لاہور: پاکستان کرکٹ بورڈ نے معین خان کو ہٹا کر سابق ٹیسٹ کرکٹر ذاکر خان کو قومی کرکٹ ٹیم کا منیجر مقرر کر دیا۔ پی سی بی کی جانب سے جاری کردہ پریس ریلیز میں نئے ٹیم منیجر کا اعلان کیا گیا ہے۔ ڈائریکٹر انٹرنیشنل کرکٹ ذاکر خان کو ٹیم کے منیجر کی اضافی ذمہ داری سونپ دی گئی ہے۔ سابق ٹیسٹ کرکٹر ذاکر خان ایشیا کپ اور ٹی 20 ورلڈ کپ کے لیے قومی ٹیم کے منیجر ہوں گے۔ نجم سیٹھی کے دور میں معین خان کو پہلے چیف سلیکٹر اور پھر بعد میں منیجر مقرر کیا گیا تھا۔ پی سی بی کے مطابق قومی ٹیم کے لیے کوچ کا اعلان 9 فروری کو ہو گا۔

کراچی: چیئرمین پی سی بی ذکاءاشرف کو عہدے سے برطرف کرنے کا فیصلہ کرلیا گیا، ذرائع کا کہنا ہے کہ سمری وزیراعظم کو بھجوادی گئی ہے۔ذرائع کے مطابق ذکاءاشرف 8 فروری کو سنگاپور میں آئی سی سی اجلاس کے بعد عہدے سے ہٹادیئے جائیں گے جبکہ عہدے سے ہٹانے کی سمری وزیراعظم نواز شریف کو بھجوادی گئی ہے۔دوسری جانب ذرائع کا یہ بھی کہنا ہے کہ پاکستان کرکٹ بورڈ میں دوبارہ ایڈہاک لگانے کا فیصلہ کیا گیا جبکہ نجم سیٹھی ایڈہاک کمیٹی کے متوقع سربراہ ہوں گے۔واضح رہے کہ کچھ عرصہ قبل چیئرمین پی سی بی ذکاءاشرف کے خلاف درخواست پر عدالت نے انہیں کام کرنے سے روک دیا تھا تاہم ہائیکورٹ نے انہیں بحال کردیا تھا۔

لاہور: چیئرمین پی سی بی ذکاءاشرف آئی سی سی کے اجلاس میں شرکت کیلئے سنگاپور روانہ ہوگئے۔سنگاپور روانگی سے قبل لاہورائیر پورٹ پر میڈیا سے گفتگو کرتے ہوئے ذکاءاشرف نے کہا کہ وہ بگ تھری کے معاملے پر حق اور سچ کا ساتھ دیں گے۔ انہوں نے بتایا کہ وزیراعظم مصروف ہیں اس لیے ان سے ملاقات نہیں ہو سکی۔ جب وزیراعظم کو وقت ملے گا تو ضرور ملاقات ہو گی۔ ان کا کہنا تھا کہ انہیں چیئرمین شب سے ہٹائے جانے کے حوالے سے کوئی اطلاع نہیں ہے۔ اس سے قبل قذافی اسٹیڈیم لاہور میں پریس کانفرنس سے خطاب کرتے ہوئے ذکاءاشرف نے کہا تھا کہ بگ تھری کے معاملے پر اکیلے نہیں ہیں۔ سری لنکا اور جنوبی افریقہ ہمارے ساتھ ہیں۔ 8 فروری کو آئی سی سی کے اجلاس میں ملکی مفاد کو سامنے رکھ کر بات کریں گے۔ بھارت نے کوئی پیشکش کی تو دیکھا جائیگا۔چیئرمین پی سی بی کا کہنا تھا کہ وسیم اکرم کی مصروفیت کی وجہ سے قومی ٹیم کے کوچ کی درخواستوں کے لیے دو دن کی توسیع کردی ہے۔9 فروری کو قومی کرکٹ ٹیم کے کوچ کا فیصلہ کرلیا جائے گا۔