لاہور)پی پی آ ئی )پاکستان ویمنز ایمرجنگ کیمپ کے لیے 28 کھلاڑیوں کے ناموں کا اعلان کردیاگیا ۔ تفصیلات کے مطابق پاکستان ویمنز ایمرجنگ کیمپ 7 سے 17 اکتوبر تک لاہور کنٹری کلب مریدکے میں ہوگا،سیریز اور ٹورنامنٹ کے شیڈول کا اعلان بعد میں کیا جائے گا،سلیکشن کمیٹی کیمپ کے اختتام پر 15 رکنی کمیٹی ٹیم کا اعلان کرے گی ۔ کیمپ کے لیے اعلان کردہ 28 کھلاڑیوں میں پانچ کھلاڑیوں میں گل فیروزہ, رامین شمیم، شوال ذوالفقار، سیدہ عروب شاہ اور طوبٰی حسن جو پہلے ہی پاکستان کی نمائندگی کرچکی ہیں ۔ سلیکٹرز نے کیمپ میں 12 بیٹرز،8 اسپنرز، 6 فاسٹ بولرز اور 2 وکٹ کیپرز کو شامل کیا ہے ۔ کھلاڑیوں میں کائنات، انوشے ناصر، ایمان فاطمہ، فرزانہ فاروق، وکٹ کیپر، فاطمہ خان، فاطمہ شاہد بٹ،فاطمہ زہرا، گل فیروزہ، گل رخ، حمنہ بلال، خدیجہ چشتی، لبنی بہرام، ماہم منظور،ماہ نور قیوم، معصومہ زہرا، نجیہہ علوی،وکٹ کیپر،نورین یعقوب، رامین شمیم، صائمہ ملک، صائقہ ریاض،شوال ذوالفقار،سیدہ عروب شاہ،تسمیہ رباب، طوبی حسن، وجیہہ منیر، وردا یوسف، یسری عامر اور زونیش عبدالستارشامل ہیں ۔

لاہور) پی پی آ ئی ) معذوری بھی علم کی راہ میں رکاوٹ نہ بن سکی، معذور طالب علم نعمان بشیر نے سپیشل ایجوکیشن بورڈ کے تحت میٹرک کے سالانہ امتحان میں پنجاب بھر میں پہلی پوزیشن حاصل کی ہے ۔ پیدائشی طور پر ٹانگوں سے معذور طالب علم نعمان بشیر 8 سال سے گورنمنٹ سپیشل ایجوکیشن سکول حافظ آباد میں زیر تعلیم ہے ۔ نعمان بشیر نے میٹرک کے سالانہ امتحان میں 1100 میں سے 758 نمبر حاصل کرکے صوبے بھر میں پہلی پوزیشن حاصل کی ہے جس پرصوبائی سیکرٹری سپیشل ایجو کیشن پنجاب صائمہ سعید اور یونیسف کے نمائندے نے نعمان بشیر اور ٹیچر عاصمہ بتول کو اعزازی سرٹیفکیٹ اور میڈل سے نوازا ۔ اس موقع پر نعمان بشیر نے بتایا کہ وہ سکول سے واپس آکر اپنے والد کے ساتھ جوتے بنانے کا کام کرتا ہے تاکہ اپنی پڑھائی کے اخراجات پورے کر سکے ۔ ہونہار طالبعلم کمپیوٹر کی تعلیم حاصل کرنے کا خواہشمند ہے اور اس کی خواہش ہے کہ وہ اعلیٰ تعلیم حاصل کر کے ملک و قوم کا نام بلند کر ے ۔

اسلام آباد پی پی آ ئی ) نگران وزیر اعظم انوار الحق کاکڑ کی جانب سے پشاور کے بعد آج کا دورہ کراچی بھی منسوخ کر دیا گیا ۔ نگران وزیر اعظم نے دورہ کراچی کا شیڈول تبدیل کر کے چاروں صوبائی دارالحکومتوں میں جانے کا فیصلہ کیا ہے، انوار الحق کاکڑ کے دوروں کے شیڈول کو حتمی شکل دی جا رہی ہے ۔ وزیر اعظم آفس کے ذراءع کے مطابق نگران وزیر اعظم انوار الحق کاکڑ امن و امان اور انسداد سمگلنگ و ذخیرہ اندوزی کی کارروائیوں پر جائزہ اجلاسوں کی صدارت کریں گے ۔

کراچی(ی پی آ ئی )سندھ ایپیکس کمیٹی کا اجلاس حساس نوعیت کے اہم فیصلوں کے بعد اختتام پذیر، کچے کے علاقے میں ڈاکوؤں کیخلاف آپریشن جاری رکھنے کا عزم ۔ تفصیلات کے مطابق آرمی چیف جنر ل سید عاصم منیر کی زیر قیادت ایپیکس کمیٹی کا اجلاس منعقد ہوا، آرمی چیف نے کراچی کا دورہ بھی کیا،اجلاس میں سیکیورٹی سے وابستہ اہم شخصیات نے شرکت کی، تمام شرکا نے نیشنل ایکشن پلان پر عمل کرنے کو یقینی بنانے کا فیصلہ کیا، اجلاس میں کچے میں ڈاکوؤں کے خلاف آپریشن پر بھی غور کیا گیا، اجلاس میں غیر قانونی تارکین وطن کے حوالے سے اہم فیصلہ کیاگیا،آئی جی سندھ نے امن و امان کی صورتحال پر شرکا کو بریفنگ دی اور متفقہ طور پر فیصلہ کیا گیا کہ کچے کے ڈاکوؤں کیخلاف آپریشن جاری رکھا جائیگا،اجلاس میں غیر قانونی تارکین وطن کے متعلق بھی بریفنگ دی گئی ۔