بی آئی ایس پی مستفید ہونے والوں کو تکنیکی مہارت فراہم کرے گا: چیئرپرسن

اسلام آباد (پی پی آئی) چیئرپرسن بے نظیر انکم سپورٹ پروگرام (بی آئی ایس پی) سینیٹر روبینہ خالد نے  بینظیر انکم سپورٹ پروگرام کے استفادہ کنندگان کو تکنیکی مہارت فراہم کرنے کے اقدام پر روشنی ڈالی، جس کا مقصد انہیں غربت سے نکالنا ہے۔ان خیالات کا اظہار سینیٹر روبینہ خالد نے آج بی آئی ایس پی ہیڈ کوارٹر میں ورلڈ بینک کے ٹیم لیڈ امجد ظفر اور مسٹر گل نجم جامی سے ملاقات کے دوران کیا۔ چیئرپرسن بے نظیر انکم سپورٹ پروگرام نے انسانی وسائل کی ترقی کی عالمی مانگ کی نشاندہی کرتے ہوئے خواتین کو بااختیار بنانے پر توجہ مرکوز کرنے والے غربت گریجویشن پروگرام کو نافذ کرنے کی ضرورت پر زور دیا۔ انہوں نے بینظیر انکم سپورٹ پروگرام کے عالمی بینک کے ساتھ مضبوط ورکنگ ریلیشن شپ کو نوٹ کیا اور اس تعاون کو مزید مضبوط کرنے کی ضرورت پر زور دیا۔ اس کے علاوہ سینیٹر روبینہ خالد نے شفافیت کو یقینی بنانے کے لیے عالمی بینک کے تعاون سے ادائیگی کے نئے طریقہ کار کو اپنانے کی اہمیت پر روشنی ڈالی۔۔ انہوں نے سیاسی قیادت کی اس ہدایت کی توثیق کی کہ بے نظیر انکم سپورٹ پروگرام سے مستفید ہونے والے ہر فرد کو بغیر کسی کٹوتی کے ان کی مکمل وظیفہ کی رقم پورے احترام اور عزت کے ساتھ ملنی چاہیے۔