اسلام آباد (پی پی آئی)    سرکاری ملازمین کو ادا کیے جانے والے یومیہ الاؤنس کے غلط استعمال کی روک تھام کے لیے وزارت خزانہ نے غیر ملکی دعوت ناموں پر بیرون ملک سفر کرنے والوں کی ادائیگی محدود کردی ہے۔ پی پی آئی کے مطابق اکاؤنٹنٹ جنرل پاکستان ریونیو اور ملٹری اکاؤنٹنٹ جنرل کے دفاتر کو وزرات خزانہ کی جانب سے یہ احکامات موصول ہوئے ہیں کہ تمام اکاؤنٹ افسران نئے احکامات کی روشنی میں بلز کی ادائیگی سے قبل سے مزید جانچ کریں۔ کیونکہ’سرکاری ملازمین اپنے غیر ملکی دوروں اور چھوٹے کورسز کے لیے بھی سرکاری خزانے سے یومیہ الاؤنس اور دیگر الاؤنسز حاصل کر رہے ہیں حالانکہ ان کی ادائیگی بین الاقوامی ایجنسیوں اور غیر ملکی حکومتوں کی طرف سے بھی کی جاتی ہے میزبان ممالک میں ’سرکاری مہمان‘ کا درجہ حاصل کرنے والے افسران کو ڈیلی الاؤنس کا صرف 30 فیصد حصہ دیا جاتا ہے اور ان کو بورڈنگ اور قیام فراہم کرتے ہیں۔۔

ہالہ(نامہ نگار) جماعت اسلامی پاکستان  کے امیرسراج الحق اتوار22اکتوبر سے سندھ کا دوروزہ دورہ کریں گے، پی پی آئی کے مطابق وہ 22اکتوبر کو شام سندھ کی معروف دینی درسگاہ جامعہ منصورہ ہالا میں رابطہ اخوان سندھ کے کنونشن سے خطاب اور23اکتوبر کو سندھ کے معروف آبادگار زرعی ماہراور سندھ آبادگار بورڈ کے صدر رئیس عبدالمجید نظامانی کی وفات پر ان کے گوٹھ باقر نظامانی  پہنچ کر لواحقین سے تعزیت  کریں گے۔پی پی آئی کے مطابق  ہالا، حیدرآباد،ٹنڈومحمد خان،ٹھٹہ اور کراچی میں بھی مختلف دعوتی،تنظیمی عوامی اجتماعات سے خطاب اور میڈیا سے بات چیت  بھی  ان کے شیڈول میں شامل ہے۔محمد حسین محنتی ودیگررہنما بھی انکے ساتھ ہوں گے۔

مظفر آباد/ آزاد کشمیر(پی پی آئی) آزاد کشمیرالیکشن کمیشن نے  میونسپل کمیٹی پلندری ضلع سدھنوتی میں چیئرمین بلدیہ کیخلاف تحریک عدم اعتماد کی کامیابی کے بعد خالی نشست پر ضمنی الیکشن کی پولنگ 2نومبر کو ہو گی۔ترجمان آزاد کشمیر الیکشن کمیشن کے مطابق کاغذات نامزدگی 21 سے 25اکتوبر تک داخل کروائے جا سکیں گے،پی پی آئی کے مطابق جانچ پڑتال 25اکتوبر کو ہوگی، اہل امیدوار وں کی فہرست 25اکتوبر کو آویزاں ہو گی، مستردگی کیخلاف اپیل 25اور 26اکتو تک کی جا سکے گی، اپیلوں کی سماعت اور فیصلے 27اکتوبر کو ہونگے، الیکشن سے دستبرداری کی آخری تاریخ 28اکتوبر ہے، امیدوار وں کی حتمی فہرست 28اکتوبر کو آوایزاں اور پولنگ 2نومبر کو ہو گی۔

کراچی (پی پی آئی) دادو میں قتل کئے گئے تین افراد غلام سرور چانڈیو و دیگر کے ورثاء نے کراچی پریس کلب پر احتجاج کرتے ہوئے الزام لگایا ہے کہ ان تینوں افراد کو سابق وزیر نادر مگسی کے ایماء پر قتل کیا گیا ہے۔پی پی آئی کے مطابق مقتولین کے ورثاء نیاز حسین و دیگر نے کہا کہ بااثر افراد کے دباؤ پر مقامی پولیس بھی اصل قاتلوں کو گرفتار کرنے سے ہچکچا رہی ہے اور ورثاء حصول انصاف میں در بدر کی ٹھوکریں کھانے پر مجبور ہیں اور قاتلوں کی جانب سے دھمکیاں ملنے پر خوفزدہ ہیں ہم پر دباؤ ڈالا جارہا ہے کہ کیس کی پیروی نہ کی جائے۔نیاز حسین نے بتایا کہ پانچ سالوں کے ہمارے گھر کے تین افراد کو قتل کیا جاچکاہے 2017 میں ہمارے دو افراد جبکہ 25 ستمبر 2023 کو ہمارے 50 سالہ بزرگ غلام سرور چانڈیوولد غلام محمد چانڈیو کو قتل کردیا گیا پولیس با اثر شخصیات کے کہنے پرملزمان کو گرفتار نہیں کررہی۔ انہوں نے نگراں وزیر اعلیٰ سندھ، آئی جی سندھ، ڈی آئی جی دادو، سے اپیل کی کہ ہماری مدعیت میں FIR درج کی جائے اور کیس کی غیر جانبدارانہ تحقیقات کراکے ملزمان کو سزائیں دی جائیں اور ہمیں انصاف و تحفظ فراہم کیا جائے۔ ا نیاز حسین اور ان کے ساتھ موجود خواتین ریشماں، صائمہ نے صحافیوں کو بتایا کہ پولیس اور انتظامیہ کی جانبداری کے باعث ہمارے اہل خانہ کے جان و مال محفوظ نہیں ہم عدم تحفظ کا شکار ہیں ہماری چیف جسٹس آف پاکستان، نگراں وزیر اعظم، نگراں وزیر اعلیٰ سندھ، آئی جی سندھ، ڈی آئی جی دادو، ایس ایس پی دادو سے اپیل ہے کہ ہماری جان و مال کو تحفظ فراہم کیا جائے ہماری مدعیت میں FIR درج کرتے ہوئے جے آئی ٹی تشکیل دی جائے اور اصل ملزمان کو قانون کے کٹہرے میں لاکر ہمارے ساتھ انصاف کیا جائے۔