لندن: برطانوی اخبار نے پاکستانی نڑاد باکسر عامر خان اور برطانوی ماڈل کے درمیان تعلقات کا انکشاف کیا۔ عامر کی بیوی فریال مخدوم نے خبر کو بے بنیاد قرار دے دیا۔ برطانوی اخبار ”دی سن” نے باکسر عامر خان کی ماڈل کریسٹنی کے ساتھ مبینہ تصویر شائع کی ہے اور دعویٰ کیا کہ عامر خان کئی دنوں سے برطانوی ماڈل کے فلیٹ میں ہیں۔ برطانوی اخبار کے مطابق عامر خان کی خفیہ ویڈیو بھی بنا لی گئی ہے۔ دوسری جانب امریکا میں مقیم عامر کی اہلیہ فریال مخدوم نے شوہر کے برطانوی ماڈل کے ساتھ تعلقات کو افواہ قرار دے دیا۔ اپنے ٹوئٹر پیغام میں انہوں نے عامر کی ماڈل کریسٹنی کے ساتھ مبینہ تصویر پر افسوس کا اظہار کیا۔ فریال نے اپنے پیغام میں لکھا کہ کسی کو کچھ ثابت کرنے کی ضرورت نہیں ہے۔

کراچی: ڈی اآر ایس پاکستانی کرکٹ ٹیم کیلئے درد سر بن گیا، نفاذ کو چار سال سے زائد وقت گذرنے کے باوجود اب تک پلیئرز اس طریقہ کار سے پوری طرح فائدہ اٹھانے میں ناکام رہے ہیں۔ سری لنکا سے حالیہ ٹیسٹ سیریز میں 19 میں سے 18 ریویوز ضائع کیے گئے، کپتان مصباح الحق کو اس پر خاصی تشویش ہے، انھوں نے کہا کہ اگر امپائر کے فیصلے کو چیلنج کرنے کے اس طریقہ کار کو نہ سمجھا گیا تو جس طرح سری لنکا سے سیریز میں ٹیم نے نقصان اٹھایا آئندہ بھی ایسا ہوتا رہے گا۔ انھوں نے کہا کہ ریویو اسی وقت لیا جاتا ہے جب آپ کو سو فیصد یقین ہو کہ امپائر کا فیصلہ غلط تھا، تھوڑے سے بھی شک پر ایسا نہیں کرنا چاہیے کیونکہ ریویو حق میں نہیں جائے گا۔ انھوں نے کہا کہ ٹیم میٹنگز میں باقاعدگی سے اس بارے میں بات چیت ہوتی ہے لیکن مطلوبہ نتائج بر آمد نہیں ہوسکے۔ سابق کپتان وقار یونس نے مسئلے کی وجہ ناسمجھی کو قرار دیا، انھوں نے کہاکہ پاکستان نے ریویو کی ابھی تک اسٹڈی نہیں کی، گذشتہ سیریز میں یہ بات دیکھنے میں آئی کہ چونکہ ابتدائی تین بیٹسمینوں نے رنز نہیں کیے تھے لہٰذا ریویو لینے کے معاملے میں ان کی خود غرضی دکھائی دی۔ اظہر علی نے سلپ میں کیچ ہونے کا فیصلہ بھی چیلنج کیا، یہ غلط ہے، صرف اپنی ذات کو فائدہ پہنچانے والی سوچ نہیں ہونی چاہیے۔ وقار یونس نے مزید کہا کہ ریویو میں سب سے اہم کردار وکٹ کیپر کا ہوتا ہے، اسے ایل بی ڈبلیو کے بارے میں مکمل طور پر علم ہونا چاہیے، ذہانت کے کھیل میں امپائر کا دماغ پڑھنا بھی ضروری ہوتا ہے۔

کراچی: پاکستان کرکٹ ٹیم کے آل راﺅنڈر شاہد خان آفریدی اپنی والدہ سے منسوب ہسپتال کے تعمیری منصوبے کے فنڈز جمع کرنے کے لئے 4فروری کو امریکا روانہ ہوں گے ۔امریکی شہر ہیوسٹن میں ڈاکٹر کاشف انصاری نے امریکا میں مقیم پاکستانیوں کی مدد سے آفریدی کے لئے فنڈریزنگ ڈنر اور دیگر تقریبات کا اہتمام کیا ہے ۔

ساﺅپالو: فیفا ورلڈ کپ 2014کے میزبان ملک برازیل کی پریشانیوں میں مزید اضافہ ہوگیا ۔ ہزاروں افراد نے گزشتہ روز سڑکوں پر آکر میگا ایونٹ کے انعقاد کے خلاف احتجاج کیا ۔ مظاہرین کا کہنا تھا کہ برازیلی حکومت ورلڈ کپ کے ایونٹ پر 14بلین ڈالرز کی رقم خرچ کررہی ہے جبکہ اس رقم سے پورے ملک میں ہسپتالوں اور اسکولوں کی حالت درست کی جاسکتی ہے ۔ مظاہرین نے مطالبات پورے نہ ہونے پر دوبارہ احتجاج کرنے کا اعلان کیا ہے ۔