لندن: برطانوی اسٹارالینا بالٹچا نے انجری مسائل کے سبب ٹینس سے ریٹائرمنٹ کا اعلان کر دیا، 16 برس پر محیط انٹرنیشنل کیریئر میں وہ دنیا کی ٹاپ 50 پلیئرز میں شامل رہنے کے ساتھ برطانیہ کی نمبر ون کھلاڑی بھی بنیں۔ بالٹچا نے 1997 میں ٹینس ورلڈ میں قدم رکھا، ایڈنبرا میں آئی ٹی ایف ویمنز سرکٹ میں اپنے پہلے ایونٹ کے ساتھ وہ پروفیشنل کھلاڑیوں میں شامل ہوگئیں۔ وقت کے ساتھ ساتھ ان کے کھیل میں بہتری آتی گئی اور 2009 میں ٹاپ 100 میں شمولیت کے بعد وہ 2010 میں ٹاپ 50 میں ترقی پاگئیں۔ بالٹچا 2010 میں ممفس، ایسٹ بورن اور استنبول اور 2011میں ڈلاس کے ڈبلیو ٹی اے ایونٹس کے کوارٹر فائنلز تک پہنچیں۔ 2010 میں یو ایس اوپن کے بعد وہ اپنے کیریئر کے سب سے بلند رتبے49 ویں پوزیشن پر پہنچ گئی تھیں۔ چند ماہ کے دوران ان کی ٹاپ 10 فتوحات میں انڈین ویلز پر نمبر 10لینا، ایسٹ بورن میں بھی نمبر 10 لینا اور استنبول میں نمبر 8 فرانسیسکا شیوانے پر کامیابیاں شامل ہیں۔

نیویارک: نیشنل باسکٹ بال چیمپئن شپ میں ڈیٹرائٹ پسٹنز نے نیویارک نکس کو شکست دے دی۔امریکی شہر نیویارک میں جاری باسکٹ بال کے نیشنل مقابلوں میں ڈیٹرائٹ پسٹنز نے ایک سخت مقابلے میں 86 کے مقابلے میں 92پوائنٹس سے فتح سمیٹی۔ فاتح ٹیم کے روڈنی نے 15 پوانٹس سکور کرتے ہوئے اپنی ٹیم کی فتح کو یقینی بنایا۔اس جیت کے ساتھ ہی فاتح ٹیم کی پوائنٹس ٹیبل پر پوزیشن بھی مستحکم ہو گئی ہے۔

اسلام آباد: پاکستان اولمپک ایسوسی ایشن کے تنازعہ پر سینیٹ کی تحقیقاتی کمیٹی نے تمام اسپورٹس فیڈریشنز کے انتخابات روکنے کا حکم جاری کردیا ۔ذرائع کے مطابق سینیٹ کی تحقیقاتی کمیٹی نے تمام اسپورٹس فیڈریشنز کو خط لکھا ہے کہ وہ پی او اے کا معاملہ حل ہونے تک اپنے انتخابات نہیں کروا سکتے، پاکستان ہاکی فیڈریشن کے انتخابات جاری ہیں لیکن پی ایچ ایف ذرائع کا کہنا ہے کہ سینیٹ کی تحقیقاتی کمیٹی کے پاس ان کے انتخابات رکوانے کا کوئی اختیار نہیں۔ انتخابات مقررہ شیڈول کے مطابق جاری رہیں گے۔

لاہور: قومی سلیکشن کمیٹی کے چیئرمین اظہرخان کا کہنا ہے کہ ٹیم مینجمنٹ نے کوئی نیا کھلاڑی طلب نہیں کیا۔ کوئی کھلاڑی ٹی ٹوئنٹی سیریز کیلئے جنوبی افریقہ نہیں جارہا۔ چیف سلیکٹر اظہرخان نے بتایا کہ دورہ جنوبی افریقہ میں ٹورسلیکشن کمیٹی مکمل با اختیار ہے۔ کپتان محمد حفیظ اور مصباح الحق،کوچ ڈیوواٹمور اور منیجر معین خان پرمشتمل سلیکشن کمیٹی پلیئنگ الیون کا انتخاب مشاورت سے کرتی ہے۔ انہیں اس کام کے لیے سلیکشن کمیٹی سے مشورے کی ضرورت نہیں۔انہوں نے کہا کہ اگر ٹیم مینجمنٹ نے کسی کھلاڑی کو طلب کیا تو غور کیا جائے گا۔ذرائع کے مطابق آل راونڈرز عبدالرزاق اور شعیب ملک کے ان فٹ ہونے کے بعد مصباح الحق کو ٹی ٹوئنٹی اسکواڈ میں شامل کرنے پر غور کیا جارہا ہے۔

کراچی: چوتھی قومی رینکنگ اسنوکر چیمپئن شپ کے پہلے روز دو اپ سیٹ ہوگئے، ورلڈ چیمپئن محمد آصف اور قومی چیمپئن حمزہ اکبر کو شکست کا سامنا کرنا پڑا۔ کراچی جمخانہ میں شروع ہونے والے ایونٹ کا آغاز ہی حران کن نتائج سے ہوا۔ پنجاب کے بابر مسیح نے عالمی چیمپئن محمد آصف کو دلچسپ مقابلے کے بعد تین کے مقابلے میں چار فریم سے شکست دی۔ دو فریم میں خسارے کے باوجود بابر مسیح نے آصف کو ہرایا۔ سندھ کے خرم اغا نے قومی چیمپئن حمزہ اکبرکو دو چار دو سے آوٹ کلاس کیا۔ خرم نے آخری فریم میں تہتر کا بریک بھی کھیلا۔ منگل کو دیگر میچوں میں فرحان نور، اسجد اقبال ، شاہد آفتاب، محمد سجاد اورعبدالستارنے کامیابی سمیٹی۔