کراچی: پاکستان کرکٹ بورڈ نے اسٹیٹ بینک کرکٹ ٹیم کے کپتان کاشف صدیق کو ڈوپ ٹیسٹ مثبت آنے پر 2سال کے لیے معطل کردیا ۔32سالہ کاشف صدیق کا نومبر2013میں ڈیپارٹمنٹل ٹی ٹوئنٹی ٹورنامنٹ کے دوران ڈوپ ٹیسٹ لیا گیا تھاجس کے بعدکرکٹ بورڈ نے جنوری 2014میں انھیں عارضی طور پر کرکٹ کھیلنے سے روک دیا تھا۔پی سی بی کی جانب سے قائم 3رکنی پینل نے ٹیسٹ کی رپورٹ مثبت آنے کے بعد کاشف صدیق کو 2سال کے لیے معطل کردیا،کمیٹی میں سابق وکٹ کیپر وسیم باری،ڈاکٹر اکسے ملک اور شاہد کریم شامل تھے۔کاشف صدیق 131فرسٹ کلاس میچوں میں پاکستان کسٹم،پاکستان انٹرنیشنل ائیر لائن اور اسٹیٹ بینک کی نمائندگی کرچکے ہیں۔

دبئی: ممبئی انڈینز کے فاسٹ بولر ظہیر خان پٹھوں میں درد کے باعث آئی پی ایل کے اگلے میچ سے باہر ہوگئے ۔ ممبئی انڈینز آئی پی ایل میں مسلسل پانچ شکستوں کے بعدکنگز الیون پنجاب کے خلاف پہلی کامیابی حاصل کرنے میں کامیاب ہوگئی لیکن وہ رائل چیلنجر بنگلور کے خلاف اپنے اگلے اہم میچ میں تجربہ کار فاسٹ بولرظہیر خان کی خدمات سے محروم ہوگئی۔ممبئی انڈینز کے کپتان روہیت شرما کا کہناہے کہ ظہیر خان اگلے میچ میں حصہ نہیں لے سکیں گے ،انھوںنے کہا یہ ہمارے لیے بہت بڑا نقصان ہے۔ممبئی انڈینز کے کوچ جان رائٹ نے کہا کہ ظہیر خان دائیں پٹھوں میں درد کے باعث ڈاکٹروں کی نگہداشت میں ہیںاور اگلے میچ میں حصہ نہیں لے سکیں گے۔

سڈنی: سابق آسٹریلوی فاسٹ بولر ڈینس للی نے معاوضہ کم ملنے پر آسٹریلوی کرکٹ ٹیم کے بولنگ کنسلٹنٹ کی حیثیت سے کام جاری رکھنے سے انکار کردیا۔ڈینس للی نے بولنگ کنسلٹنٹ کی حیثیت سے کام کرنے کرنے کے لیے معاوضہ بڑھانے کا مطالبہ کیا تھا جسے کرکٹ آسٹریلیا نے مسترد کردیا۔کرکٹ آسٹریلیا کے ترجمان کا کہنا ہے کہ للی نے معاہدے میں توسیع کے لیے معاوضہ بڑھانے کا مطالبہ کیا تھا تاہم کرکٹ آسٹریلیا کے انکار پر انھوں نے کام جاری رکھنے سے معذرت کرلی۔ ترجمان کا کہنا تھا کہ ڈیسن للی عظیم کھلاڑی ہیں اور کرکٹ بورڈ کے دروازے ان کے لیے ہمیشہ کھلے ہیں۔واضح رہے کہ للی نے آسٹریلوی فاسٹ بولرز کی کارکردگی میں اہم کردار ادا کیا ہے اورمچل جانسن کے کیرئیر کو دوبارہ عروج پر پہنچانے میں ان کا کردار اہم رہا ہے۔

میرپور خاص: پی سی بی ریجنل انٹر ڈسٹرکٹ انڈر 19کرکٹ ٹورنامنٹ کے میچ میں میرپورخاص کی ٹیم نے بدین کو 206رنز سے ہرا دیا۔ میونسپل اسپورٹس کمپلیکس میں کھیلے گئے میچ میں پہلی اننگ میں میرپورخاص کی ٹیم نے 265رنز بنائے شیر خان نے 61رنز کئے بدین کے آزان علی نے چار اور غلام رسول نے تین وکٹیں حاصل کیں جواب میں بدین کی ٹیم پہلی اننگ میں 101رنز بناکر آﺅٹ ہو گئی۔ میرپورخاص کی طرف سے سمیع اللہ نے پانچ اور انس نے تین کھلاڑیوں کو آﺅٹ کیا،میرپورخاص کی ٹیم نے دوسری اننگ میں 150رنز بناکر اننگ ڈکلیئرڈ کردی محمد بہزاد نے 72رنز اسکورکئے بدین کے کپتان اکبر احمد نے تین کھلاڑیوں کو آﺅٹ کیا بدین کی ٹیم 315رنز کے ہدف کے تعاقب میں 108رنز بنا کر آﺅٹ ہوگئی اسامہ نور نے21رنز بنائے ،میرپورخاص کے آف اسپنر شیر خان پانچ کھلاڑیوں کو آﺅ ٹ کیا۔میچ کے امپائرعبد القیوم اور نذیر بٹ جبکہ آفیشل اسکورر عاطف بلوچ تھے ۔

تسمانیہ: آسٹریلوی کرکٹ ٹیم کے بیٹسمین ٹم پین نے تسمانیہ کی ٹیم کے نائب کپتان حیثیت سے استعفیٰ دے دیا۔ ٹم پین کی جگہ الیکس ڈولان کو نائب کپتان مقرر کر دیا گیا ۔ آسٹریلوی ٹیم کے کپتان کے مضبوط امیدوار سمجھے جانے والے ٹم پین نے کار کردگی میں مسلسل زوال کے باعث مستعفی ہونے کا فیصلہ کرلیا جبکہ خراب کارکردگی کے باعث وہ 2011سے ٹیم سے باہر ہیں۔29سالہ ٹم پین نے آسٹریلیا کی جانب سے چار ٹیسٹ اور 26ون ڈے میچز کھیلے۔