لاہور: پاکستان بلائنڈ کرکٹ کونسل کے ڈائریکٹر میڈیا طارق اعوان نے کہا ہے کہ بلائنڈ کرکٹ ٹیم کے کپتان ذیشان عباسی کو حکومت پاکستان کی طرف سے شاندار کارکردگی پر پانچ لاکھ روپے کا چیک مل گیا ۔23مارچ کو ذیشان عباسی کو انہیں ایوارڈ ملے گا ۔پاکستان بلائنڈ کرکٹ کونسل کے چیئرمین سید سلطان شاہ نے ذیشان عباسی کو مبارکباد دیتے ہوئے اس توقع کا اظہار کیا ہے کہ مستقبل میں بھی وہ اپنی پرفارمنس کا سلسلہ برقراررکھتے ہوئے مزید کامیابیاں حاصل کریں گے ۔

ممبئی: دنیائے کرکٹ میں ایک اور ‘سیون اسٹار’ ایونٹ کا اضافہ ہونے والا ہے، 7 ممالک کے 7 کھلاڑیوں پر مشتمل سیون پی ایل مارچ سے شروع ہونے کا امکان ہے۔ ٹیموں کو متحدہ عرب امارات کی 7 ریاستوں کے ناموں پر تشکیل دیا جائے گا، ایک بھارتی سیاستدان کی ایونٹ کو سپورٹ حاصل ہے، انہی کے نئے اسپورٹس چینل پر ٹورنامنٹ نشر ہوگا۔رواں ہفتے لانچ ہونیوالے اس ایونٹ کے برانڈ ایمبیسڈر مہندرا سنگھ دھونی ہوں گے، پاکستانی پلیئرز بھی کسی ایک ریاست کے جھنڈے تلے کھیلیں گے۔اطلاعات کے مطابق مصروف ترین عالمی کرکٹ شیڈول میں ایک نئے ایونٹ کا اضافہ ہونیوالا ہے، جس کے ساتھ بھارت کے ایک بڑے سیاستدان کا تعلق بتایا جارہا ہے۔ ان کا بی سی سی آئی پر بھی کافی اثر رسوخ ہے، انہی سیاستدان کا چینل 24/7 اسپورٹس جلد ہی لانچ ہونیوالا ہے۔ ذرائع نے بتایا کہ اسی پر نیا ٹورنامنٹ بھی نشر ہوگا، یہ یو اے ای کے کارپوریٹ اداروں کے تعاون سے منعقد ہوگا، اس کی لانچنگ رواں ہفتے ہونی ہے، برانڈ ایمبیسڈر دھونی سریش رائنا کے ہمراہ دبئی جائیں گے۔ دلچسپ بات یہ ہے کہ اس ٹورنامنٹ میں خلیج کے بڑے ادارے کے ساتھ رہتی اسپورٹس بھی شریک ہے، یہ دراصل دھونی کے دوست کی فرم اور اس میں بھارتی کپتان کا بھی حصہ ہے۔ ذرائع کا کہنا ہے کہ یہ ٹورنامنٹ مارچ کے پہلے ہفتے میں شروع ہوسکتا ہے، اس میں ان پلیئرز کو شامل کیا جائے گا جو آئی پی ایل نیلامی میں فروخت نہیں ہوپائیں گے، اس ایونٹ میں سات ممالک پاکستان، بھارت، سری لنکا، جنوبی افریقہ، انگلینڈ، آسٹریلیا اور یو اے ای شامل ہوں گے، ٹیمیں عرب امارات کی سات ریاستوں کے ناموں سے کھیلیں گی، ایک تجویز یہ بھی ہے کہ سال کے اختتام پر چیمپئنز لیگ کی طرح سیون پی ایل چیمپئنز ٹرافی بھی منعقد کی جائے مگر ابھی اس منصوبے کو حتمی شکل نہیں دی گئی۔

