میلبورن: آسٹریلوی کرکٹ بورڈ نے تلخ رویے پر آف اسپنر بریڈ ہوگ پر میچ فیس کا 20فیصد جرمانہ عائد کردیا ۔ بگ بیش لیگ میں میلبورن اسٹارز کے خلاف میچ میں بریڈ ہوگ اور آل راﺅنڈر ڈیوڈ ہسی کے درمیان تلخ جملوں کا تبادلہ ہوا تھا ۔ میچ ریفری ڈیرل ہارپر نے اس واقعے کا نوٹس لیا ۔تفتیش کے بعد بریڈ ہوگ کو قصوروارقرار دے کر ان پر میچ فیس کا جرمانہ عائد کردیا گیا ۔

مردان: مردان کے ہاکی کھلاڑیوں کو صوبائی حکومت کی جانب سے آسٹروٹرف کا تحفہ مل گیا ،جلدہی آسٹرو ٹرف کی تنصیب کا کام شروع کردیا جائے ۔صحافیوں سے بات چیت کرتے ہوئے ڈسٹرکٹ اسپورٹس آفیسر مردان حاجی منور خان نے کہا ہے کہ پشاور کے بعد مردان میں ہمارے پاس کھیلوں کی تمام سہولیات موجود ہیں اور ہم کوشش کررہے ہیں کہ مزید سہولیات کے ساتھ ساتھ موجودہ سہولیات کے معیار اور گنجائش میں اضافہ کریں ۔

نیویارک: پی ایس اے پیٹسبرگ اوپن اسکواش چیمپئن شپ کا آج (جمعہ ) سے آغاز ہوگا ،چار پاکستانی کھلاڑی بھی ٹائٹل کے حصول کیلئے قسمت آزمائی کریں گے ۔پاکستانی کھلاڑیوں میں جرحان زمان ،یاسر بٹ ،حمزہ شاہ بخاری اورعاقب حنیف شامل ہیں ۔ قومی کھلاڑیوں کو مین راﺅنڈز تک رسائی کے لئے کوالیفائنگ راﺅنڈ ز میں کامیابی حاصل کرنی پڑے گی ۔

اسلام آباد: انٹرنیشنل ٹینس فیڈریشن نے پاکستان ٹینس فیڈریشن کے وائٹ بیج امپائر شہزاد اختر علوی کو براﺅن بیج کورس کے لئے منتخب کرلیا،کورس 3سے 6فروری تک قطر کے دارلحکومت دوحہ میں منعقد ہوگا ۔ کورس میں ایشیائی براعظم سے 17وائٹ بیج امپائرز شرکت کریں گے ۔اگر شہزاد اختر نے کورس میں کامیاب ہوگئے تو وہ پاکستان کی تاریخ کے پہلے براﺅن بیج ٹینس آفیشلز ہوں گے ۔ شہزاد علوی نے 1999میں وائٹ بیج کورس بھارت سے کیا تھا اور وہ مختلف انٹرنیشنل ایونٹس میں امپائرنگ کی ڈیوٹی سرانجام دے چکے ہیں ۔

لاس اینجلس: امریکن باسکٹ بال چیمپئن شپ میں انڈیانا پیسرز کی ٹیم نے لاس اینجلس لیکرز کو شکست دیدی۔باسکٹ بال میچ میں دونوں ٹیموں کے درمیان دلچسپ مقابلہ ہوا۔ پہلے اور دوسرے کوارٹرز میں سنسنی خیز مقابلے کے بعد مہمان پیسرز کو دو پوائنٹس کی برتری حاصل رہی۔ تیسرے کوارٹر میں پیسرز نے برتری بڑھا کر دس پوائنٹس کر دی جو میچ کے چوتھے کوارٹر تک برقرار رہی۔انڈیانا پیسرز کی ٹیم کو میزبانلیکرزکے خلاف 92کے مقابلے میں 104 پوائنٹس سے کامیابی حاصل ہوئی۔ فاتح ٹیم کی جانب سے ڈیوڈ ویسٹ نے سب سے زیادہ19 پوائنٹس اسکور کیے۔