نیویارک: برازیلین فٹبال لی جنڈ پیلے کو امریکی یونیورسٹی ہوفسٹرا کی جانب سے انسانی خدمات کے اعتراف میں اعزازی ڈگری سے نوازا جائے گا ۔ پیلے امریکی فٹ بال چیمپئن شپ سے قبل اپنے سابق کلب نیویارک کوسموس کی تقریبات میں شرکت کے لئے اپریل میں امریکا جائیں گے ۔ انہوں نے 1975سے 1979تک کوسموس کلب کی نمائندگی کی تھی اورآخری سیزن میں اپنی ٹیم کو ٹائٹل جتوانے میں کامیاب رہے ۔

جوہانسبرگ: جنوبی افریقی سائیکلسٹ جین نیل کیپ ٹاﺅن میں کیئرین ریس کے دوران حادثے میں جان سے ہاتھ دھو بیٹھے۔ جین نیل گلاسگو میں ہونے والے دولت مشترکہ گیمز کے لئے کوالیفائنگ مقابلے میں شریک تھے ۔ انہوں نے گزشتہ سال یوسی آئی ٹریک ورلڈ کپ میں اپنے ملک کی نمائندگی کی تھی ۔

اسلام آباد: پاکستان کی چھ رکنی ٹین پن باﺅلنگ ٹیم 19سے 30مئی تک بنکاک میں کھیلی جانے والی 23ویں ایشین ٹین پن باﺅلنگ چیمپئن شپ میں شرکت کرے گی ۔ پاکستان باﺅلنگ فیڈریشن کے جنرل سیکریٹری اعجاز رحمان نے کہاہے کہ ہمارے قومی کھلاڑی چیمپئن شپ میں شاندار کارکردگی کا مظاہر ہ کرے گی ۔انہوں نے کہا کہ اگر حکومتی سطح پر باﺅلنگ کلب بن جائے تو اس سے کھلاڑیوں کو بہت فائدہ ہوگا۔

اسلام آباد: اسلام آباد ہائیکورٹ کے جسٹس شوکت عزیز صدیقی نے ذکاءاشرف کی بر طرفی اور نجم سیٹھی کی تقرری کے خلاف درخواست کی مزید سماعت سے معذرت کر لی۔ اسلام آباد ہائیکورٹ کے جسٹس شوکت عزیز صدیقی نے سابق چیئرمین پی سی بی ذکاءاشرف کی برطرفی، بورڈ کی معطلی اور نجم سیٹھی کی بطور چیئرمین پی سی بی تقرری کے خلاف درخواست کی سماعت کی۔ دوران سماعت جسٹس شوکت عزیز صدیقی نے درخواست کی سماعت سے معذرت کر لی۔ ان کا کہنا تھا کہ ذکاءاشرف کی بر طرفی کا فیصلہ اسی عدالت نے کیا تھا اس لیے کیس چیف جسٹس کو بھجوا رہے ہیں۔ ملتان کرکٹ بورڈ کے ممبر احمد نواز نے عبد الرزاق رجب ایڈووکیٹ کی وساطت سے درخواست دائر کی تھی۔ درخواست میں بورڈ کی معطلی اور نجم سیٹھی کی تعیناتی کو غیر قانونی اور غیر جمہوری قرار دیا تھا۔