لندن: پاکستانی اداکارہ وینا ملک نے سیاست میں حصہ لینے کا اعلان کر دیا، کہتی ہیں نواز شریف سمجھدار سیاستدان ہیں مگر ان کی فیملی عمران خان کو پسند کرتی ہے ، شیخ رشید کی دعوت پر جلد لال حویلی چائے پینے جائیں گی۔لندن میں اپنے شوہر کے ہمراہ میڈیا سے گفتگو کرتے ہوئے اداکارہ وینا ملک کا کہنا تھا کہ وہ جلد پاکستان واپس جا رہی ہیں اور عوام کی خدمت کے لئے سیاست میں حصہ لیں گی۔انہوں نے شیخ رشید کی دعوت قبول کر لی ہے اور وہ اپنے شوہر کے ساتھ چائے پینے لال حویلی جائیں گی۔وینا کا کہنا تھا کہ وہ نواز شریف کی معترف ہیں مگر ان کا خاندان پی ٹی آئی کا حامی ہے۔ایشیا کپ میں بھارت کے خلاف پاکستان کی جیت پر مبارکباد دیتے ہوئے کہا کہ پوری ٹیم اور خاص طور پر شاہد آفریدی نے شاندار کھیل پیش کیا۔

اسلام آباد: وزیراعظم نواز شریف نے کہا ہے کہ امن کیلئے آمادہ طالبان گروپس کے ساتھ مذاکرات اور دہشت گردی کرنیوالوں کیخلاف کارروائی کی جائے گی۔وزیراعظم نوازشریف نے اعلی سطح کے اجلاس کی صدارت کرتے ہوئے کہا کہ حکومت امن کیلئے کو ششیں کررہی ہے،جبکہ دہشتگرد مسلسل نقصان پہنچا رہے ہیں،جوگروپ امن کیلئے مذاکرات کرے گا،اس کی ساتھ بات چیت کی جائے گی،امن تباہ کرنیوالے گروپس کے ساتھ مذاکرات نہیں،فوری جوابی کاروائی کریں گے،اجلاس میں آرمی چیف جنرل راحیل شریف،ڈی جی آئی ایس آئی ،وفاقی وزراءچوہدری نثار،خواجہ آصف،اسحاق ڈار،پرویزرشید شامل تھے،ذرائع کے مطابق طالبان سے حکومتی مذاکراتی کمیٹی کے ارکان میں بھی اختلافات پائے جاتے ہیں،وزیراعظم آج کے اجلاس میں حکومتی مذاکرتی کمیٹی کے اراکین کے اختلافات کاجائزہ لیں گے۔

اسلام آباد: اسلام آباد کی ضلع کچہری میں دہشتگردوں نے حملہ کر دیا ، واقعے میں11 افراد جاں بحق 35زخمی ہو گئے ، صدر ، وزیر اعظم سمیت ملک بھر کی سیاسی قیادت نے واقعہ کو افسوسناک قرار دیا ہے ، کالعدم تحریک طالبان نے واقعہ سے لاتعلقی کا اظہار کر دیا ۔اسلام آباد میں ایف ایٹ کچہری میں صبح نو بجے کے قریب دہشت گردوں نے حملہ کر دیا۔حملہ آوروں نے دستی بم پھینکے اور گولیاں برسانا شروع کر دیں۔ واقعے کے فوری بعد کچہری اور اس سے متصل مارکیٹ میں افراتفری اور بھگدڑ مچ گئی۔لوگوں جانیں بچانے کیلئے ادھر ادھر بھاگنے لگے۔عینی شاہدین کے مطابق حملہ آوروں کے پاس ہینڈ گرنیڈ بھی تھے۔حملہ آوروں نے ججوں اور وکلاءچیمبرز کو بھی نشانہ بنایا۔دہشت گردی کے اس واقعے میں ایڈیشنل اینڈ سیشن جج رفاقت اعوان بھی شہید ہو گئے۔پندرہ بیس منٹ تک ہونے والی فائرنگ سے خواتین وکلاءسمیت درجنوں افراد زخمی ہو گئے۔زخمی ہونے والوں میں وکلاءکی تعداد زیادہ ہے۔ واقعہ کے فوری بعد رینجرز، پولیس اور ایلیٹ فورس کے کمانڈوز کی بھاری نفری موقع پر پہنچ گئی اور علاقے کو گھیرے میں لے لیا۔ سیکورٹی فورسز نے کچہری سمیت پورا علاقہ خالی کرا کے سرچ آپریشن کیا اور جائے وقوعہ سے شواہد اکٹھے کرنا شروع کر دیئے۔ آئی جی اسلام آباد کا کہنا تھا کہ دو حملہ آوروں نے گرنیڈ پھینکنے کے بعد خود کو اڑا لیا۔امدادی ٹیموں نے فوری طور پر زخمیوں کو پمز ہسپتال اسلام آباد منتقل کر دیا گیا جہاں متعدد زخمی تشویشناک حالت میں زندگی اور موت کی کشمکش میں مبتلا ہیں۔ تحریک طالبان کے ترجمان شاہد اللہ شاہد نے کہا کہ ایسے واقعات کی شدید مذمت کرتے ہیں،ہمارا ان واقعات سے کوئی تعلق نہیں ہے۔پروفیسر جاوید اکرم نے بتایا کہ جاں بحق ہونے والوں میں زیادہ تعداد وکلاءکی ہے۔

