کراچی (پی پی آئی)الیکشن کمیشن آف پاکستان نے مردم شماری 2023 کے تناظر میں نئے بننے والے شماریاتی بلاک کوڈز میں گھر گھر ووٹر ز کی تصدیق کا عمل شروع کرنے کا اعلان کیاہے جو 30 ستمبر 2023 تک جاری رہے۔اس سلسلے میں الیکشن کمیشن نے گھر گھر ووٹر کی تصدیق کرنے کیلئے عملہ تعینات کیا ہے،عوام الناس سے گزارش کی گئی ہے کہ عملہ کے ساتھ تعاون کریں تاکہ یہ قومی فریضہ نہایت خوش اسلوبی سے بروقت پایہ تکمیل تک پہنچ سکے۔ پی پی آئی کے مطابق شہر قائد میں ابھی تک گھر گھر ووٹر ز کی تصدیق  کے عمل کای تصدیق نہیں ہو سکی ہے

کوئٹہ (پی پی آئی)کوئٹہ کے علاقے کچلاک میں گشت پر  مامور پولیس کی گاڑی پر دہشت گردوں نے فائرنگ اور دستی بم سے حملہ کیا ہے۔پولیس کے مطابق دہشتگردوں کی  فائرنگ سے ایک پولیس اہلکارزخمی ہوا ہے جس کو سول ہسپتال منتقل کردیا گیا ہے جہاں اس کی حالت تسلی بخش ہے۔پی پی آئی کے مطابق واقعے کی اطلاع ملتے ہی پولیس اور امدادی ٹیمیں موقع پر پہنچ گئیں، پولیس کی جوابی فائرنگ سے حملہ آور فرار ہوگیا۔پولیس کی جانب سے واقعے کی تفتیش کی جارہی ہے۔

 کراچی(پی پی آئی)شہر قائد کی پولیس کراچی کے مختلف علاقوں میں دوران ڈکیتی مزاحمت پر شہریوں کے قتل کے درست اعداد و شمار سے لاعلم نکلی۔پی پی آئی کے مطابق ترجمان کراچی پولیس نے دعویٰ کیا ہے کہ رواں سال اب تک 82 شہری ڈکیتی مزاحمت پر جاں بحق ہوئے ہیں، اور 361 شہری زخمی ہوئے۔ جب کہ دوسری طرف پولیس تھانہ جات، اسپتال اور ریسکیو ذرائع نے تصدیق کی ہے کہ رواں سال اب تک شہر کے مختلف علاقوں میں ڈکیتی مزاحمت پر 100 افراد جاں بحق ہو چکے ہیں۔کراچی پولیس نے گزشتہ 9 ماہ کے دوران ہونے والے پولیس مقابلوں کے اعداد و شمار بھی جاری کر دیے ہیں، ایڈیشنل آئی جی کراچی خادم حسین رند کے مطابق 9 ماہ کے دوران 755 پولیس مقابلے ہوئے، جن میں 123 ملزمان ہلاک ہوئے۔جن ملزمان کو زخمی حالت میں گرفتار کیا گیا ان کی تعداد 926 ہے، اور دیگر گرفتار ملزمان کی تعداد 5 ہزار 339 ہے۔ اے آئی جی نے اپنے پیغام میں کہا کہ کراچی پولیس شہریوں کے جان و مال کی حفاظت اور امن کے قیام کے لیے مصروف عمل ہے۔