نئی دہلی: بھارتی سپریم کورٹ نے آئی پی ایل کی دو فرنچائزوں چنائی سپر کنگ اور راجستھان رائلز پر پابندی عائد کرنے کی تجویزدی جبکہ بی سی سی آئی کے صدر سری نواسن نے عدالت کو عہدہ چھوڑنے کی پیش کش کر دی ۔ بھارتی سپریم کورٹ نے سری نواسن کو معطل کرکے سنیل گواسکر کو عبوری صدر بنانے اور دو فرنچائزوں راجستھان رائلز اور چنائی سپر کنگز کو معطل کرنے کی تجویز دی اور کہاہے کہ دونوں فرنچائزوں کو رواں لیگ میں حصہ لینے نہ دیا جائے۔عدالت کی اس تجویز کے بعد آئی پی ایل کے رواںایڈیشن کا انعقاد کھٹائی میں پڑ گیا ہے ،جبکہ آئی پی ایل کے سابق سربراہ للیت مودی نے مطالبہ کیاہے کہ آئی پی ایل کے رواں سیزن کو معطل کر دیاجائے ۔دوسری جانب سری نواسن نے عدالت کے سامنے ہتھیار ڈالتے ہوئے پیش کش کی ہے کہ وہ عہدے سے مستعفی ہو نے کو تیار ہیں، سری نواسن نے فکسنگ معاملے کا فیصلہ آنے تک عہدے سے مستعفی ہونے کی پیش کش کر دی ہے ۔ عدالت کا کہنا ہے کہ سسری نواسن کی جگہ سنیل گواسکر یا کسی سابق کرکٹر کو بورڑ کا قائم مقام صدر بنایا جائے، سپریم کورٹ نے تمام تجاویز کے جواب کے ساتھ بی سی سی آئی کو کل طلب کرلیا ہے ، بھارتی سپریم کورٹ کل عبوری حکم جاری کرے گا، جبکہ سماعت 16اپریل تک ملتوی کر دی گئی۔

حیدرآباد: طالب علم کسی بھی قوم کے بہتر مستقبل کاقیمتی سرمایہ ہوتے ہیں اور طلبہ ہی اپنے ملک و قوم کی خوشحالی وترقی میں مددگار ثابت ہوتے ہیں ۔ان خیالات کا اظہار ایم کیوایم حیدرآباد زون کے جوائنٹ زونل انچارج راشد ممتازنے گورنمنٹ ڈگری کالج لطیف آباد میں یوم پاکستان کے حوالے سے منعقد تقریب سے خطاب کرتے ہوئے کیا۔تقریب میں کالج کے پرنسپل ،استاتذہ و طلبہ نے بڑی تعداد میں شرکت کی ۔انھوں نے مزید کہاکہ علم کی دولت سے مالا مال افراد ہی اپنے وطن کو ترقی کی راہ پر گامزن کرسکتے ہیں اور علم سے دوری ملک و اقوام کو اندھیروں کی جانب دھکیل دیتی ہے ۔انھوں نے کہاکہ ہمیں اپنے ملک سے انتہا پسندی اور فرقہ واریت کے خاتمے کے لیے ملک کے کونے کونے میں علم کی شمع روشن کرنی ہوگی تاکہ ہمارے ملک سے دہشت گردی کا خاتمہ ہوسکے ۔بعدازیں انھوں نے یوم پاکستان کے حوالے سے منعقد ہونے والے مختلف مقابلوں میں کامیاب ہونے والے طلبہ میں انعامات بھی تقسیم کئے ۔

حیدرآباد: محکمہ کھیل و امور نوجوانان کی جانب سے کتھڑ تعلقہ حیدرآباد میں ملاکھڑا منعقد کیا گیا ،جس میں 50 کے قریب پہلوانوں نے حصہ لیا ۔ پہلے جوڑ میں ٹنڈو محمد خان کے پہلوان غلام مصطفی نارو نے حیدرآباد کے پہلوان فدا حسین ملاح کو شکست دے کر مقابلہ جیتا ۔ دوسرے جوڑ میںحیدرآباد کے پہلوان گلاب شاہ نے ٹنڈوالہیار کے پہلوان عبدالرحمن پنھور کو شکست دے کر مقابلہ جیتا ۔ تیسرے جوڑ میںحیدرآباد کے پہلوان بختیارعلی شاہ نے ٹنڈوالہیارکے پہلوان عبدلجبار پنہیار کو شکست دے دی۔ اس ملاکھڑے کے مہمان خاص رئیس وفادار چھلگری اور بیر برفت نے جیتنے والے پہلوانوں میں نقد رقم انعام میں تقسیم کیا، اس موقع پر گاﺅں کے معتبرین اور خاصی تعداد میں تماشائی موجود تھے۔

