لاہور: ورلڈ ٹیم ٹیبل ٹینس چیمپیئن شپ کے لیے چھ رکنی پاکستانی ٹیم کا اعلان کردیا گیا۔ پاکستان ٹیبل ٹینس فیڈریشن کے صدر ایس ایم سبطین نے 28اپریل سے جاپان کے شہر ٹوکیو میں شروع ہونے والی ورلڈ ٹیم چیمپیئن شپ کے لیے سات رکنی قومی دستے کا اعلان کیا۔ ان کا کہنا تھا کہ چیمپیئن شپ میں مینزقومی چیمپیئن عاصم قریشی، سلیم عباس، فریال منہاس، خواتین قومی چیمپیئن شبنم بلال، عائشہ اقبال اور راحیلہ کاشف پاکستان کی نمائندگی کریں گی جبکہ خالد محمود ڈیلی گیٹ کی حیثیت سے جاپان جائیں گے۔ نو روزہ مقابلوں میں123 ممالک نے شرکت کی تصدیق کردی ہے

پیرس: ورلڈ ٹینس ایسو سی ایشن کی طرف سے جاری کر دہ تازہ رینکنگ میں رافیل نڈال مردوں جبکہ وومنزکی رینکنگ میں امریکا کی سرینا ولیمز بدستور پہلے نمبر براجما ن ہیں۔ڈبلیو ٹی اے کی جانب سے جاری ہونے والی نئی ٹینس رینکنگ میں ویمنز سنگلز میں رومانیہ کی سیمونا ہالیپ کیریئر میں پہلی مرتبہ دنیا کی پانچ صف اول پلیئرز میں شامل ہوگئیں، ابتدائی چار پوزیشنز میں کوئی تبدیلی رونما نہیں ہوئی اور ان پر بالترتیب سرینا ولیمز، لینا، اگنیسکا ریڈوانسکا اور وکٹوریا ایذرنیکا براجمان ہیں، سربیا کی جیلینا جینکووچ چھٹے، روسی پلیئر ماریا شراپووا ساتویں، جمہوریہ چیک کی سابق ومبلڈن چیمپئن پیٹراکیوٹوا آٹھویں ، جرمن کھلاڑی اینجلیک کیربر 9 ویں اورسارا ایرانی بدستور ٹاپ 10 کی آخری شریک بنی ہوئی ہیں۔ انڈین ویلز میںٹائٹل جیتنے والی اطالوی پلیئر فلاویا پنیٹا نے 12 ویں پوزیشن ہتھیالی۔ دوسری جانب مینز عالمی ٹینس رینکنگ میں بھی سوئس اسٹار راجر فیڈرر نئے سیزن میں پہلی مرتبہ پانچویں پوزیشن پر آگئے۔ انھیں تین درجے ترقی نے دوبارہ عروج کی جانب گامزن کیا، نڈال پہلے، جوکووچ دوسرے، اسٹینسلس واورنیکا تیسرے اور ڈیوڈ فیرر چوتھے نمبر پر موجود ہیں۔ اینڈی مرے چھٹی پوزیشن پر، جمہوریہ چیک کے ٹوماس بریڈیچ ساتویں ، امریکا کے دراز قامت پلیئر جون اسنر کو ٹاپ 10 میں آخری پوزیشن کا حقدار قرار دیا گیا ہے۔

لاہور: 61 ویں قومی سائیکلنگ چیمپیئن شپ کالاہور میں آغاز ہوگیا۔افتتاحی روز واپڈا کے سائکلسٹس چھائے رہے۔ حکومتی پی او اے کے صدر اکرم ساہی نے کہا کہ پاکستان اسپورٹس بورڈ جلد فیڈریشنز کی گرانٹ بحال کردے گا۔ لاہور کے سائیکلنگ ویلوڈرم شروع ہونے والی چار روزہ سائیکلنگ چیمپیئن شپ میں چھ کلو میٹر سپرینٹ اور چار کلو میٹر ٹیم پرسیوٹ کے ابتدائی مقابلوں میں واپڈا کے سائیکلسٹس نے میدان مار لیا جبکہ ایک کلو میٹر انفرادی ٹائم ٹرائل میں بھی واپڈا کے صابر علی فاتح اور سوئی سدرن گیس کے نور عالم رنر اپ رہے۔مہمان خصوصی حکومتی پی او اے کے صدر اکرم ساہی نے بتایا کہ ان کی کاوشوں سے جلد فیڈریشنز کو گرانٹ مل جائے گی اور ملک میں دوبارہ اسپورٹس سرگرمیاں عروج حاصل کریں گی۔ سائیکلنگ چیمپیئن شپ میں مزید تین دن جاری رہیںگی۔

