ماسکو: رومانیہ کی سیمونا ہالیپ نے سمانتھاسٹوسر کو کریملن کپ کے فائنل میں ہرا کر ٹائٹل اپنے نام کرلیا ۔ سیمونا ہالیپ نے اپنے ٹینس سیزن کا یہ پانچوں ٹائٹل جیتا ہے ۔ روس کے شہر ماسکو میں جاری کریملن کپ کے فائنل میں سیمونا ہالیپ کا مقابلہ سابقہ یوایس اوپن چیمپئن سمانتھا سٹوسر کے ساتھ ہوا ۔ سیمونا نے سٹوسر کو دو اسٹریٹ سیٹس میں شکست دیدی ۔ سیمونا کی فتح کا اسکور 7-6(1)اور6-2رہا ۔سیمونا نے اپنی کامیابی پر انتہائی خوشی کا اظہار کرتے ہوئے آئندہ بھی بہترین کارکردگی کے عزم کا اظہار کیا۔

نئی دہلی: دوسال کی علیحدگی کے بعد پاکستان ٹینس سٹار اعصام الحق اور بھارتی ٹینس سٹار روہن بوپارا ایک ساتھ ایکشن میں نظر آئیں ۔حریف ملکوں کے دونوں کھلاڑی 2014کا سیزن ایک ساتھ کھیلیں گے ۔ دونوں کھلاڑیوں کی جوڑی 2011گیارہ میں اُس وقت ٹوٹ گئی جب روہن بوپارہ نے اعصام الحق سے علیحدگی کا فیصلہ کرتے ہوئے اپنے ہم وطن مہیش بوپتی کے ساتھ جوڑی بنانے فیصلہ کیا۔اعصام الحق اور پوبارا کی جوڑی نے آخری مرتبہ اے ٹی پی ورلڈ ٹورز فائنلز کے ایونٹ میں حصہ لیا تھا ۔روہن بوپارا نے اعصام الحق کے ساتھ دوبارہ جوڑی بنانے پر انتہائی مسرت کا اظہار کرتے ہوئے کہا ہے کہ مجھے اعصام جیسے ساتھی کی ضرورت ہمیشہ محسوس ہوئی ہے اور میں سمجھتا ہوں کہ ہماری جوڑی آسانی کے ساتھ کامیابی حاصل کرسکتی ہے ۔بوپارا اے ٹی پی کی عالمی رینکنگ میں اس وقت پانچویں پوزیشن پر براجمان ہیں ۔اعصام الحق نے اپنے سیزن ڈچ کھلاڑی جولین روجر کے ساتھ کھیلے لیکن سوائے میامی ماسٹرز کے یہ جوڑی اچھی کارکردگی نہ دکھا سکی۔

دبئی: دنیا کی نمبر ون ٹیم جنوبی افریقہ کوپہلے ٹیسٹ میں پچھاڑنے کے بعد قومی ٹیم کی نظریں دوسرے ٹیسٹ پرجم گئیں۔ پاکستان نے جنوبی افریقہ کو ابوظہبی ٹیسٹ میں سات وکٹوں سے شکست دے کرسیریز میں ایک صفر کی برتری حاصل کرلی تھی۔ پاکستان نے میچ چار دن میں ہی ختم کردیا تھا۔ پاکستان اور جنوبی افریقہ کی ٹیموں نے ابوظہبی سے دبئی پہنچ کر پریکٹس کا آغاز کردیا۔ پروٹیز بلے باز ہاشم آملہ نجی مصروفیات کے سبب جنوبی افریقہ روانہ ہوگئے ہیں ان کی دوسرے ٹیسٹ میں شرکت مشکوک ہے۔ پاکستان اور جنوبی افریقہ کے درمیان دوسرا اور آخری ٹیسٹ ت23 اکتوبرسے دبئی میں کھیلا جائے گا۔ سیریز میں برتری کے بعد قومی ٹیم کی نظریں دنیا کی نمبرون ٹیم کے خلاف وائٹ واش پر لگی ہوئی ہیں۔ پروٹیز کے خلاف سیریز میں کامیابی پاکستان کوٹیسٹ رینکنگ میں چھٹی سے چوتھی پوزیشن پر پہنچا دے گی۔