سان یوآن: دو مرتبہ کے ورلڈ ریلی چیمپئن کارلوس سینز نے ڈاکارریلی میں مجموعی برتری حاصل کرلی۔ موٹربائیک کٹیگری میں یوآن بریڈو کی مجموعی برتری برقرارہے۔ ڈاکارریلی کے چوتھے مرحلے میں ڈرائیور زنے سان یوآن سے چیلی کے ٹوتک 657 کلومیٹر کا فاصلہ طے کیا۔ 2010 کے ڈاکار ریلی فاتح اسپین کے کارلوس سینزنے شاندار ڈرائیونگ کا مظاہرہ کرتے ہوئے پہلی پوزیشن حاصل کی۔ اس کامیابی کی بدولت سینزنانی روما کی جگہ مجموعی برتری میں سرفہرست ہوگئے۔ دفاعی چیمپئن اسٹیفن پیٹرہینسل چھ منٹ کے فرق سے دوسرے اور قطرکے ناصرالعطیہ تیسرے نمبر پر رہے۔ بائیک کٹیگری میں رائیڈرز کو352کلومیٹرکا فاصلہ طے کرنا تھا۔ اسپین کے پیڈریروگارسیا نے پہلی پوزیشن حاصل کی۔ چلی کے فرانسسکو لوپیز دوسرے اور سیریل ڈیسپریس تیسرے نمبر پر رہے۔ ریس لیڈر یوآن بریڈو نے چھٹی پوزیشن حاصل کرتے ہوئے مجموعی برتری برقرار رکھی۔

لندن: انٹرنیشنل پلیئرزیونین کے صدر نے قطر میں 2022 فٹبال ورلڈ کپ کا انعقاد سردی کے موسم میں کرانے کا خیرمقدم کیا ہے۔ فٹبال کی گورننگ باڈی فیفا کے سیکریٹری جنرل جیروم والکے نے گزشتہ روز اعلان کیا تھا کہ2022کا ورلڈ کپ جون جولائی میں نہیں کرایا جائے گا بلکہ تجویز ہے کہ ایونٹ کو پندرہ نومبر سے پندرہ جنوری کے درمیان کرایا جائے تاکہ کھلاڑیوں کو گرم موسم سے بچایا جاسکے۔ انٹرنیشنل پلیئرزیونین نے اس بیان کا خیرمقدم کیا ہے۔ پلیئرزیونین کے صدر فلپ پیاٹ کا کہنا ہے کہ ان کیلئے یہ بہت بڑی خبرہے کیونکہ پلیئرزیونین کا موقف تھا کہ کھلاڑی سخت گرمی میں ایونٹ نہیں کھیل سکتے اس لئے اسے ٹھنڈے موسم میں کرایا جائے۔ انہوں نے کہا کہ پلیئرز یونین کا اس بات سے کوئی لینا دینا نہیں کہ ورلڈ کپ کیلئے قطر کو میزبان منتخب کرنا غلط ہے یا صحیح۔ پیاٹ کا کہنا ہے کہ گرمیوں میں قطر کا درجہ حرارت 35سے 45سینٹی گریڈ کے درمیان رہتا ہے جوکھلاڑیوں کیلئے کافی گرم ہے۔

ہملٹن: ویسٹ انڈیز کرکٹ ٹیم نے نیوزی لینڈ کے خلاف پانچویں اور آخری ایک روزہ میچ میں اپنے سابقہ ریکارڈ کو بہتر بناتے ہوئے مقررہ اوورز میں 4وکٹوں پر 363رنز بنالئے ۔یہ ویسٹ انڈین ٹیم کا ون ڈے کی تاریخ میں کسی بھی ٹیم کے خلاف سب سے بڑا اسکور ہے ۔اس سے قبل ایک روزہ میچ میں 360رنز ویسٹ انڈیز کا بہترین اسکور تھا جو اس نے 1987میں سری لنکا کے خلاف بنایا تھا۔