سوار: ویمن ورلڈ ٹی ٹوئنٹی کے وارم اپ میچ میں انگلینڈ کی ویمن کرکٹ ٹیم نے پاکستان ویمن ٹیم کودلچسپ مقابلے کے بعد دووکٹ سے ہرادیا۔ سوار میں کھیلے گئے میچ میں قومی ویمن ٹیم نے ٹاس جیت کربیٹنگ کا فیصلہ کیا اورمقررہ اوورزمیں چھ وکٹ پر106رنزبنائے۔ کپتان ثناءمیراورندا ڈارچھتیس چھتیس رنزبناکرنمایاں رہیں۔ ڈینئیلی ہیزل نے دوکھلاڑیوں کوآﺅٹ کیا۔ ہدف کے تعاقب میں انگلینڈ کا آغازبھی اچھا نہ رہا اوراس کی ابتدائی وکٹیں جلد گرگئیں۔ انگلینڈ کو12 گیندوں پر15 رنزدرکارتھے لیکن اس نے مطلوبہ ہدف ایک گیند قبل ہی آٹھ وکٹوں کے نقصان پرحاصل کرلیا۔ لائیڈا گرین وے چونتیس رنزکیساتھ نمایاں رہیں۔ اسماویہ اقبال اورسمیہ صدیقی نے تین تین وکٹیں حاصل کیں۔ قومی ویمن ٹیم اپنا دوسرا وارم اپ میچ جمعرات کوبنگلہ دیش کیخلاف کھیلے گی۔

ڈھاکا: بھارتی کرکٹ ٹیم کے کپتان مہندرا سنگھ دھونی نے ٹی ٹوئنٹی ورلڈ کپ کے تمام ایونٹس میں کپتانی کر نے کا اعزازحاصل کرلیا۔ دھونی نے 2007ءمیں کھیلے گئے اولین ورلڈ کپ میں بھی انڈیا کی قیادت کی تھی ، اب تک کھیلے گئے پانچویں ورلڈ کپ میں بھارتی ٹیم کی کپتانی کر کے نیا ریکارڈ قائم کرلیا ہے ، ٹی ٹوئنٹی ورلڈ کپ میں اب تک انھوں نے 22میچز کھیلے ہیں جبکہ مجموعی طور پر 43ٹی ٹوئنٹی انٹرنیشنل میچز کھیل کر 772رنز بنا رکھے ہیں جن میں کوئی نصف سنچری شامل نہیں ہے ،دھونی کا ٹی ٹوئنٹی میں بڑا اسکور 48رنزناٹ آﺅٹ ہیں۔

کولمبو: سری لنکن بیٹسمین مہیلا جے وردھنے نے ٹی ٹوئنٹی انٹرنیشنل سے ریٹائرمنٹ کا اعلان کردیا۔ جے وردھنے ورلڈ ٹی ٹوئنٹی کے بعد ٹی ٹوئنٹی کرکٹ نہیں کھیلیں گے۔سابق سری لنکن کپتان کمارسنگاکارا کی ریٹائرمنٹ کے اعلان کے ایک روزبعد ایک اورکپتان مہیلا جے وردھنے نے بھی مختصرفارمیٹ کوخیرباد کہنے کا فیصلہ کرلیا۔ جے وردھنے بنگلہ دیش میں جاری ورلڈ ٹی ٹوئنٹی کے بعد ٹی ٹوئنٹی انٹرنیشنل نہیں کھیلیں گے۔ جے وردھنے 49 ٹی ٹوئنٹی میچزمیں سری لنکا کی نمائندگی کرچکے ہیں اوروہ مختصرفارمیٹ میں سب سے زیادہ تیرہ سوپینتیس رنزاسکورکرنیوالے سری لنکن بیٹسمین ہیں۔ جے وردھنے کوٹی ٹوئنٹی فارمیٹ میں سری لنکا کا سب سے بہترین بیٹسمین قراردیا جاتا ہے۔جے وردھنے دنیا کے ان چھ بیٹسمینوں میں شامل ہیں جنہیں تینوں فارمیٹس میں سنچری بنانے کا اعزازحاصل ہے۔ جے وردھنے نے ورلڈ ٹی ٹوئنٹی2012میں ٹیم کی قیادت کی اورسری لنکا کوفائنل تک پہنچایا لیکن فائنل میں ویسٹ انڈیزکے ہاتھوں شکست کے بعد وہ کپتانی سے دستبردارہوگئے تھے۔