حیدرآباد: جمعیت علمائے پاکستان ( اویس نورانی گروپ) کے سکریٹری جنرل شاہ اویس نورانی نے کہا ہے کہ طالبان اور حکومت کے درمیان مذاکرات کامیاب ہو نے چاہئیں ‘ آپریشن کا نتیجہ ہمیشہ خراب نکلا ہے ۔ پریٹ آباد حیدرآباد میں اپنی جماعت کے صوبائی اجلاس سے خطاب کے بعد پریس کانفرنس سے خطاب کرتے ہوئے شاہ اویس نورانی نے کہاکہ ہم حکومت اور طالبان کے درمیان مذاکرات کی حمایت کرتے ہیں اس مرتبہ دونوں طرف سے سنجیدگی دکھا ئی جارہی ہے قوم کی نظریں مذاکرات کی کامیابی پر ہے تاکہ جلدا ز جلد ملک میں امن قائم ہو ،انھوں نے کہاکہ افہام و تفہیم سے مسئلہ کا حل نکلنا چاہیئے بندوق کی نوک پر شریعت نافذ نہیں کی جاسکتی اور نہ ہی آپریشن سے کبھی اچھا نتیجہ نکلا ہے ،انھوں نے کہاکہ ملک نازک حالات سے گزر رہا ہے بالخصوص سندھ کی حالت تشویشناک ہے جہاں عوام کی جان و مال کی حفاظت میں حکومت ناکام نظر آتی ہے تھر میں جو کچھ حالت ہوئی ہے وہ دنیا کے سامنے ہے کرپشن و بدانتظامی نے وہاں قحط کی صورتحال پیدا کی وہاں اب بھی فنڈز کا ناجائز استعمال ہورہا ہے، اگروہاں فلاحی تنظیمیں نہ ہوں تو حالات مزید خراب ہو جائیں سیلانی ‘ چھیپا‘ ایدھی اور دوسرے فلاحی اداروں نے تھر کے عوام کو ریلیف فراہم کیا ہے ،انھوں نے کہاکہ پیپلز پارٹی کو مرکز اور صوبہ سندھ میں کئی مرتبہ حکمرانی کا حق ملاہے ،سندھ میں تو یہ مسلسل کئی برسوں سے اقتدار میں ہیں لیکن عوام کو صاف پانی نہیں دے سکے ،عالمی اداروں سے ملا فنڈ بھی یہ کھا گئے انھوں نے حیدرآباد شہر کی حالت پر بھی افسوس کا اظہار کیا اور کہاکہ جو اس شہر کے سیاسی ٹھیکیدار ہیں انھوں نے مسائل کے سوا حیدرآبادکے عوام کو کچھ نہیں دیا انھو نے کہا کہ جے یو پی کو میرے والد نے منظم کیا لیکن کچھ لوگوں نے اپنی جماعت الگ بنالی ہے جبکہ مجلس عاملہ اور شوریٰ کے اراکین کی اکثریت ہمارے ساتھ ہے ،انھوں نے کہاکہ ہمارا 29مارچ کو کراچی میں ہو نے والے جلسہ سے کوئی تعلق نہیں ہے، انھوں نے کہاکہ ہمارے دروازے سب پر کھلے ہیں وہ آئیں تو دوبارہ شامل ہو سکتے ہیں ،نھوں نے کہاکہ آج ہمارا صوبائی سطح کا اجلاس ہوا ہے جس میں تنظیم سازی پر زور دیا گیا ہے ہم رابطہ عوام سے قبل اپنے تنظیمی ڈھانچہ کو مضبوط بنانا چاہتے ہیں،پریس کانفرنس میں جے یو پی کے صوبائی صدر مفتی ابراہیم ‘ کرامت راجپوت ‘ ابراہیم شیخ اور دیگر بھی موجود تھے ۔