تیمرگرہ)پی پی آ ئی)جماعتِ اسلامی کے امیر سراج الحق کا کہنا ہے کہ فلسطینی ظلم اور ظالمانہ قبضے کے خلاف لڑ رہے ہیں اور مسلمان حکمران ڈر رہے ہیں۔ امیر جماعت اسلامی سراج الحق نے  تیمرگرہ میں اجتماع سے خطاب کرتے ہوئے کہا کہ امریکہ نے اسرائیل کا ساتھ دیا لیکن مسلم دنیا خاموش تماشائی بنی ہوئی ہے،ہم بیت المقدس کی آزادی تک فلسطینیوں کے ساتھ کھڑے ہیں،فلسطینی ظلم اور ظالمانہ قبضے کے خلاف لڑ رہے ہیں اور مسلمان حکمران ڈر رہے ہیں، پاکستانی قوم حماس کے ساتھ تعاون کے لیے تیار ہے۔  سراج الحق کا مزید کہنا ہے کہ صدر، وزیراعظم اور آرمی چیف سے کہنا چاہتا ہوں پاکستان نظریاتی ملک ہے،پاکستان کے بانی قائداعظم نے اسرائیل کو ناجائز ریاست قرار دیا تھا، قائداعظم نے پہلے دن سے فلسطینوں کا ساتھ دینے کا اعلان کیا،پاکستان ہمیشہ اسرائیل کے مقابلے میں فلسطینیوں کا ساتھ دے گا، اس وقت 57 اسلامی ممالک کو حماس کا ساتھ دینا چائیے،اقوام عالم مظلوم فلسطینیوں کا ساتھ دیں۔ امیر جماعت اسلامی نے مسلم دنیا سے متعلق کہا کہ یہ مسلم دنیا کی غیرت کے امتحان کا وقت ہے،فلسطین کی آزادی کا سورج جلد طلوع ہو گا،مسجد اقصیٰ مسلمانوں کا مقدس مرکز ہے،مسجد اقصی کی حفاظت کے لیے جینا اور مرنا عظیم جہاد ہے۔

لاہور)پی پی آ ئی) نگران وزیراعلیٰ پنجاب نے پنجاب انسٹیٹیوٹ آف کارڈیالوجی کے ایمرجنسی بلاک کی اپ گریڈیشن کا حکم دے دیا۔وزیراعلیٰ محسن نقوی کی زیرصدارت پنجاب انسٹیٹیوٹ آف کارڈیالوجی (پی آئی سی) میں اجلاس ہوا، جس میں ایمرجنسی بلاک کی اپ گریڈیشن سے متعلقہ امور کا جائزہ لیا گیا۔اجلاس کے دوران محسن نقوی نے پنجاب انسٹی ٹیوٹ آف کارڈیالوجی کے ایمرجنسی بلاک کی اپ گریڈیشن 3 ماہ میں مکمل کرنے کا حکم دیتے ہوئے کہا کہ آئی سی یو اور آپریشن تھیٹرز نئے بنیں گے، 100 نئے بیڈز کا مزید اضافہ کیا جائے گا۔وزیراعلیٰ پنجاب نے بیرون ملک سے سرجنز کی خدمات لینے کی ہدایت کرتے ہوئے کہا کہ بورڈ کی منظوری کے بعد کنٹریکٹ پر بھی سرجنز کو ہائر کیا جائے۔اس موقع پر محسن نقوی نے ایمرجنسی کی اپ گریڈیشن کا جائزہ لیا، ہسپتال میں طبی سہولتوں اور وارڈز کا معائنہ کرتے ہوئے مریضوں کی عیادت بھی کی، طبی سہولتوں اور مفت ادویات کے بارے میں دریافت کیا۔زیرعلاج مریض نے محسن نقوی سے گفتگو کرتے ہوئے کہا کہ آپ ہی ہماری سنتے ہیں، وزیراعلیٰ کی ہدایت پر صوبائی وزیر ڈاکٹر جاوید اکرم اور ڈاکٹر فرقد عالمگیرنے مریض کو خود اٹینڈ کیا اور علاج تجویز کیا۔وزیراعلیٰ نے سیکرٹری تعمیرات و مواصلات کو ایمرجنسی بلاک کی اپ گریڈیشن کا کام شروع کرنے کے حوالے سے ہدایات بھی دیں۔صوبائی وزیر سپیشلائزڈ ہیلتھ کیئر ڈاکٹر جاوید اکرم، چیئرمین پی آئی سی ڈاکٹر فرقد عالمگیر، سیکرٹری صحت، سیکرٹری تعمیرات ومواصلات، کمشنر لاہور ڈویژن، سی ای او پی آئی سی ڈاکٹر انجم جلال، ایم ایس ڈاکٹر تحسین اور متعلقہ حکام بھی اس موقع پر موجود تھے۔

