کراچی(پی پی آ ئی) صوبہ سندھ کے دارالحکومت کراچی میں ڈکیتی پر مذاحمت کرنے والے سب انسپکٹر کو فائرنگ کرکے قتل کردیا گیا۔  کراچی کے علاقے سائٹ سپر ہائی وے چاکر ہوٹل کے قریب فائرنگ کا واقعہ پیش آیا، جس کے نتیجے میں سب انسپکٹر عامر علی جان کی بازی ہار گئے، مقتول عامر علی فیڈرل بی ایریا کے رہائشی اور گلبرگ کمپلین سیل میں تعینات تھے۔بتایا گیا ہے کہ ڈاکوؤں نے عامرعلی کو لوٹنے کی کوشش کی تو انہوں نے فائرنگ کرنے کی کوشش کی، اسی فائرنگ کے تبادلے میں عامر علی کو سینے پر گولی لگی اور وہ خالق حقیقی سے جا ملے، مقتول کے پاس جیب میں کیش موجود ہے لیکن پستول اور موٹر سائیکل نہیں ملی، جس کا مطلب ہے ڈاکو پیسے موبائل فون تو لے کر نہیں گئے، تاہم پستول اور موٹر سائیکل لے گئے۔معلوم ہوا ہے کہ ایس ایس پی ایسٹ سید عرفان بہادرنے جائے وقوعہ کا دورہ کیا، اس موقع پر میڈیا سے گفتگو کرتے ہوئے بتایا کہ شہید سب انسپکٹر عامر وادی حسین قبرستان سے واپس آرہا تھا کہ اس دوران یہ افسوسناک واقعہ پیش آیا، شہید سب انسپکٹر کو سینے پر ایک گولی لگی اور ان کی موت ہوگئی، اس واقعے کے حوالے سے تحقیقات شروع کردی گئی ہیں۔ گزشتہ ماہ کراچی کے علاقے ابو الحسن اصفہانی روڈ پر ڈاکوؤں سے مقابلے کے درمیان پولیس اہلکار گولی لگنے سے جاں بحق ہوگیا تھا، یہ پولیس مقابلہ پیراڈائز بیکری کے قریب ہوا جہاں ڈاکوؤں کی فائرنگ سے ایک اہلکار زخمی بھی ہوا جب کہ پولیس نے ایک ملزم کو شدید زخمی حالت میں گرفتار کرلیا۔رواں برس جون میں پیش آئے ایک اور ایسے ہی واقعے میں سہراب گوٹھ الاصف اسکوائر کے عقب میں واقع انڈس پلازہ کے قریب شعلے ڈکیت گینگ نے فائرنگ کرکے 2 پولیس اہلکاروں رحمت اللہ اور عبدالحکیم کو شہید کردیا تھا، پولیس کو جائے وقوع سے ایک نائن ایم ایم پستول اور 30 بور گولیوں کے خول بھی ملے تھے۔

 اسلام آباد(پی پی آ ئی) عالمی بینک نے کم تنخواہ والے ملازمین پر ٹیکس لگانے کی تجویز واپس لے لی۔ ایکسپریس نیوز کی رپورٹ کے مطابق عالمی بینک کی ترجمان نے کہا کہ ٹیکسوں کے نفاذ کیلئے کسی قسم کی سفارش نہیں کر رہے، عالمی بینک پاکستان کے ٹیکس سسٹم میں ایسی جامع اصلاحات کی سفارش کرتا ہے جن کے نتیجے میں ٹیکسوں کا بوجھ امیر افراد پر بڑھے اور غریب افراد کو ریلیف حاصل ہو، تاہم کسی بھی قسم کی تجویز دینے کیلئے نئے اعداد وشمار کا جائزہ لینا ضروری ہے کیوں کہ تجویز 2019ء کے اعداد و شمار کی بنیاد پر جاری کی گئی جس کو حالیہ مہنگائی اور لیبر مارکیٹ کی صورتحال کے مطابق اپڈیٹ کرنے کی ضرورت ہے۔