دبئی:انٹرنیشنل کرکٹ کونسل کے چیئرمین سری نواسن نے نیپال اور یوگنڈا کو آئی سی سی ورلڈ کرکٹ لیگ ڈویژن 2کے لیے کوالیفائی کرنے پر مبارک باد دی ۔ نیپا ل اور یوگنڈا کوالالمپور میں ہوئے ڈویژن تھری کے فائنل میں پہنچنے کے بعد ڈویژن ٹو کے کوالیفائی کرلیا تھا ،فائنل میں نیپال نے یوگنڈاکو 62رنز سے ہرادیا۔ نیپال اور یوگنڈا ڈویژن ٹو کرکٹ لیگ میں میزبان نیمیبیا ،کینیڈا،کینیا اور نیدرلینڈ کے ساتھ شامل ہوجائیں گی۔ سری نواسن نے کہا ہے کہ دونوں ٹیموں نے پچھلے میچوںمیں بہترین کارکردگی کا مظاہرہ کیا ہے اور ترقی ملنا ان کاحق تھااور یہ کارکردگی اس بات کا ثبوت ہے کہ آئی سی سی کی ایسوسی ایٹ اور ملحق ٹیموں میں معیار کی کمی نہیں ہے جس پر میں انھیں مبارک باد پیش کرتاہوں۔آئی سی سی ڈویژن ٹو میںشامل ٹیمیں ورلڈ کپ اورورلڈ کرکٹ لیگ چمپینز شپ کے لیے کولیفائی کرتی ہیں۔

برلن:جاپان کے مشہور فٹ بالر ایٹسو ٹو اچیدا جرمن کلب شالکے کے ساتھ اپنے معاہدے کی توسیع کے لیے تیار ہوگئے ہیں۔ اچیدا اور شالکے کے درمیان رواں سیزن کے اختتام پر پرانامعاہدے کی میعادختم ہوگی تاہم دونوں کے درمیان جون2018تک تین سال کے لیے تجدیدی معاہدہ ہوگا۔ 26سالہ دفاعی کھلاڑی نے کاشیما اینٹلرز سے شالکے میں شمولیت کی تھی، انھوں نے اب تک 132میچ کھیلے ہیں اور ایک گول کرنے میں بھی کامیاب ہوئے ہیں۔ اچیدا 2008سے جاپان کی قومی فٹ بال ٹیم کا مستقل رکن ہیں ،انھوں نے جاپان کے لیے 71بین الاقوامی میچ کھیلے ہیں۔شالکے جرمن فٹ بال لیگ کے رواں سیزن میں 12ویں پوزیشن پر موجود ہے۔

موناکو:انٹرنیشنل ایسو سی ایشن آف اتھلیٹکس فیڈریشن نے جمیکن آہنی اتھلیٹ ٹریوس اسمیکل کو ممنوعہ ادویات کے استعمال پر دو سال کے لیے معطل کرنے کا اعلان کردیا۔ جمیکا کے تھروور ٹریوس اسمیکل نے نے لندن اولمپک2012کے مقابلوں میں حصہ لیا تھا۔ انٹرنیشنل ایسو سی ایشن آف اتھلیٹکس کا کہنا ہے کہٹریوس اسمیکل کی سزا کا آغاز گزشتہ سال جمیکن نیشنل چمپینز شپ میں جب ٹیسٹ مثبت آیا تھا تب سے ہوگا اور اگلے سال جب تک سزا پوری نہیں ہوتی کسی بھی مقابلے میں حصہ نہیں لے سکیں گے۔جمیکن نیشنل چمپینز شپ میں ٹریوس اسمیکل سمیت کئی کھلاڑیوں کے ٹیسٹ مثبت آگئے تھے جس میں اسافا پاﺅل اور شیرون سیمپسن بھی شامل تھے، کھیلوں کی ثالثی عدالت نے پاﺅل اور سمپسن کی18ماہ کی پابندی کو کم کرکے چھے مہینے کردی تھی۔