اسلام آباد: مولانا سمیع الحق نے کہا ہے کہ حکومت بغیر ثبوت کسی کارروائی کو طالبان کے کھاتے میں نہ ڈالے ، مذاکراتی عمل کو داخلی سازشوں سے بچایا جائے ، منزل کی طرف چل پڑے ہیں ، مذاکرات ضرور کامیاب ہوں گے ، دوسری جانب حکومت اور طالبان کمیٹیوں کے درمیان مذاکرات کے لئے آج لائحہ عمل تیار ہو گا۔عمرے کی ادائیگی کے بعد وطن واپس پہنچنے پر اسلام آباد ائیرپورٹ پر بات کرتے ہوئے سمیع الحق نے کہا کہ امن دشمنوں کو بے نقاب کرنا ہو گا۔امریکا ، بھارت مذاکراتی عمل کو سبوتاڑ کرنا چاہتے ہیں۔انہوں نے کہا کہ حکومت بغیر تحقیق کسی کارروائی کو طالبان کے کھاتے میں نہ ڈالے۔طالبان مذاکراتی کمیٹی کے رکن مولانا سمیع الحق کا کہنا تھا منزل کی طرف چل پڑے ہیں۔مذاکرات ضرور کامیاب ہوں گے ، مذاکراتی عمل کو داخلی سازشوں سے بچایا جائے۔دریں اثناءاسلام آباد ائیرپورٹ پر مولانا سمیع الحق اور عمران خان میں ملاقات ہوئی جس میں جنگ بندی کو خوش آئند قرار دیا گیا۔عمران خان نے کہا کہ جنگ بندی کے اعلان سے مذاکرات کے حامیوں اور مخالفین کا پتہ چل جائے گا۔دونوں رہنماوں میں اسی ہفتے تفصیلی ملاقات پر اتفاق بھی ہوا۔دوسری جانب ذرائع کے مطابق طالبان سے مذاکرات کے لئے قائم حکومتی کمیٹی کے مستقبل کا فیصلہ بھی آج کیا جائے گا۔ذرائع کے مطابق حکومتی کمیٹی قائم رکھنا ہو گی تو اِس میں توسیع ہو گی اور فرنٹ پر وزیر داخلہ کو بٹھانا ہوگا۔ حکومتی کمیٹی کے ذرائع کا کہنا ہے کہ طالبان کے علاوہ بھی بعض قوتیں دہشت گردی کے واقعات میں ملوث ہیں۔

اسلام آباد: چیف جسٹس آف پاکستان جسٹس تصدق حسین جیلانی نے اسلام آباد کچہری واقعہ کا از خود نوٹس لیتے ہوئے آئی جی، چیف کمشنر اسلام آباد اور سیکرٹری داخلہ کو منگل کو رپورٹ سمیت طلب کر لیا۔ تفصیلات کے مطابق پیر کو اسلام آباد کے ایف ایٹ کچہری میں دہشت گردوں کی جانب سے فائرنگ اور خود کش حملے میں ایڈیشنل سیشن جج سمیت 11 افراد جاں بحق اور 35 کے قریب زخمی ہوگئے تھے۔ دہشت گردی کے اس واقعہ کا چیف جسٹس آف پاکستان جسٹس تصدق حسین جیلانی نے از خود نوٹس لے لیا ہے اور آئی جی اسلام آباد سکندر حیات وسیکرٹری داخلہ اور چیف کمشنر کو طلب کر لیا ہے۔ جبکہ چیف جسٹس نے سیکریٹری داخلہ کو بھی نوٹس جاری کر دیا۔ واقعہ کی تحقیقات کے لئے تین رکنی بنچ تشکیل دے دیا۔