اسلام آباد: سپریم کورٹ نے چیئرمین پی سی بی ذکاءاشرف کی بحالی کے معاملے پر سماعت جمعہ تک ملتوی کردی ۔عدالت عظمی کے 2 رکنی بینچ کے روبرو حکومتی وکیل عاصمہ جہانگیر نے دلائل دیتے ہوئے کہا کہ اسلام آباد ہائی کورٹ نے صرف ذکاءاشرف کو بحال کیا، عبوری کمیٹی کے ایس آر او کو معطل نہیں کیا۔ججز نے کہا کہ عبوری کمیٹیاں صرف خلاءپر کرنے کیلئے بنائی جاتی ہیں، ہائیکورٹ کے فیصلے کے بعد عبوری کمیٹیاں خود بخود ختم ہوگئیں۔عاصمہ جہانگیر کا کہنا تھا کہ ذکاءاشرف کی تعیناتی بھی ایس آر او کے تحت ہوئی تھی، ایسا مان لیا جائے تو چیئرمین پی سی بی کی تعیناتی بھی غیر قانونی ہو جائے گی۔جسٹس ثاقب نثار نے کہا کہ دیکھنا ہوگا کہ ان ایس آر اوز کی کیا اہمیت ہے، آئندہ سماعت پر بتائیں کہ یہ ایس آر اوز کن قوانین کے تحت جاری ہوئے۔عاصمہ جہانگیر کا کہنا تھا کہ وفاقی حکومت کے پاس اختیار ہے کہ وہ چیئرمین پی سی بی کو ہٹا سکے، جسٹس ثاقب نثار نے کہا کہ حکومت کے پاس اختیار ہے تو اپیل کیوں دائر کی؟ہدایات لے لیں کہ اپیل کی پیروی کرنی ہے یا اختیار استعمال کرنا ہے، کیس کی مزید سماعت جمعہ تک ملتوی کردی گئی ۔

کراچی: خیبر پختونخواہ کی حکومت نے 25جنوری کو پشاور میں کرکٹ ٹیلنٹ کی تلاش کی ذمہ داری سابق کپتان شاہد خان آفریدی کو سونپ دی ۔ پشاور میں اوپن ٹرائلز کے ذریعے باصلاحیت کرکٹرز کا انتخاب کرکے انہیں تربیت دی جائے گی ۔ عمران خان نے خصوصی طور پر فون کرکے شاہد آفریدی کو یہ ذمہ داری سونپی ۔

لاہور: پاکستان کرکٹ بورڈ نے اختیارات سے تجاوز کرنے اور قوانین کے غلط اطلاق پر میچ ریفری الیاس خان کو شوکاز نوٹس جاری کرنے کا فیصلہ کرلیا ۔ الیاس خان نے پورٹ قاسم کے وکٹ کیپر محمد سلمان پر لیول تھری کے تحت کاروائی کرتے ہوئے ان پر تین میچوں کی پابندی لگائی تھی ،جس پر محمد سلمان نے پی سی بی سے رابطہ کیا ہے ۔

کراچی: سندھ گیمز کے آرگنائزنگ کمیٹی کا اجلاس نثار احمد کھوڑو کی صدارت میں 29جنوری کو سندھ اسمبلی کی بلڈنگ میں ہوگا ۔ اجلا س میں ڈویژنل اولمپک ایسوسی ایشنز کراچی ،حیدرآباد ،سکھر ،میرپور خاص اور لاڑکانہ کے صدور اور سیکریٹریز کو مدعو کیا گیا ہے ۔ اجلاس میں سندھ گیمز کی تاریخوں کا اعلان ،بجٹ کی منظوری کے علاوہ آرگنائزنگ کمیٹی بھی تشکیل دی جائے گی ۔