لندن: انگلینڈ نے برازیل میں کھیلے جانے والے فٹبال ورلڈکپ کےلئے کوالیفائی کرلیا ۔ انگلش کپتان اسٹیفن جیراڈ اور وین رونی نے پولینڈ کے خلاف گول کرکے ورلڈ کپ کے لئے جگہ پکی کرلی ۔ ویمبلے میں کھیلے گئے میچ کا آغاز تیز رفتاری سے ہوا اور دونوں ٹیموں نے مخالف ٹیم کے گول پر حملے کیے تاہم ہاف ٹائم سے چند منٹ قبل مانچسٹر یونائیٹڈ کے وین رونی نے انگلینڈ کو ایک صفر کی برتری دلادی ۔ میچ ختم ہونے سے دو منٹ قبل انگلش کپتان اسٹیفن جیراڈ نے فٹبال کو جال میں پہنچا کر برتری ڈبل کردی ۔واضح رہے انگلینڈ ورلڈ کپ کوالیفائنگ راﺅنڈ میں اب تک ناقابل شکست ہے۔

لندن: انگلش پریمیئر لیگ میں فٹبال کلب آرسنل کی ٹاپ پوزیشن برقرار ہے ۔ اب تک پریمیئر لیگ کے سات مرحلے مکمل ہوچکے ہیں ۔آرسنل نے سات میچوں میں سے پانچ میںکامیابی حاصل کی ہے ،ایک میچ ڈرا ہوا جبکہ ایک میں اُس کو شکست کا سامنا کرنا پڑا۔ آرسنل کے 16پوائنٹس ہیں ۔ لیور پول کی ٹیم کے بھی 16پوائنٹس ہیں تاہم اس نے آرسنل کے14گول کے مقابلے میں کل 11گول کیے ہیں ۔ چیلسی کلب 14پوائنٹس کے ساتھ تیسرے نمبر پر ہے ۔مانچسٹر یونائیٹڈ اپنی تاریخ کے خراب ترین دور سے گزر رہی ہے اور اس کی 10ویں پوزیشن ہے ۔ مانچسٹر یونائیٹڈ کو اب تک سات میچوں میں سے صرف تین میں کامیابی حاصل ہوئی ہے ۔اور اس کے 10پوائنٹس ہیں ۔

فلپ آئی لینڈ: دفاعی چیمپئن یاماہا کے جارج لورینزو نے آسٹریلین موٹو جی پی کے لئے پول پوزیشن حاصل کرلی۔ فلپ آئی لینڈ سرکٹ پر بھی لورینزو تیز ترین رائیڈر رہے۔ پریکٹس سیشن میں حادثے کا شکار ہونے والے مارک مارکیوز کوالیفانگ سیشن میں بھی لورینزو کو پیچھے نہ چھوڑ سکے۔لورینزو آسٹریلین جی پی جیت کر چیمپئن شپ لیڈر مارکیوز کے قریب آسکتے ہیں۔ مارکیوز چیمپئن شپ ٹیبل پر298 پوائنٹس کے ساتھ لیڈ کررہے ہیں۔ لورینزو کا 255 پوائنٹس کے ساتھ دوسرا نمبر ہے۔ لورینزو نے ایک منٹ ستائیس اعشاریہ آٹھ نو سیکنڈز کے ساتھ آسٹریلین موٹو جی پی کے لئے پول پوزیشن حاصل کی۔یہ لورینزو کے کیرئیر کی 28ویں پول پوزیشن ہے۔ لورینزو کے ہم وطن مارکیوز اعشاریہ دودو ایک سیکنڈز کے فرق سے دوسرے نمبر پر رہے۔