لندن: سابق جنوبی افریقن کوچ گیری کرسٹن نے انگلینڈ کر کٹ ٹیم کی کوچنگ سے معذرت کر لی۔ گیری کرسٹن کی اینڈی فلاور کی جگہ انگلینڈ کے کوچ بننے سے انکار کی وجہ انگلش بلے باز کیون پیٹر سن ہیں،کیونکہ انھیںپیٹر سن کو ٹیم میں منتخب کر نے کی اجازت نہیں دی گئی۔ گرسٹن کے انکار کے بعد محدود اوور ز میں انگلینڈ کی کوچنگ کے فرائض سر انجام دینے والے ایشلے جائلز ممکنہ طور پر اگلے کوچ ہوں گے ۔ کرسٹن آئی پی ایل میں دہلی ڈئر ڈیولز کی کوچنگ کے فرائض سرانجام دیںگے ، کرسٹن جنھوں نے انڈیا اور جنوبی افریقا کو اپنی بہترین کوچنگ کے ذریعے دنیا کی نمبر ون ٹیم بنا دیا تھاکی آئی پی ایل میں نو لاکھ پونڈ میںنیلامی ہوئی تھی، ان کی خواہش پر ہی پیٹر سن کو دہلی کا کپتان مقرر کیا گیا ۔

چٹاگانگ: جنوبی افریقی کرکٹ ٹیم انتظامیہ نے فاسٹ بولر وین پارنل کوبھارتی عدالت میں پیشی کے لیے اجازت دے دی۔وین پارنل کو ٹی ٹوئنٹی ورلڈ کپ کی جنوبی افریقی ٹیم سے رہا کر دیا گیا،پارنل ممبئی کی عدالت میں ڈرگ اسکینڈل میں ملوث ہونے کے الزام میں پیش ہوں گے ۔پارنل پر یہ الزام 2012کے آئی پی ایل کے ایڈیشن میں لگا تھا جس سے پارنل نے مسترد کر دیاتھا ، حال ہی میں ممبئی پولیس نے طویل تحقیقات کے بعد پارنل اور اس کے انڈین ساتھی راہول شرما کے خلاف چارج شیٹ عدالت میں داخل کر ادی جس کے بعد انھیں دوبارہ عدالت میں پیش ہونے کا حکم دیا گیا ہے۔ پارنل کے منیجر کا کہنا ہے کہ پارنل صرف بھارتی عدالت کے پروسیجر کو پورا کر نے کے لیے پیش ہو ں گے ان سے مزید کوئی تحقیقات نہیں ہوںگی۔ جنوبی افریقی ٹیم کے منیجر محمد موسیٰ جی کا کہناہے کہ ہمیں ٹی ٹوئنٹی ورلڈ کپ میں شر کت کے لیے بنگلہ دیش روانگی سے قبل پارنل کی عدالت میں پیشی کے بارے میں بتا یاگیا تھا ، اور ہم نے اسی حساب سے اپنی پلاننگ کی تھی۔ انھوں نے کہا کہ پارنل نے کوئی غلط کام نہیں کیا اس لیے ہمیں امید ہے کہ جلدہی مقدمہ ختم ہو جائے گا۔

حیدرآباد:  ڈسٹرکٹ کرکٹ ایسوسی ایشن حیدرآباد کے زیر اہتمام انٹر کلب ڈسٹرکٹ کرکٹ چیمپئن شپ میں بدھ کو تین میچ کھیلے گئے۔ ڈسٹرکٹ کرکٹ ایسوسی ایشن حیدرآباد کے زیر اہتمام نیشنل بینک کے تعاون سے جاری NBPانٹرکلبز کرکٹ چیمپئن شپ کے پریٹ آباد کالج گراﺅنڈ میں کھیلے گئے راﺅنڈ میچ میں وکٹوریہ کلب نے اشرف میموریل کرکٹ کلب کے خلاف 39.4اوورز میں 263رنز بنائے انس 83رنز بناکر نمایاں رہے اشرف میموریل کرکٹ کلب کے فیصل قریشی ، باسط ، اور انور قریشی نے 2,2وکٹیں حاصل کیں۔جواب میں اشرف میموریل کرکٹ کلب نے مطلوبہ اسکو ر 35اوورز میں 3وکٹوں کے نقصان پر حاصل کرلیا مختیار راجپوت نے 25چوکوں اور ایک چھکے کی مدد سے سینچری اسکور کرتے ہوئے 130رنز بنائے۔ وکٹوریہ کلب کے حامد نے 3وکٹیں حاصل کیں ۔ دوسرے میچ میں شاہ لطیف کلب نے بھٹائی اسپورٹس کے خلاف 30اوورز میں 9وکٹوں کے نقصان پر 263رنز بنائے ۔بھٹائی اسپورٹس کی ٹیم 29اوورز میں 248رنز بناکر آﺅٹ ہوگئی۔ تیسرے میچ میں مہران کرکٹ کلب پریٹ آباد نے اشرف میموریل اسپورٹس کلب کے خلاف مقررہ 40اوورز میں 280رنز بنائے ۔ پرویز انصاری 3چھکے اور 8چوکوں کی مدد سے 103رنز بناکر نمایا ںرہے ۔ جواب میں اشرف میموریل اسپورٹس کلب کی ٹیم 30.3اوورز میں 115رنز بناکر آﺅ ٹ ہوگئی مہران کلب پریٹ آباد کے صدیق ، راجا اور رفیق بالترتیب 3اور 2,2وکٹیں حاصل کیں ۔ میچوں کے امپائرز سہیل قریشی ، محمد عرفان ، ریاض الدین اسکور ر فرقان عظیم تھے ۔

کراچی: ٹی ٹوئنٹی ورلڈ کپ میں اسٹیڈیم میں غیرملکی جھنڈے لہرانے پر پابندی لگا نے پر بنگالی حکومت کے خلاف کراچی میں ہاکی کی خواتین کھلاڑیوں نے احتجاج کیا ۔بنگلہ دیشی حکومت کی پاکستان دشمنی کے خلاف خواتین کھلاڑیوں نے کراچی کے نیشنل ہاکی اسٹیڈیم میں بھر پور احتجاج کیا، انھوں نے مطالبہ کیا کہ آئی سی سی جھنڈے لہرانے پر پابندی کے فیصلے کے خلاف خاموش نہ رہے بلکہ فوری طور پر بنگلادیشی کرکٹ بورڈ کے خلا ف سخت کارروائی کرے۔