میر پور خاص: آل پاکستان جمعیت العباس ویلفیئر سوسائٹی کی مرکزی مجلس عاملہ کا اجلاس میرپورخاص میں ہوا ،جس کی صدارات مرکزی صدر اسحاق عباسی نے کی ۔اجلاس میں ملک بھر سمیت بالخصوص سندھ میں برادری کو درپیش مسائل پر غور و فکر اور ان کے حل کیلئے لائے عمل طے کیا گیا ،اجلاس میں محمد یوسف عباسی کو میرپورخاص کا سینئر نائب صدر نا مزد کیاگیا،جبکہ سندھ رابطہ کمیٹی کا قیام عمل میں لاکر عثمان عامر عباسی میرپورخاص ،یونس ممتاز عباسی حیدرآباداور مختیار احمد عباسی حیدرآباد کو مقرر کر دیا گیا ۔

میرپور خاص: میر پور خاص چیمبر آف کامرس نے شہر میں شہر میں بڑھتے ہوئے جرائم کے خلاف احتجاجی تحریک چلانے کا اعلان کر دیا۔میرپورخاص چیمبرز آف کامرس نے جرائم کی بڑھتی ہوئی وارداتوں اور ڈاکو راج کے خلاف ایوان صنعت وتجارت نے میدان میںآکر احتجاجی تحریک چلانے کا اعلان کر دیا، ایوان صنعت و تجارت کے صدر مرزا اعظم بیگ نے بزنس کمیونٹی کے ہنگامی اجلاس سے خطاب کرتے ہوئے کہا کہ میرپورخاص میں اس وقت جنگل کا قانون نافذ ہو چکا ہے ،نا اہل پولیس افسران کی بدولت عوام عدم تحفظ کا شکار ہے ،اور دن دیہاڑے جرائم کی وارداتیں ہو رہی ہیں ،پولیس کی جانب سے اب تک کسی بھی واردات میں ملوث ملزمان کو گرفتار نہیں کیا گیا ہے ،انھوں نے جرائم کے خلاف احتجاجی تحریک چلانے کا اعلان کرتے ہوئے کہا کہ پہلے مرحلے کے طور پر وفاقی وزیر داخلہ ،گورنر سندھ ،وزیر اعلیٰ سندھ اور اعلیٰ پولیس افسران کو مراسلے بھیج دیئے گئے ہیں ،جس میں مقامی پولیس افسران کی ناقص کارکردگی کے حوالے سے مطلع کیا گیا ہے ،جبکہ دوسرے مرحلے میں قانون نافذ کرنے والے اداروں کی ناقص کارکردگی کے حوالے سے عوامی شعور اجاگر کرنے کے لےے شہر بھر میں احتجاج بینرز آویزاں کئے جائیں گے ، تیسرے مرحلے میں عوامی حلقوں ،سماجی ،سیاسی اور کاروباری طبقے کے ساتھ مل کر مشترکہ تحریک شروع کی جائے گی ۔

حیدرآباد: حکومت سندھ کے ادارے کھیلوں اور امور نوجوانان کی جانب سے ڈسٹرکٹ آفیسر اسپورٹس ارشاد علی مخدوم کی زیر نگرانی ٹنڈو قیصر تعلقہ حیدرآباد دیہی میں کوڈی کوڈی کا مقابلہ منعقد کیا گیا۔ پہلے میچ میں موسیٰ کھٹیان کی ٹیم نے ٹنڈو جام کی ٹیم کو 2-0سے شکست دیکر فائنل کھیلنے کا اعزاز حاصل کیا۔ فائنل میچ میں ٹنڈو قیصر کی ٹیم نے موسیٰ کھٹیان کی ٹیم کو2-0سے شکست دے کر مقابلہ اپنے نام کیا۔ اس موقعہ پر اسسٹنٹ ڈائریکٹر اسپورٹس لاڑکانہ محمد حسین مکانی مہمان خصوصی تھے انھوں نے کھلاڑیوں میں انعامات تقسیم کیے۔ اس موقع پر تماشائیوں کی بڑی تعداد نے مقابلے کو بڑے جوش سے دیکھا اور کھلاڑیوں کو داد دی۔

میر پور خاص: ایم کیو ایم کے ممبر سندھ اسمبلی ڈاکٹر ظفر کمالی نے کہا ہے کہ بجلی کی لوڈ شیڈنگ سے میرپور خاص میں کاروباری سر گرمیاں متاثر ہونے کا خدشہ ہے ۔ ڈاکٹر ظفر کمالی نے میرپور خاص میں عوامی شکایات پر کہاکہ میر پور خاص میںبجلی کی لوڈشیڈنگ کا دورانیہ 9گھنٹے سے تجاوز کرگیاہے، کاروباری سرگرمیاں شدید متاثر اور صنعتیں بند ہونے کا خدشہ ہے۔انھوں نے کہا کہ گرمی کی شدت میں اضافے کے ساتھ ہی میرپورخاص میں بجلی کی لوڈشیڈنگ کا دورانیہ بڑھا دیا گیا ہے جس سے کاروباری سرگرمیاں شدید متاثر ہورہی ہیں،جبکہ نکاسی و فراہمی آب کا کام بھی شدید متاثر ہورہا ہے۔انھوں نے کہا کہ دن بھر بجلی کی آنکھ مچولی اور پھر طویل دورانیہ کی لوڈشیڈنگ سے صنعتیں بند ہونے کا بھی خدشہ پیدا ہوگیا ہے ، طلباءو طالبات کو امتحانات کے دوران سخت مشکلات کا سامنا ہے ۔انھوں نے مزید کہا کہ حیسکو افسران کی من مانیوں کے باعث اسپتالوں میں زیر علاج مریض شدید ذہنی اذیت سے دوچار ہیں اور مختلف اسپتالوں میں بجلی کی طویل لوڈشیڈنگ کے پیش نظر آپریشن ملتوی کردیئے گئے ہیں۔انھوں نے ارباب اختیار سے مطالبہ کیا کہ میرپورخاص کے عوام کو درپیش مشکلات کا فوری نوٹس لیتے ہوئے بجلی کی لوڈشیڈنگ کا دورانیہ کم کیا جائے تاکہ عوام سکھ کا سانس لے سکیں۔