سڈنی: ایشز سیریز میں انگلینڈ کیخلاف وائٹ واش کی تکمیل گزشتہ ہفتے سڈنی اوپرا ہاﺅس مٰں عوامی جشن میں تاخیر سے آنے پر ٹیم مینجمنٹ نے آسٹریلوی کرکٹ ٹیم کے اوپنر بیٹسمین کرس راجرز پر جرمانہ عائد کردیا۔کرس نے اپنے عمل پر معافی مانگ لی ہے ۔ان کا کہنا تھا کہ وہ بھائی کی سالگرہ کی تقریب میں مصروف تھے ۔

بارسلونا: ارجنٹائن کے سپر اسٹار فٹبالر لیونل میسی کا کہنا ہے کہ وہ اپنے کیریئر کا باقی ماندہ وقت بارسلونا کلب میں ہی گزارنا چاہتے ہیں ۔میسی نے زخمی ہونے کے باعث دوماہ کے وقفے کے بعد میچ میں شرکت کی اور گیٹاف کے خلاف دو گول کرکے شاندار واپسی کی ۔میسی کا مزید کہنا تھا کہ وہ بارسلونا کے ساتھ کھیلتے کھیلتے ہی ریٹائر ہونا چاہتے ہیں کیوں لوگ انہیں اسی کلب میں دیکھنا چاہتے ہیں ۔

میلان: شمالی آئرلینڈ کے سابق فارمولا ون ڈرائیور ایڈی ارون کو اٹلی کے شہر میلان کے ہالی وڈ نائٹ کلب میں ہنگامہ آرائی کرنے پر اطالوی عدالت نے چھ ماہ قید کی سزا سنادی ہے ۔ایڈی کا دسمبر 2008میں کلب کے وی آئی پی سیکشن میں میلان کے سابق میئر کے بیٹے گبرائیل موراٹی کے ساتھ جھگڑا ہوا تھا ۔

سڈنی: آسٹریلوی کرکٹ بورڈ نے ہیڈ کوچ ڈیرن لی مین کو آئی پی ایل سیزن سیون میں کنگز الیون پنجاب کی نمائندگی کی اجازت دینے سے انکار کردیا ۔کرکٹ آسٹریلیا کے مطابق لی مین کی فی الوقت آسٹریلوی ٹیم میں ضرورت ہے ۔لی مین اور بورڈ حکام کے درمیان اس معاملے پر بات چیت جاری ہے ۔

دبئی: کرکٹ کی معروف ویب سائٹ کے سالانہ ایوارڈ ز کے لئے پاکستان کے چار کھلاڑی نامزد ہوگئے ۔سعید اجمل کو ٹیسٹ بولر آف دی ایئر جبکہ یونس خان اور خرم منظور کو بہترین ٹیسٹ بیٹسمین کیلئے نامزد کیا گیا ہے ۔ون ڈے کے لئے سعید اجمل کا مچل جونسن ،روی جڈیجا ،ڈیل اسٹین ،ربیع الحسن اورنووان کولا سیکرا سے مقابلہ ہوگا ۔ون ڈے بیٹسمین آف دی ائیر کے لئے کوئی پاکستانی کھلاڑی نامزد نہیں ہوا۔ون بیٹسمین کے لئے مارٹن گپٹل ،روہت شرما ،کین ولیمسن ،شیکھر دھون ،کیرون پولارڈ ،مہندر سنگھ دھونی ،ویرات کوہلی ،کمارسنگاکارا،ڈی کوک اور جیمز فالکنز کے درمیان مقابلہ ہوگا۔

لندن: مانچسٹر یونائیٹڈ اور انگلینڈ فٹبال ٹیم کی جانب سے کھیلنے والے کرس سمالنگ فینسی ڈریس پارٹی پر خود کش بمبار کے روپ میں جانے پر معافی مانگ لی ۔کرس نے فینسی ڈریس پارٹی میں جیگر میسٹر اور ریڈبل کی بوتلیں اپنے جسم کے ساتھ باندھیں اور ظاہر کیا کہ جیسے وہ خودکش بمبار ہے ۔برطانوی اخبار دی سن نے کرس کی تصویر شائع کی ۔کرس کی انتظامی کمپنی کی طرف سے جاری کئے گئے ایک بیان میںکہا گیا ہے کہ کسی کے جذبات مجروح کرے پر کر س معافی مانگنے کے لئے تیار ہیں ۔