حیدرآباد: ڈسٹرکٹ مینارٹی الائنس کی جانب سے سندھ میںاقلیتی برادری کی عبادت گاہوں پر ہونے والے حملوں کے خلاف احتجاجی ریلی نکالی گئی جس کی قیادت مینارٹی الائنس کے چیئرمین پونجوبھرماررمیش جاوریہ کر رہے تھے ۔ڈ سٹرکٹ مینارٹی الائنس کے چئیرمین کا کہنا تھا کہ کہ اقلیتی برادری کی عبادت گاہوں پر حملے سندھ میں مذہبی فسادات بھڑکانے کی ایک سازش ہے جس میں تیسری قوت ملوث ہے کوئی بھی مسلمان ایسی حرکت نہیں کر سکتا۔ ان کا مزید کہنا تھا کہ سندھ کی ہندو ایک پر امن قوم ہے۔اس موقع پر انھوں نے حکومت سے مطالبہ کر تے ہوئے کہا کہ ہماری عبادت گاہوں اوراکاروبار سمیت تمام اقلیتی برادری کو تحفظ فراہم کیا جائے ۔

حیدرآباد: سابق وزیراعظم ذوالفقار علی بھٹو کی 35 ویں برسی کی تقریب میں شرکت کے لے پاکستان پیپلز پارٹی ضلع جامشورو کی جانب سے مختلف شہروں میں کیمپس قائم کر دیئے گئے ہیں ۔ اس سلسلے میں ممبر قومی اسمبلی ،سردار ملک اسد سکندر کی صدارت میں ایک اجلاس منعقد کیا گیا جس میں شہید ذولفقار علی بھٹو کی سیاسی زندگی ، سیاسی جدوجہد ، خدمات اور قربانیوں کو مشعل راہ اور مثالی قرار دیا گیا۔ اس موقع پر گڑہی خدا بخش میں ہونیوالی تقریب میںشرکت کیلئے حکمت عملی بنائی گئی اور قافلو ںکی روانگی کے پروگرام بھی ترتیب دیئے گئے ، انتظامات کی نگرانی ممبر صوبائی اسمبلی ڈاکٹر سکندر علی شورو، فقیر داد کھوسو اور دیگر رہنماءکر رہے ہیں ۔ جبکہ کوٹری شہر میں جعفری برادری کی جانب سے بھی ذولفقار علی بھٹو کیبرسی کے سلسلے میں استقبالیہ کیمپ تین دن سے سرگرم ہے ۔دوسری جانب پاکستان پیپلز پارٹی شہید بھٹو کی جانب سے بھی المرتضیٰ ہاﺅس لاڑکانہ ذوالفقار علی بھٹو کی 35 ویں برسی کی تقریب منعقد کی گئی ۔

میرپورخاص: میر پور خاص میں تین روزہ انسداد پولیو مہم ڈپٹی کمشنرکے زیر نگرانی 14سے 16اپریل تک جاری رہے گی ۔ ڈپٹی کمشنر سید مہدی علی شاہ نے کہا کہ پولیو وائرس پورے ملک کا اہم مسئلہ ہے ، انسدادِپولیو مہم میں کسی بھی قسم کی کوتاہی ہرگز برداشت نہیں کی جائیگی ۔ان خیالات کااظہار انھوںنے انسدادِپولیو مہم کے انتظامات کا جائزہ لینے کے لیے دربارہال میںمنعقدہ ڈسٹرکٹ پولیو کمیٹی کے اجلاس کی صدارت کرتے ہوئے کیا۔اس موقع پر فوکل پرسن ڈاکٹر اشفاق نے بتایا کہ ضلعے بھر میں اب تک پولیو کا کوئی بھی کیس رجسٹر نہیں ہوا ہے ۔پیدائش سے لے کر 5سال کی عمر تک کے 271973بچوں کو پولیو سے بچاو کے قطرے پلانے کا ہدف ہے اس مقصد کیلئے 750ٹیمیں کام کررہی ہیں جس میں 566موبائل ٹیمیں،110فکسڈ پوائنٹ،74آمدورفت کے پوائنٹ شامل ہیںجبکہ مسنگ بچوں کی تعداد 3219ہے جبکہ پولیو مہم کو کامیاب بنانے کیلئے روینیو،پولیس،سوشل ویلفیئر،ڈبلیوایچ او،روٹری کلب اور دیگر ادارے مکمل تعاون کررہے ہیں۔اجلاس میں متعلقہ افسران اورعلماءکرام بھی موجود تھے۔

