بیلو ہوریزونٹے:ایٹلیٹکو منیرونے کوپا ڈوبرازیل فٹ بال ٹورنامنٹ کے فائنل میں کروزیروکو شکست دے دی۔ ایٹلیٹکو منیرونے کوپا ڈوبرازیل کے فائنل کے پہلے لیگ میں کروزیرو کے خلاف0-2سے کامیابی حاصل کر0-1کی برتری حاصل کرلی۔ایٹلیٹکو منیروکے اسٹرائیکر ڈیاگو ٹریڈیلی نے کامیابی کے بعد کہا کہ ہم فائنل کے دوسرے لیگ میں ابھی کامیابی کا بھرپور دفاع کریں گے،ان کا کہناتھا کہ دوسرے میچ کے حالات ہمارے لیے سازگار ہوں گے۔ دوسری جانب کروزیروکے مڈفیلڈر ایورٹن ریبرو نے اپنی ٹیم کی شکست پر تنقید کرتے ہوئے کہا کہ ہمارے کھلاڑیوں میں مقابلے کی لگن نظر نہیں آرہی تھی،ٹیم میںجارحانہ پن نظرنہیں آیا،ان کا کہنا تھا کہ اب ہمیں اگلے میچ کی طرف توجہ دینے کی اشد ضرورت ہے، اور ہم فائنل کا نتیجہ بدلنے کی صلاحیت رکھتے ہیں۔ فائنل کا دوسرا میچ 26نومبر کو منیرو اسٹیڈیم میں کھیلاجائے گا۔

 کویت سٹی: ایشین کرکٹ کونسل انڈر 19پریمئر لیگ کے میچوں میں ملائیشیا اورافغانستان نے اپنے اپنے میچوں میں کامیابی حاصل کرلی۔ کویت کے دارالحکومت میں کھیلے گئے 10ویں میچ میں ملائیشیا نے سعودی عرب کو دس وکٹوں سے شکست دے دی،سعودی عرب کی ٹیم نے پہلے کھیلتے ہوئے 26ویں اوور میں صرف 39رنز بناکر آﺅٹ ہوگئی،سعودی عرب کی جانب سے کوئی بھی بیٹسمین ڈبل فیگر میں داخل نہیں ہوسکا ،ملائیشیا کے ویراندریپ سنگھ نے تین وکٹیں حاصل کیں، ملائیشیا نے ہدف چھٹے اوور میں بغیر کسی نقصان کے پورا کرلیا۔انڈر 19پریمئر لیگ کے 11ویں میچ میں افغانستان نے نیپال کو5وکٹوں سے شکست دے دی۔ نیپال نے پہلے بیٹنگ کی اور 134رنز کا ہدف دیا ،افغانستان کے راشدخان نے چار وکٹیں حاصل کیں ، جواب میں افغانستان کی ٹیم نے 36اوورمیں شاہداللہ کے شان دار52رنز کے ذریعے ہدف مقرری اوور سے پہلے حاصل کیا۔

 جیجو، جنوبی کوریا: انٹرنیشنل باکسنگ ایسوسی ایشن نے باکسنگ انڈیا کو ورلڈ باڈی کا مستقل رکن بننے کی منظوری دے دی۔ جنوبی کوریا کے شہر جیجو میں منعقدہ انٹرنیشنل باکسنگ ایسوسی ایشن کے کانگرس کو اجلاس ہوا جس میں بھارت کو ورلڈ باڈی میں مستقل رکنیت دینے کی منظوری دی گئی۔ باکسنگ انڈیا کے صدر سندیپ جاجوڈیا کا کہنا ہے کہ ہمیں اس تازہ پیش رفت پر بہت خوشی ہے ،ان کا کہناہے کہ ہماری پہلی ترجیح بھارت کی وزارت کھیل سے اس کی منظوری اور انڈین اولمپک ایسوسی ایشن کی رکنیت حاصل کرناہے۔ باکسنگ انڈیا کے سیکرٹری جنرل جے کوولی کا کہنا ہے کہ فیڈریشن بھارتی باکسروں کو بین الاقوامی مقابلوں میں حصہ لینے کے لیے مدد کرے گی۔