لاہور: قومی ہاکی ٹیم کے کوچ طاہر زمان اور گول کیپر سلمان اکبر نے پی ایچ ایف کے پیٹرن انچیف وزیر اعظم سے اپیل کی ہے کہ قومی کھیل ہاکی کے معاملات چلانے کیلئے فیڈریشن کو فوری گرانٹ دی جائے۔ لاہور میں میڈیا سے بات چیت کرتے ہوئے طاہر زمان نے کہا کہ ہاکی فیڈریشن کو کھیل کے منصوبوں پر عملدرآمد کیلئے پیسے کی ضرورت ہے اور پی ایچ ایف کا خزانہ خالی ہونے کی وجہ سے نہ ہی کوئی کیمپ لگ رہا ہے اور اذلان شاہ میں شرکت پر بھی سوالیہ نشان ہے۔ وزیر اعظم مالی امداد فراہم کریں جبکہ گول کیپر سلمان اکبر نے کہا کہ حکومتی مالی اعانت کے بغیر ہاکی کے معاملات چلانا ممکن نہیں۔ ان کا کہنا تھا کہ ایونٹس میں شرکت نہ کرنے سے پاکستان کی دو ہزار سولہ اولمپکس کے کوالیفائنگ راونڈ ایشین گیمز کی تیاری بھی متاثر ہورہی ہے۔

کراچی: کسٹم کرکٹ اکیڈمی میں جاری ایمرجنگ بولنگ تربیتی کیمپ اختتام پذیرہوگیا ، ایک خاتون سمیت 16 لڑکوں نے حصہ لیا ، کراچی میں فاسٹ بولنگ ایمرجنگ تربیتی کیمپ ایک ماہ تک جاری رہا۔ آخری روز سابق ٹیسٹ کرکٹروسیم اکرم نے بھی کیمپ کا معائنہ کیا اور بولرزکومفید مشورے دیے۔ ان کا کہنا تھا کہ پاکستان میں بولنگ کا بے پناہ ٹیلنٹ ہے کھلاڑیوں کی درست سمت میں رہنمائی کی گئی تو یہی بولرزمستقبل میں پاکستان ٹیم کا اثاثہ ہوں گے۔ ایونٹ کے چیف کوچ سابق ٹیسٹ کرکٹرجلال الدین کا کا کہنا تھا کہ انہوں نے فاسٹ بولنگ کوچ نوجوانوں کو تربیتی دینے کی ایک کاوش تھی۔ تربیتی کیمپ میں 16 نوجوانوں کے ساتھ ایک خاتون بولر بھی سرگرم دکھائی دی ان کا کہنا تھا کہ لڑکوں کے ساتھ پریکٹس کرنا اچھا تجربہ تھا۔ کیمپ کے شرکاءکا کہنا تھا کہ اس طرح کے کیمپس سے انہیں بہت کچھ سیکھنے کو ملتا ہے۔

لاہور: پاکستان کرکٹ بورڈ نے قومی ٹیم کے کوچنگ پینل کے لیے اشتہار دے دیا۔تازہ اشتہار میں کوچنگ کورس کی شرط ختم کر دی گئی ہے۔ پی سی بی کے اشتہار کے مطابق کوچنگ پینل میں بیٹنگ فیلڈنگ اور ہیڈ کوچ کی ضرورت ہے۔ ٹیم کے لیے بولنگ کوچ کی ضرورت نہ محسوس کرتے ہوئے بورڈ نے اسے شامل بھی نہیں کیا۔ ٹیم کے کوچز کے لیے سوائے پانچ سال کے تجربے کے کوچنگ کورس کی کوئی شرط نہیں رکھی گئی ہے۔ اشتہار میں کوچنگ کے امیدواروں کو 6فروری تک اپنی درخواستیں جمع کروانے کی ڈیڈ لائن دی گئی ہے۔ کوچ کمیٹی میں ہیڈ انتخاب عالم سمیت وسیم اکرم، سبحان احمد اور راشد لطیف شامل ہیں۔