کراچی (پی پی آئی) انٹر بینک مارکیٹ اور اوپن مارکیٹ میں ڈالر کی قیمت میں بھاری اضافہ ہواہے جس کا اثر براہ راست عوام پر مہنگائی کی صورت میں آئے گا۔پی پی آئی کے مطابق انٹر بینک مارکیٹ میں ڈالر کی قیمت میں 3 روپے 26 پیسے اضافہ ہواہے جس کے بعد ڈالر 291 روپے 75 پیسے پر ٹریڈ کر رہاہے جبکہ اوپن مارکیٹ میں ڈالر ڈھائی روپے مہنگا ہونے کے بعد 300 روپے کی حد عبور کر گیاہے۔معاشی ماہرین کا کہناہے کہ نگران وزیراعظم نے چارج سنبھال لیاہے اور اب وزیر خزانہ کی تعیناتی کو لے کر مارکیٹ میں چہ مگوئیاں ہیں کہ نئے وزیر خزانہ آ کر کیا پالیسی اپناتے ہیں جس کے باعث ڈالر دباو کا شکار ہے جبکہ بین الاقوامی سطح پر تیل کی قیمت میں بھی اضافہ ہواہے جس سے اب پاکستان کو زیادہ ڈالر کی ادائیگی کرنا ہو گی۔

 کراچی (پی پی آئی)پاکستان پریس فاؤنڈیشن نے”پاکستان انتخابی رپورٹنگ فیلوشپ”کے لیے درخواستیں طلب کی ہیں۔ فیلوشپ پروگرام کا مقصد  میڈیا پروفیشنلز کی استعداد کار میں اضافے کے ذریعے پاکستان میں آزاد، اخلاق پر مبنی، اور  احتساب کرنے والے میڈٰیا کو فروغ دینا ہے فیلوشپ کے اہم نکات مندرجہ ذیل ہیں مضامین کی تیاری میں تعاون کے لیے فیلوشپ کی رقم 72 ہزار روپے تک ہوگی۔پی پی آئی کے مطابق پاکستان پریس فاؤنڈیشن کی سینئر پروجیکٹ کوآرڈینیٹر کی فلک ناز نے  بتایا کہ صحافیوں کی حفاظت کے متعلق صلاحیت سازی پر منعقد ہونے والی  دو انفرادی ورکشاپس میں شرکت -انتخابی معلومات کے بارے میں ایک آن لائن لیکچر میں شرکت۔ انتخابی رپورٹنگ پر دو ماہانہ ورچوئل نیوز رومز میں شرکت۔ الیکشن سے متعلق حساس مو ضوعات پر چار کہانیاں تیار کرنا -ادارتی اور تکنیکی مدد۔ ذاتی تربیت میں شرکت کے لیے سفری اخراجات اور پروڈکشن  میں تعاون کے لیے اخراجات منتظمین ادا کریں گے منتخب شرکا ایک سینئر صحافی کی نگرانی میں کام کریں گے جو فیلوشپ کی مدت کے دوران فیلوشپ ایڈیٹر کے طور پر کام کریں گے۔ فیلوشپ پروگرام (اگست 2023-اکتوبر 2024) کے دوران، ہر فیلو میڈیا اداروں میں اشاعت یا نشریات  کے لیے   انتخابات سے پہلے اور بعد  کل چار کہانیاں تیار کرے گا یا کرے گی۔جو صحافی کم از کم تین سال کا تجربہ اور عزم رکھتے ہوں اور تحقیقاتی رپورٹنگ خاص طور پر انتخابی کوریج میں دلچسپی کو درخواست دینے کی ترغیب دی جاتی ہے۔  پاکستان کے تمام صوبوں اور علاقوں کے صحافیوں، بلخصوص اقلیتوں  اور پسماندہ طبقات  سے تعلق رکھنے والی خواتین صحافیوں کو درخواست دینے کی ترغیب دی جاتی ہے۔ درخواست دہندگان کو درج ذیل معلومات بھیجنا  ضروری  ہیں فیلوشپ درخواست فارم -پریس کارڈ یا ملازمت کے خط کی کاپی -ریزیومے/سی وی -پچھلے بارہ مہینوں کے دوران شائع یا نشر ہونے والے کم از کم تین مضامین کے لنکس یا تراشے۔انتخابات کے حوالے سے کہانیوں کے چار اسٹوری آئیڈیاز جن کی آپ فیلوشپ کے دوران رپورٹ کریں گے۔درخواستیں  [email protected] پر بھیجی جائیں آخری تاریخ 20 اگست 2023 ہے۔مقررہ تاریخ کے بعد موصول ہونے والی درخواستوں پر غور نہیں کیا جائے گا۔

 اسلام آباد (پی پی آئی)سابق صدر جنرل ضیاالحق و دیگر کی برسی جمعرات 17اگست کو منائی جائے گی۔پی پی آئی کے مطابق ملک بھر سے شہید ضیاالحق فاونڈیشن کے وفود شہید ضیاالحق کی برسی میں شرکت کیلئے اسلام آباد پہنچیں گے۔۔

کراچی (پی پی آئی) مہنگائی، بے روزگاری میں روز بروز اضافہ اورغیر یقینی معاشی و سیاسی صورتحال سے پریشان افراد ملک چھوڑکردیار غیر میں کمانے کا فیصلہ کر رہے ہیں یہی سبب ہے کہ ان دنوں پاسپورٹ دفاتر پربے پناہ رش  دیکھا جا رہا ہے اور پاسپورٹ ڈیلیوری تاخیر کا شکار ہوگئی، پی آئی کے مطابق ن لائن پاسپورٹ بنوانے کی سہولت کے باوجود  پاسپورٹ دفاتر پر رش بڑھ گیاہے،بیرون ملک جانے والوں معتمرین، ایران،عراق وشام کے زائرین نیز  ملازمت اور بیرون ملک تعلیم کے لئے جانے والوں کو  بھی مشکلات کا سامنا ہے۔ذرائع کے مطابق غیر معمولی رش کے باعث پاسپورٹ کی فراہمی/ڈیلیوری ایک ماہ سے زائد کی تاخیر کا شکار ہے،جس وجہ سے پاسپورٹ بنوانے والوں کی تعداد میں روزانہ کی بنیاد پر غیر معمولی اضافہ ہوتا جارہا ہے۔