سڈنی: آسٹریلوی آل راﺅنڈر شین واٹسن انگلینڈ کے خلاف جاری ایشز سیریز کے باعث ڈومیسٹک ٹورنامنٹ شیفلڈ شیلڈ سے دستبردار ہوگئے ۔ آسٹریلیا کو ایشز سیریز کے پانچ ٹیسٹ میچوں کی سیریز میں 0-1کی برتری حاصل ہے ۔آسٹریلوی کرکٹ بورڈ کی جانب سے ایشز سیریز میں شامل تمام کھلاڑیوں کو یکم دسمبر کو دوسرے ٹیسٹ سے قبل ایڈیلیڈ پہنچنے کی ہدایت کی گئی ہے ، کھلاڑیوں کوکسی بھی دومیسٹک ٹورنامنٹ میں شرکت سے منع کیا گیا ہے ۔ آسٹریلوی کوچ ڈیرن لی مین نے واٹسن کو تمام توجہ اپنی فٹنس پرموکوز رکھنے کی ہدایت کی ہے۔

دبئی: ٹی 20 ورلڈ کپ 2014کے لیے متحدہ عرب امارات سمیت چار ٹیموں نے کوالیفائی کر لیا۔ دبئی میںجاری ٹی 20 ورلڈ کپ کا کوالیفائنگ راونڈ اپنے اختتام کو پہنچ گیا۔ نیپال، یو اے ای ، آئر لینڈ اور افغانستان بھی میگا ایونٹ کے لیے کوالیفائی کرنے والی ٹیموں میں شامل ہیں۔ ٹی 20 ورلڈ کپ 2014 بنگلا دیش میں کھیلا جائے گا۔

اسلام آباد: کبڈی ورلڈ کپ میں مردوں اور خواتین قومی ٹیم کی شرکت مشکوک ہو گئی۔ بھارتی پنجاب میں ہونے والے کبڈی ورلڈ کپ میں مردوں اور خواتین کی قومی ٹیم نے شرکت کے لیے جمعہ کو روانہ ہونا تھا لیکن بھارتی حکومت کی جانب سے تاحال کھلاڑیوں کے این او سی جاری نہیں کیے گئے۔ ایونٹ میں قومی ویمن ٹیم پہلی بار شرکت کرے گی۔ کبڈی مقابلے یکم دسمبر سے 14 دسمبر تک بھارت میں شیڈول ہیں۔

لندن: برطانیہ کی نیشنل کرائم ایجنسی نے ایک فٹ بال میچ میں فِکسنگ کے الزمات پر دوران تحقیق چھ افراد کو حراست میں لے لیا ۔ خیال ظاہر کیا جا رہا ہے کہ یہ افراد میچوں پر شرطیں لگانے والے کسی بڑے بین الاقوامی گروہ کا حصہ ہو سکتے ہیں۔ یہ گرفتاریاں برطانوی اخبار ‘ڈیلی ٹیلی گراف’ کی ایک تحقیقاتی رپورٹ کی اشاعت کے بعد شروع ہونے والی تحقیقات کے نتیجے میں عمل میں آئی ہیں۔ اس رپورٹ کے مطابق برطانیہ میں نچلے درجے کے لیگ میچز پچاس پونڈ تک کی رقم کے عوض ‘فِکس’ کیے جاتے ہیں۔

پورٹ آف ایلزبتھ: پاکستان کرکٹ ٹیم کے اوپنر احمد شہزاد نے ون ڈے کیریئر کے 1000 رنز مکمل کرلیے۔ پاکستان کرکٹ ٹیم کے اوپننگ بلے باز احمد شہزاد نے جنوبی افریقہ کے خلاف ایک روزہ میچ میں شاندار بیٹنگ کی اورون ڈے کیرئیر کے 34 ویں میچ میں ایک ہزار رنز مکمل کئے۔ انہوں نے 108 گیندوں پر 8 چوکوں اور 2 چھکوں کی مدد سے کیریئر کی تیسری سنچری بھی بنائی۔

پورٹ آف ایلزبتھ: جنوبی افریقہ کیخلاف دوسرے ون ڈے میں جنید خان کی آخری اوور میں شاندار بو لنگ نے ایشیا کپ فائنل میں اعزاز چیمہ کی پرفارمنس یاد دلادی۔ 22مارچ 2012 کا دن شائقین کرکٹ کو یاد ہوگا جب ایشیا کپ کے فائنل میں بنگلہ دیش کو میچ جیتنے کیلئے آخری اوور میں نو رنز درکار تھے اور پاکستان نے اعزاز چیمہ کی شاندار بالنگ کی بدولت ہارے ہوئے میچ میں دو رنز سے کامیابی حاصل کرکے ایشیا کپ اپنے نام کیا تھا۔ پورٹ آف ایلزبتھ میں کھیلے جانے والے دوسرے ون ڈے میں ایک مرتبہ پھر قومی ٹیم اسی ڈگر پر موجود تھی جنوبی افریقہ کو جیت کیلئے چھ گیندوں پر نو رنز درکار تھے اور میچ جنوبی افریقہ کے ہاتھوں میں تھا تو جنید خان نے عمدہ بالنگ کا مظاہرہ کرتے ہوئے پاکستان کو ایک رن سے فتح دلائی۔ جنید خان نے دوسرے ون ڈے میں شاندار بالنگ کرتے ہوئے پروٹیز کیخلاف پہلی ون ڈے سیریز جیتنے میں اہم کردار ادا کیا اور ایشیا کپ دو ہزار بارہ کے فائنل کے آخری اوور میں اعزاز چیمہ کی پرفارمنس یاد دلادی۔