کراچی: قومی کرکٹ ٹیم کے سابق کپتان راشد لطیف کا کہنا ہے کہ بگ تھری منصوبہ اگر فائدہ مند ہے تو پاکستان حمایت کرے۔ اگر منصوبہ سود مند نہیں توپاکستان سری لنکا اور جنوبی افریقہ کے ساتھ مل کر آئی سی سی ایونٹ کا بائیکاٹ کردے۔ ایک انٹرویو کے دوران راشد لطیف کا کہنا تھا کہ پاکستان کرکٹ بورڈ کو بگ تھری مسودے پراسی صورت میں دستخط کرنے چاہئیں جب یہ منصوبہ پاکستانی کرکٹ کے لیے فائدہ مند ہو۔ اگر منصوبہ پاکستان کے مفاد میں نہیں ہے توسری لنکا اور جنوبی افریقہ کے ساتھ مشاورت کے بعد آئی سی سی کے تمام ایونٹس سے بائیکاٹ کر دینا چاہیے۔ راشد لطیف کا مزید کہنا تھا کہ پاکستان ٹیم دنیا کی ایک اہم ترین ٹیم ہے جس کا بگ تھری کوبھی بخوبی اندازہ ہے۔ سابق کپتان کا کہنا تھا کہ سری نواسن کی پاکستان کے ساتھ کھیلنے کی پیشکش پروہ یقین نہیں رکھتے کیونکہ دونوں ملکوں کے کرکٹ روابط کی بحالی بورڈز کے نہیں بلکہ اسٹیبلشمنٹ کے ہاتھ میں ہے۔

ہرارے: زمبابوین ڈومیسٹک کرکٹ لیگ کا آغاز 10فروری سے ہوگا ۔زمبابوین کرکٹرز نے معاوضوں کی ادائیگی کے تنازعے پر دو ماہ سے ہڑتال کی ہوئی تھی ۔ بورڈ نے کھلاڑیوں کو یقین دہانی کروائی ہے کہ ایونٹ کے افتتاحی روز تنخواہوں سمیت تمام واجبات ادا کردیے جائیں گے ۔

سڈنی: آسٹریلین ڈومیسٹک کرکٹ ٹیم پرتھ اسکارچرز کے اوپننگ بلے باز کریگ سیمنز نے بگ بیش لیگ میں دوسری سنچری داغ دی ۔ یہ رواں ٹورنامنٹ کی دوسری سنچری ہے اور دونوں سنچریاں بنانے کااعزاز سیمنز کے پاس ہے ۔ سیمنز نے اس سے قبل اسٹرائیکرز کے خلاف 102رنز کی اننگز کھیلی تھی ۔ سیمنز نے ٹی ٹوئنٹی کی ایک اننگز میں زیادہ چھکوں کا کرس گیل کا ریکارڈ بھی برابر کردیا۔ گیل نے 2011کے سیزن کے دوران اسٹرائیکرز کے خلاف میچ میں 11چھکے لگائے تھے ۔ سڈنی سکسرز کے خلاف میچ میں سیمنز 112رنز بناکر آﺅٹ ہوئے ۔سیمنز کی اننگز میں 11چھکے اور 4چوکے شامل ہیں ۔

ممبئی: انگلش بیٹسمین کیون پیٹرسن کی اچانک ریٹائرمنٹ کے بعد آئی پی ایل میں شامل کنگز الیون پنجاب کھلاڑی کو ٹیم میں شامل کرنے کے لئے کوششیں شروع کردیں ۔کیون پیٹرسن کو دورہ ویسٹ انڈیز اور ٹی ٹوئنٹی ورلڈ کپ کے لئے انگلش ٹیم میں شامل نہیں کیا گیا جس کی وجہ سے انہوں نے انٹرنیشنل کرکٹ چھوڑنے کافیصلہ کیا۔کنگز الیون پنجاب کے ہیڈ آف کرکٹ آپریشنز اشنت سرکاریہ کا کہنا ہے کہ ہے کہ کیون پیٹرسن ایک باصلاحیت کھلاڑی ہیں اور ہم بولی میں ان کو زیادہ سے زیادہ رقم کے عوض خریدنے کی کوشش کریں گے ۔انہوں نے کہا کہ پیٹرسن کی ریٹائرمنٹ آئی پی ایل کی لگنے والی بولی کا ماحول بدل کر رکھ دے گی ۔

دبئی: دبئی انٹرنیشنل سائیکل ریس کا دوسرا مرحلہ جرمنی کے مارسیل کیٹل نے جیت لیا۔ ریس میں دنیا بھر سے 127کھلاڑی اور 16ٹیمیں حصہ لے رہی ہیں ۔ ریس کا پہلا مرحلہ امریکی سائیکلسٹ ٹیلر فینی نے جیتا اور دوسرے مرحلے میں جرمنی کے مارسیل کیٹل نے میدان مار لیا ۔

نیویارک: برطانوی باکسر عامر خان اور امریکی باکسر فلائیڈ مے ویدر کا 3مئی کو لاس ویگاس میں ہونے والے مقابلے پر شکوک وشبہات بڑھ گئے۔ اپنے باکسنگ کیرئیر میں ناقابل شکست رہنے والے مے ویدر نے اپنے مداحوں سے پوچھا ہے کہ عامر خان کے ساتھ باکسنگ رنگ میں اتریں یا ارجنٹائن کے باکسر مارکوس میڈانا کے ساتھ مقابلہ کریں ۔