راولپنڈی(پی پی آئی)لاہور ہائیکورٹ راولپنڈی بنچ نے شیخ رشید احمد کی لال حویلی فوری ڈی سیل کرنے کی استدعا مسترد کردی اور محکمہ اوقاف سے جواب طلب کرلیا۔پی پی آئی کے مطابق  لاہور ہائیکورٹ راولپنڈی بنچ میں لال حویلی سیل کرنے سے متعلق کیس کی سماعت ہوئی، سماعت ہائیکورٹ راولپنڈی بنچ کے جج جسٹس چودھری محمد اقبال نے کی،ہائیکورٹ راولپنڈی نے پٹیشن سماعت کیلئے منظورکرلی،عدالت نے کہاکہ لال حویلی فوری ڈی سیل کی استدعا مسترد کرتے ہیں جواب آنے دیں پھر کارروائی کرتے ہیں، عدالت نے ایڈمنسٹریٹو محکمہ اوقاف، ڈپٹی ایڈمنسٹریٹو اوقاف کو نوٹس جاری کرتے ہوئے پٹیشن کا شق وار 26ستمبر منگل کو جواب طلب  کرلیا،ہائیکورٹ نے چیئرمین وقف متروکہ املاک اور ڈپٹی ایڈمنسٹریٹو کو رپورٹ سمیت طلب کرلیا۔

بریڈ فورڈ/کراچی (پی پی آئی)برطانیہ میں اردو کی ترقی اور ترویج کی وجہ سے دنیا بھر میں معروف افسانہ نگار شیخ مقصود الٰہی 89 برس کی عمر میں بریڈ فورڈ میں انتقال کرگئے۔ حکومت پاکستان نے دس برس قبل انہیں اردو ادب کی خدمات کے اعتراف میں تمغہ حسن کارکردگی دیا تھا۔پی پی آئی کے مطابق شیخ مقصود الٰہی ا نیشنل بنک سے وابستہ رہے،ان کے 9 افسانوی مجموعے شائع ہوچکے ہیں۔شیخ مقصود الٰہی کی ادبی سرگرمیوں کے باعث پاکستان میں ان پر پی ایچ ڈی کی گئی جب کہ ان ہی خدمات کے عوض بریڈ فورڈ یونیورسٹی نے ڈاکٹریٹ کی اعزازی ڈگری دی۔ مرحوم کچھ عرصے سے علیل تھے۔ انہوں نے پسماندگان میں بیوہ،تین بیٹیاں، دوبیٹے اور چاہنے والوں کا  وسیع حلقہ سوگوار چھوڑا ہے۔ مرحوم کی نماز جنازہ  جمعہ کو ویسٹ گیٹ جامع مسجد بریڈ فورڈ میں ادا کیگئی جب کہ سیمنٹری روڈ قبرستان میں دفن کیا گیا۔

اسلام آباد(پی پی آئی)اسلام آباد ہائیکورٹ نے آڈیو لیکس معاملے میں چیئرمین پی ٹی آئی کی اہلیہ بشریٰ بی بی کوایف آئی اے طلبی کا نوٹس معطل  کردیا۔پی پی آئی کے مطابق  اسلام آباد ہائیکورٹ  میں آڈیو لیکس معاملے میں بشریٰ بی بی کی ایف آئی اے طلبی کیخلاف درخواست پر سماعت ہوئی، جسٹس بابر ستار نے بشریٰ بی بی کی درخواست پر سماعت کی،درخواست کے متن میں کہا گیا اس عدالت میں مرکزی کیس پہلے سے زیرسماعت ہے،18ستمبر کو عدالت نے ایف آئی اے کو قانون کے مطابق کارروائی کی ہدایت کی، مرکزی کیس اب 30اکتوبر کو سماعت کیلئے مقرر ہے،کیس زیرالتوا ہونے کے باوجودایف آئی اے نے 19ستمبر کو طلبی کا نوٹس جاری کردیا،درخواست میں استدعا کی گئی ہے کہ جب تک کیس زیرالتوا ہے عدالت ایف اے کے نوٹس کو معطل کرے۔جسٹس بابر ستار نے کہاکہ ایف آئی اے کس چیز کیساتھ وائس میچنگ کرانا چاہتا ہے،وکیل لطیف کھوسہ نے کہاکہ ہمیں ایس ایس پی نے نوٹس کیا کہ ایف اآئی اے نے وائس میچنگ کرنی ہے،عدالت نے دلائل سننے کے بعد چیئرمین پی ٹی آئی کی اہلیہ بشریٰ بی بی کوایف آئی اے طلبی کا نوٹس معطل  کردیا۔

سری نگر (پی پی آئی)مقبوضہ جموں و کشمیرحریت رہنما میر واعظ عمر فاروق کی چار برس بعد نظر بندی ختم کر دی گئی جس کے بعد انہوں نے سرینگر کی جامع مسجد میں جمعے کا خطبہ دیا اور نماز بھی پڑھائی۔50 سالہ حریت رہنما  کاسرینگر کی جامع مسجد  پہنچنے پرپرتپاک خیرمقدم کیا گیا،گلپاشی  کی گئی۔پی پی آئی کے مطابق    حریت رہنما میر واعظ عمر فاروق نے غیر ملکی میڈیا کو بتایا کہ جمعے کی صبح ان کے گھر کے اطراف سے پولیس کا محاصرہ ختم کیا گیا ہے۔واضح رہے کہ میر واعظ عمر فاروق کو 5 اگست 2019 کو مقبوضہ کشمیر کی نیم خود مختار حیثیت ختم کرنے کے فیصلے کے بعد گھر میں نظر بند کر دیا گیا تھا۔حریت رہنما نے اپنی نظر بندی کے احکامات کو عدالت میں چیلنج کر رکھا تھا۔بھارتی عدالت نے 15 ستمبر کو اس حوالے سے انتظامیہ کو جواب داخل کرانے کے لیے چار ہفتوں کی مہلت دی تھی۔