 کوئٹہ(پی پی آ ئی) صوبہ بلوچستان کے دارالحکومت کوئٹہ میں سڑک کنارے گاڑی کے قریب دھماکے کی اطلاعات موصول ہوئی ہیں۔  رپورٹس کے مطابق ورینج کی کوئلہ مائن فیلڈ کے قریب سڑک کنارے گاڑی کے قریب دھماکے میں ایک شخص جاں بحق ہوگیا، واقعے کی اطلاع ملتے ہی پولیس اور ریسکیو کی ٹیمیں جائے وقوعہ پر پہنچ گئیں اور لاش کو ہسپتال منتقل کردیا گیا۔پولیس حکام نے بتایا ہے کہ دھماکے میں جاں بحق شخص کی شناخت شبرمرزا کینام سے ہوئی ہے، جو پاکستان منرل ڈیویلپمنٹ کارپوریشن کے پروجیکٹ منیجر تھے، پروجیکٹ منیجر شبر مرزا پی ڈی ایم سی کارپوریشن کی کوئلہ مائن فیلڈ پر جا رہے تھے کہ راستے میں دھماکے کا شکار ہوگئے۔ چند روز قبل بلوچستان اس وقت بڑی تباہی سے بچا جب خفیہ اطلاع پر پولیس کے آپریشن کے دوران گاڑی سے اسلحے کی بڑی کھیپ اور دھماکا خیز مواد برآمد کر لیا گیا، نگراں وزیر داخلہ نے بتایا کہ پولیس نے خفیہ اطلاع پر کارروائی کرتے ہوئے کار سے اسلحے کی بڑی کھیپ برآمد کی جس کو دہشت گردی کی غرض سے نامعلوم مقام پر منتقل کیا جارہا تھا، پولیس فورس نے بروقت کارروائی کرکے شہر کو تباہی سے بچالیا، گاڑی اور واقعے کے حوالے سے مزید تحقیقات جاری ہے، گاڑی سے 35 کلو گرام دھماکا خیز مواد بی برآمد ہوا، اسپیشل برانچ کی بم ڈسپوزل ٹیم دھماکہ خیز مواد کو مہارت سے ناکارہ بنا دیا، جس پر اہلکاروں میں تعریفی اسناد دیے جائیں گے۔اسی طرح سکیورٹی فورسز کے خیبر کے علاقے تیراہ میں آپریشن کے دوران کمانڈر سمیت 3دہشتگرد ہلاک ہو گئے، پاک فوج کے شعبہ تعلقات عامہ آئی ایس پی آر سے معلوم ہوا کہ سیکیورٹی فورسز نے خیبر کے علاقے تیراہ میں آپریشن کیا، فورسز نے دہشتگردوں کی موجودگی کی اطلاع پر آپریشن کیا، فائرنگ کے شدید تبادلے میں 3 دہشت گرد ہلاک ہو گئے، دہشتگردوں میں کمانڈر کفایت عرف طور عدنان میں بھی شامل ہے، ہلاک دہشتگرد سیکیورٹی فورسز کیخلاف متعدد کارروائیوں میں سرگرم تھے۔

لاہور(پی پی آ ئی) پاکستان مسلم لیگ ن کے مرکزی رہنماء راجہ ریاض نے کہا ہے کہ حلقہ بندیوں پر اعتراضات ہورہے ہیں الیکشن جنوری میں نہیں ہوں گے،الیکشن فروری کے درمیان میں ہوں گے کوئی تاخیر نہیں ہورہی، فروری میں الیکشن کیلئے مولانا فضل الرحمان بھی مان جائیں گے،پیپلزپارٹی سندھ میں نگران حکومت کے مزے لوٹ رہی جبکہ اسمارٹ گیم کھیل کر تاثر دے رہی کہ وہ اپوزیشن ہے۔انہوں نے ایک نجی ٹی وی کے پروگرام میں گفتگو کرتے ہوئے کہا کہ پیپلزپارٹی 16ماہ کی حکومت سے خود کو الگ کرنے کی کوشش کررہی ہے، مردم شماری پر دستخط کا واضح مطلب تھا کہ حلقہ بندیاں ہوں گی، پیپلزپارٹی عوام میں تاثر دے رہی کہ وہ فوری الیکشن چاہتی ہے، پیپلزپارٹی نے بھی مردم شماری پر دستخط کئے الیکشن میں تاخیر تو ہونی تھی، پیپلزپارٹی عوام میں کچھ تاثر دے رہی درپردہ کچھ اور بات ہے، پیپلزپارٹی سندھ میں نگران حکومت کے پورے مزے لوٹ رہی ہے، پیپلزپارٹی اسمارٹ گیم کھیل کر تاثر دے رہی کہ وہ اپوزیشن ہے، حلقہ بندیوں پر اعتراضات ہورہے ہیں الیکشن جنوری میں نہیں ہوں گے، فروری کے درمیان میں الیکشن ہونے ہیں تاخیر نہیں ہورہی، فروری میں الیکشن کیلئے مولانا فضل الرحمان بھی مان جائیں گے، 15فروری کے آس پاس الیکشن ہوجائیں گے۔نوازشریف بھی آرہے ہیں زیادہ واضح ہوگیا کہ الیکشن ہونے ہیں۔پاکستان کے عوام جس طرح مشکل کی زندگی گزار رہے ہیں،جس طرح عوام پر مہنگائی، بچوں کی تعلیم کا بوجھ ہے، ہمیں عوام کی مشکلات کو کم کرنا چاہیئے، عوام کو امید ہے نوازشریف ہی انہیں مسائل سے نکال سکتے ہیں،ماضی کو نہیں بلکہ معیشت کی کی بہتری کی طرف دیکھیں گے، شہبازشریف نے ملک کو ڈیفالٹ ہونے سے بچا لیا، اگر ڈیفالٹ ہوتا تو آج ملک میں 500روپے لیٹر تیل ہوتا، عمران خان معاشی داخلی اور خارجہ سطح پر بیڑہ غرق کرکے گئے تھے۔