اس حوالے سے رپورٹ میں حکومتی اعداد و شمار کے حوالے سے معلوم ہوا ہے کہ تنخواہ دار طبقے نے گزشتہ تین ماہ کے دوران مالدار ایکسپورٹرز اور ریئل اسٹیٹ سیکٹر کے مجموعی ٹیکس سے بھی زیادہ ٹیکس ادا کیا ہے، جولائی تا ستمبر کے دوران تنخواہ دار طبقے نے 70.6 ارب روپے کا ٹیکس ادا کیا جب کہ ایکسپورٹرز اور ریئل اسٹیٹ سیکٹر نے مجموعی طور پر 65 ارب روپے کا ٹیکس ادا کیا۔رپورٹ میں بتایا گیا ہے کہ ایکسپورٹرز نے رواں مالی سال کی پہلی سہہ ماہی کے دوران 7 ارب ڈالر کمائے لیکن ٹیکس کی مد میں صرف 21 ارب روپے جمع کرائے، ایکسپورٹرز اپنی مجموعی رسیدوں کا صرف 1 فیصد ٹیکس ادا کرتے ہیں جو اس سال 4 فیصد سے کم ہو کر 3.6 فیصد رہ چکی ہے۔ رپورٹ میں کہا گیا ہے کہ ریئل اسٹیٹ سیکٹر نے پلاٹوں کی خرید وفروخت پر 44 ارب روپے کا ٹیکس ادا کیا، ایف بی آر نے بینکوں سے رقوم نکالنے پر ٹیکس کی مد میں 7.6 ارب روپے جمع کیے، سب سے زیادہ ٹیکس کی وصولی کنٹریکٹرز، سیونگ اکاؤنٹس ہولڈرز، امپورٹرز، تنخواہ دار طبقے، نان فائلرز کے الیکٹریسیٹی بلز، ٹیلیفون اور موبائل فون یوزرز اور ڈیویڈنڈ انکم کی مد میں کی گئی، بجلی بلوں کی مد میں انکم ٹیکس کی وصولی میں 75 فیصد اضافہ ہوا، گزشتہ سہہ ماہی کے دوران بجلی بلوں کی مد میں 2.5 ارب روپے کا انکم ٹیکس جمع کیا گیا۔بتایا جا رہا ہے کہ تنخواہ دار طبقے اور ریئل اسٹیٹ سیکٹر اور ایکسپورٹرز کے درمیان دولت کا کوئی موازنہ نہیں ہے، تنخواہ دار طبقہ کنٹریکٹرز، بینک ڈپوزیٹرز اور امپورٹرز کے بعد سب سے زیادہ ٹیکس ادا کرنے والا چوتھا بڑا طبقہ ہے، جس کی اکثریت کا معیار زندگی انتہائی پست ہے اور تنخواہ دار طبقے کی اکثریت اپنی آمد و رفت کیلئے پبلک ٹرانسپورٹ اور موٹرسائیکل کا سہارا لیتی ہے۔

لاہور)پی پی آ ئی) پاکستان مسلم لیگ (ن) کی سینئر نائب صدر اور چیف آرگنائزر مریم نواز نے غزہ پر اسرائیلی حملوں کی مذمت اور فلسطینیوں کے ساتھ یکجہتی کا اظہار کیا ہے۔مریم نواز نے اپنے بیان میں کہا ہے کہ غاصب فوج کے خلاف اپنی آزادی کے لئے لڑنا فلسطینیوں کا حق ہے، ظالم و غاصب کے خلاف مظلوم کا ساتھ دینا ہی انصاف ہے، عالمی قوانین، سلامتی کونسل کی قراردادوں اور دو ریاستی حل کے سمجھوتوں کی دھجیاں اڑانے والی غاصب فوج موجودہ حالات کی ذمہ دار ہے۔سینئر نائب صدر مسلم لیگ ن نے کہا کہ مقبوضہ جموں و کشمیر میں بھارت اور مقبوضہ فلسطینی علاقوں میں اسرائیل نسل کشی اور ریاستی دہشت گردی کے مجرم ہیں، مقبوضہ جموں و کشمیر اور مقبوضہ فلسطین کے بارے میں عالمی قانون اور سلامتی کونسل کی قراردادوں پر عملدرآمد کرانے سے ہی پائیدار امن قائم ہو سکتا ہے۔