میرپورخاص:  جمعیت علماءاسلام میرپورخاص نے علامہ خالد محمود سومرو پر قاتلانہ حملے کی مذمت کی ہے ۔جمعیت علما اسلام میرپور خاص کے ضلعی صدر مولانا حفیظ الرحمن ،ضلعی انفارمیشن سیکریٹری مولانا ڈاکٹر محمد اکرم خان مستوئی ،مولانا عنائت اللہ قاری ،عبدالخالق اور دیگر نے ایک اجلاس میں جمعیت علماءاسلام کے صوبائی جنرل سیکریٹری علامہ خالد محمودسومرو پر قاتلانہ حملے کی شدید الفاظ میں مذمت کرتے ہوئے مطالبہ کیا کہ دہشت گردوں کو فوری طور پر گرفتار کیا جائے اور سخت سزا دی جائے ،انہوں نے کہا کہ ملک بھر میں علماءکرام کی حفاظت کے انتظامات سخت کئے جائیں اگر علماءکرام کو نقصان پہنچا تو اس کی ذمہ دار انتظامیہ پر ہو گی ۔

جوناگڑھ: کرکٹ لیجنڈسچن ٹنڈولکر کا سیاحتی دورہ جونا گڑھ محکمہ جنگلات کے آفیسروں کے لیے وبال جان بن گیا، قانون کی خلاف ورزی کرنے کے الزام میں کارروائی کے لیے درخواست دائر کر دی گئی۔ بھارتی ریاست جوناگڑھ کی تنظیم رائٹ ٹو انفارمیشن کے کارکنوں نے الیکشن کمیشن میں درخواست دائر کی ہے کہ سچن ٹنڈولکر اور اس کے بچوں کو گجرات کے سفاری میںسیاحت کے دوران جنگلات کے آفیسروں نے غیر قانونی طور پرٹنڈولکر او ر ان کی فیملی کو ایسی جگہوں تک لے گئے جہاں قانونی طور پرمنع تھا ،درخواست میں کہا گیاہے کہ ان تمام آفیسروں کے خلاف کارروائی کی جائے۔اس دورے کے دوران ٹنڈولکر ، ان کی فیملی اوردوست 15ایسی جگہوں پر گئے تھے جہاں پر شیر کسی بھی وقت حاضر ہو سکتا تھا۔

لاہور:  سابق کرکٹرز نے ورلڈ ٹی ٹوینٹی کے اہم میچ میں ویسٹ انڈیز کے ہاتھوں قومی ٹیم کی شکست پر پاکستان ٹیم میں آپریشن کلین اپ اور کرکٹرز کی سنٹرل کنٹریکٹ سمیت تمام مراعات کارکردگی سے مشروط کرنے کا مطالبہ کردیا۔ سابق چیف سلیکٹر محمد الیاس نے کہا کہ ویسٹ انڈیز کے خلاف میچ میں قومی کرکٹرز کی کارکردگی گلی کوچوں کے کرکٹرز سے بھی کم دکھائی دی۔آخری اوورز میں باولرز کی پٹائی کے بعد بلے باز کالی آندھی کے اسپینرز کے سامنے بھیگی بلی بن گئے۔اس شکست کے ذمے داروں کے خلاف آپریشن کلین اپ ہونا چاہیے۔ سابق ٹیسٹ کرکٹر علی نقوی کے مطابق پورے ورلڈ ٹی ٹوینٹی میں پاکستانی ٹیم کا کوئی گیم پلان دکھائی نہیں دیا اور سیمی فائنل کی دوڑ سے باہر ہونے کے ذمہ دار تمام کھلاڑی اور انتظامیہ ہے،ان سب کا احتساب کیا جائے۔ کرکٹرز نے میگا ایونٹ کیلئے ٹیم کی سلیکشن کو بھی غلط قرار دیا۔