینڈی مرے اور ارجنٹائن کے یوآن مارٹن ڈیل پوٹرو ورلڈ انڈور ٹینس ٹورنامنٹ کے دوسرے راونڈ میں پہنچ گئے۔ ہالینڈ کے شہر روٹرڈیم میں ہونیوالے ٹینس ٹورنامنٹ میں برطانوی سٹار اینڈی مرے اور فرانس کے روجر ایڈورڈ مد مقابل ہوئے۔ ومبلڈن چیمپئن اینڈی مرے نے فرانسیسی حریف کو سٹریٹ سیٹس میں چھ تین اور چھ تین سے شکست دی۔ سنگلز ایونٹ ہی کے ایک اور میچ میں ارجنٹائن کے ڈیل پوٹرو نے مونفل گائیل کو دلچسپ مقابلے کے بعد زیر کیا۔ڈیل پوٹرو سات چھ اور چھ تین سے کامیابی حاصل کر کے اگلے راونڈ میں پہنچے۔

کراچی: قومی کرکٹ ٹیم کے ہیڈ کوچ معین خان کا کہنا ہے کہ کھلاڑیوں کو صرف اپنی صلاحیتوں پر اعتماد کی ضرورت ہے، کسی بھی حالات میں فائٹنگ اسپرٹ دکھانے والی ٹیم ہی فاتح ہوتی ہے۔کراچی میں میڈیا سے بات کرتے ہوئے ان کا کہنا تھا کہ کوشش ہوگی کہ ٹیم جیت کے راستے پر آگے بڑھے۔معین خان کے مطابق ان کی وابستگی کے دور میں بھی پاکستان ٹیم میں فائٹنگ اسپرٹ نمایاں دکھائی دی، اب بھی فوکس اس ہی بات پر ہوگا کہ ٹیم کسی صورتحال میں ہمت نہ ہارے۔معین خان نے مزید کہا کہ ہیڈ کوچ کی ذمہ داری ایک چیلنج سمجھ کر قبول کی ہے، دنیائے کرکٹ میں پاکستان ٹیم کو خطرناک حریف کے طور پر منوانا اولین ہدف ہے۔

اسلام آباد: بنگلہ دیش میں ہونے والے ایشیا کپ اور ورلڈ ٹی ٹوئنٹی کیلئے قومی ٹیم کے انتخاب کے سلسلے میں سلیکشن کمیٹی کا اجلاس آج (جمعرات )اسلام آباد میں ہوگا۔ ذرائع کے مطابق قائم مقام چیف سلیکٹر اظہر خان نے سلیکشن کمیٹی کا اجلاس جمعرات کواسلام آباد میں طلب کرلیا ہے۔ اجلاس میں ایشیا کپ اور ورلڈ ٹی ٹوئنٹی کیلئے پاکستانی ٹیم کا انتخاب کیا جائے گا۔ ون ڈے ٹیم کے کپتان مصباح الحق اور ٹی ٹوئنٹی ٹیم کے قائد محمد حفیظ بھی اجلاس میں شرکت کریں گے جبکہ ہیڈ کوچ معین خان بھی اجلاس میں شرکت کیلئے کراچی سے اسلام آباد پہنچیں گے۔ کپتانوں اور کوچ سے مشاورت کے بعد سلیکشن کمیٹی کھلاڑیوں کے نام فائنل کر کے منظوری کیلئے چیئرمین پی سی بی کو بھجوادے گی۔ امکان ہے کہ دونوں ایونٹس کیلئے ٹیم کا اعلان جمعہ تک کر دیا جائے گا۔