ان کا کہنا تھا کہ اسلامی ممالک فلسطینیوں کو خوراک اور امدادی اشیاء کی فراہمی کے لئے کردار ادا کریں، عالمی ادارے تنازع کے پرامن اور منصفانہ حل کے لئے عملی کردار ادا کریں، انسانی جانوں کے مزید نقصان سے بچنے کے لئے فوری اقدامات کئے جائیں، پوری امت مسلمہ کی دعا ہے کہ مقبوضہ جموں و کشمیر اور فلسطین غاصبانہ قبضے سے آزاد ہوں۔مریم نواز کا مزید کہنا تھا کہ بہادر کشمیریوں اور فلسطینیوں کی قربانیوں سے آزادی کا سورج طلوع ہو کر رہے گا۔ انہوں نے فلسطینی شہداء کے درجات کی بلندی اور زخمیوں کی صحت یابی کی دعا بھی کی۔

اسلام آباد)پی پی آ ئی) پیپلز پارٹی کے سینئر رہنما نیئر بخاری نے ملک میں عام انتخابات کے بروقت انعقاد کا مطالبہ کرتے ہوئے کہا ہے کہ جنوری میں انتخابات نہ ہوئے تو پیپلزپارٹی سڑکوں پر نکلے گی اور دھرنا دے گی۔ میڈیا رپورٹس کے مطابق پیپلزپارٹی کے سیکریٹری جنرل رہنما نیئر حسین بخاری نے پاکستان ڈیموکریٹک موومنٹ (پی ڈی ایم) کے صدر اور جمعیت علمائے اسلام (ف) کے سربراہ مولانا فضل الرحمٰن کے الیکشن کے انعقاد کے حوالے سے تحفظات پر کہا کہ مولانا فضل الرحمٰن سے سوال ہے کہ ملک کون سنبھالے گا؟ مولانا فضل الرحمٰن صاحب کے پاس ملک کو چلانے کا کون سا فارمولا ہے؟ ہمارے پاس تو آئین کے مطابق الیکشن کا ہی فارمولا ہے، اس لیے الیکشن وقت پر ہونے چاہیں، اگر جنوری میں انتخابات نہ ہوئے تو پیپلزپارٹی سڑکوں پر نکلے گی، دھرنا ڈی چوک پر ہوگا یا کہیں اور اس کا فیصلہ بعد میں پارٹی کرے گی۔اسی طرح سینیٹر رضا ربانی نے بھی انتخابات کی فوری تاریخ کا اعلان کرنے کا مطالبہ کردیا، انہوں نے کہا کہ ملک میں انتخابات کی تاریخ کا فوری اعلان کیا جائے، الیکشن کمیشن پہلے ہی 90 روز میں انتخابات نہ کراکے آئین کی خلاف ورزی کرچکا ہے، اب الیکشن کمیشن کے پاس انتخابات میں تاخیر کے لیے حلقہ بندیوں کا جواز بھی نہیں رہا، انتخابات میں تاخیر سیاسی اور معاشی غیر یقینی کو بڑھا رہی ہے۔

ادھر پاکستان مسلم لیگ ن کے مرکزی رہنماء راجہ ریاض نے کہا ہے کہ حلقہ بندیوں پر اعتراضات ہورہے ہیں الیکشن جنوری میں نہیں ہوں گے، الیکشن فروری کے درمیان میں ہوں گے، کوئی تاخیر نہیں ہورہی، فروری میں الیکشن کیلئے مولانا فضل الرحمان بھی مان جائیں گے، پیپلزپارٹی سندھ میں نگران حکومت کے مزے لوٹ رہی ہے لیکن اسمارٹ گیم کھیل کر تاثر دے رہی کہ وہ اپوزیشن ہے، پیپلزپارٹی 16ماہ کی حکومت سے خود کو الگ کرنے کی کوشش کررہی ہے، مردم شماری پر دستخط کا واضح مطلب تھا کہ حلقہ بندیاں ہوں گی، پیپلزپارٹی عوام میں تاثر دے رہی کہ وہ فوری الیکشن چاہتی ہے، پیپلزپارٹی نے بھی مردم شماری پر دستخط کئے الیکشن میں تاخیر تو ہونی تھی، پیپلزپارٹی عوام میں کچھ تاثر دے رہی درپردہ کچھ اور بات ہے۔