ٹوکیو: جاپان میں منعقد باکسنگ کے مقابلے میں جاپانی باکسر آکیرا یاگشی نے زبردست مقابلے کے بعد میکسیکو کے باکسر کو شکست دے دی۔جاپان کے دارالحکومت ٹوکیو میں ہونے والے باکسنگ مقابلے میں ورلڈ باکسنگ کونسل کے فلائی ویٹ چیمپئن جاپان کے اسٹار باکسر آکیرا یاگشی نے ایک شاندار مقابلے کے بعد اپنے حریف باکسر میکسیکوکے اوڈیلون زلاتا کو شکست دے کر فتح اپنے نام کی۔ اس موقع پر مقابلے میں ورلڈ باکسنگ کونسل کے چیئرمین موریشو سلیمان بھی موجو د تھے، موریشو نے مقابلے کو سپروائز کیا۔ چیلنج مقابلے میں جاپان کے باکسر آکیرا یاکشی نے مقابلے میں اپنے حریف میکسیکن باکسر اوڈیلون پر تابڑ توڑ حملے کئے اور پوائنٹس ٹیبل پر زیادہ پوائنٹ حاصل کئے۔ دونوں باکسرز نے انتہائی زبردست کھیل پیش کیا لیکن ریفریز کے فیصلے کے مطابق جاپانی باکسر اکیرا یاگشی کو مقابلے کافاتح قرار دیا گیا ۔

دبئی: آ ئی سی سی نے ٹی ٹوئنٹی کی تازہ رینکنگ جاری کر دی ، سری لنکا نے بھارت سے ورلڈ کپ کے ساتھ ساتھ پہلی پوزیشن بھی چھین لی،پاکستان تیسری پوزیشن میں پہنچ گیا۔آئی سی سی کی جانب سے جاری کردہ ٹی ٹوئنٹی رینکنگ میں سری لنکا 133 پوائنٹس کے ساتھ پہلے نمبر پر آ گیا انفرادی کار کردگی میں ویرات کوہلی نے کیرئر کی بہترین رینکنگ حاصل کر لی ۔ بھارت ایک درجہ تنزلی کے ساتھ دوسرے نمبر پرا ٓگیا۔ پاکستان کی 120 پوائنٹس کے ساتھ تیسری پوزیشن برقرار ہے۔ کھلاڑیوں کی انفرادی درجہ بندی میں آسٹریلیا کے ارون فنچ بیٹنگ میں سرفہرست ہیں، ٹی ٹوئنٹی کپ میں بہترین کھلاڑی کا اعزاز پانے والے بھارت کے ویرات کوہلی ایک درجہ ترقی کر کے دوسری پوزیشن پر پہنچ گئے ہیں، پاکستان کے احمد شہزاد تین درجے ترقی کے ساتھ آٹھویں نمبر جبکہ عمر اکمل 18 ویں پوزیشن پر پہنچ گئے۔ بھارتی بلے باز یوراج سنگھ 6 درجے تنزلی کے بعد 12ویںنمبر پر پہنچ گئے۔ بولنگ فہرست میں سعید اجمل کی تیسری پوزیشن برقرار ہے۔ ویسٹ انڈیز کے بولر سیموئل بدری پہلی اور سنیل نارائن دوسری پوزیشن پر موجود ہیں، شاہد آفریدی اور محمد حفیظ کی 9 ویں پوزیشن ہے۔ آل راونڈرز کیٹیگری میں محمد حفیظ کا پہلی پوزیشن پر قبضہ برقرار ہے شاہد آفریدی ایک درجہ بہتری کے ساتھ چوتھے نمبر پر ہیں۔

ڈھاکا: آئی سی سی نے ٹی ٹوئنٹی ورلڈ کپ 2014ءکی ٹیم آ ف دی ٹورنامنٹ کا اعلان کر دی۔ آئی سی سی ایلیٹ پینل کے ایمپائر ڈیوڈ بون کی سر براہی میں ایمپائر مارئیس ایراسموس ، سابق پاکستانی کپتان وسیم اکرم ، ناصر حسین ، آئی این بشپ اور اتھپال شیوورو پر مشتمل جیوری نے ورلڈ ٹیم مینز اور وومنز آف ٹی ٹوئنٹی 2014کا اعلان کر دیا ۔منز ٹیم آف ٹی ٹوئنٹی میںبھارتی کپتان مہندرا سنگھ دھونی کو ورلڈ الیون کا کپتان مقرر کر دیاگیا ،ٹیم میں بھارت کے چار کھلاڑی ، جنوبی افریقا اور ویسٹ انڈیز کے دو دو جبکہ آسٹریلیا ،نیدرلینڈ اور سری لنکا سے ایک ایک کھلاڑی کا انتخاب کیا گیاہے۔ خواتین ٹیم کی کپتانی انگلینڈ کی سی ایڈورڈز کو دی گئی ہے۔ دیگر کھلاڑیوں میں ورلڈ چمپیئن آسٹریلیا کی دو ، انگلینڈ کی چار،ویسٹ انڈیز کی دواور نیوزی لینڈ، بنگلہ دیش اور بھارت کی ایک کھلاڑی کو ورلڈ ٹی ٹوئنٹی ٹیم آف 2014ءمیں شامل کر لیاگیا ہے۔

سڈنی: ایشنر سیریز کے ہیرو آسٹریلوی کرکٹ ٹیم کے فاسٹ بولر مچل جونسن نے انجری سے نجات پالی، آئی پی ایل میں حصہ لینے کے لیے اجا زت دے دی گئی۔ مچل جونسن آئی پی ایل میں کنگز الیون پنجاب کی نمائندگی کر یں گے، جونسن پاﺅں میں انفیکشن کے باعث ٹی ٹوئنٹی ورلڈ کپ سے بھی باہر ہوگئے تھے ، تاہم اب انھیں آ ئی پی ایل کے ابتدائی میچ سے ہی کنگز الیون کی نمائندگی کرنے کی اجازت مل گئی ہے۔