کراچی(ی پی آ ئی )خواتین کے حقوق کی علمبردار ایرانی خاتون نرگس محمدی نے نوبیل کا امن انعام اپنے نام کر لیا ۔ تفصیلات کے مطابق ایران سے تعلق رکھنے والی ہیومن راءٹس ایکٹیوسٹ قیدی نرگس محمدی امن کے نوبل انعام برائے سال 2023 کی حقدار ٹھہریں جنھوں نے خواتین کے حقوق کے لیے آواز اُٹھانے پر قید و بند کی صعوبتیں برداشت کیں اور اب بھی جیل میں سزا بھگت رہی ہیں ۔ نرگس محمدی کو ایران میں خواتین پر ظلم کے خلاف جدوجہد پر نوبیل امن انعام کا حقدار قرار دیا گیا،سربراہ نوبیل کمیٹی بیرٹ ریس اینڈرسن کا کہنا ہے کہ یہ انسانی حقوق اور آزادی کے لیے نرگس محمدی کی جدوجہد کا اعتراف ہے ۔ امن کمیٹی کے مطابق نرگس محمدی نے خواتین کے حقوق اور آزادی کی بہت بھاری قیمت چکائی، انہیں 13 مرتبہ گرفتار کیا گیا، 5 مرتبہ مجرم ٹھہرایا گیا اور انہیں مجموعی طور پر 31 برس قید اور 154 کوڑوں کی سزا سنائی گئی ۔ غیر ملکی خبر ایجنسی کے مطابق ایران کی انسانی حقوق کی علمبردار نرگس محمد تہران کی ایون جیل میں اسیر ہیں اور متعدد مقدمات کا سامنا کر رہی ہیں ۔ اس کے علاوہ نرگس محمدی ایرانی حکومت کے خلاف پراپیگنڈا پھیلانے کے مقدمات کا سامنا بھی کر رہی ہیں ۔

کراچی(ی پی آ ئی )ایل پی جی انڈسٹریز ایسوی ایشن کے چیئرمین عرفان کھوکھر نے انکشاف کیا ہے کہ ملک میں ایل پی جی کے نام زہریلی گیس فروخت کی جا رہی ہے جو جان لیوا حادثات کا باعث بن سکتی ہے ۔ تفصیلات کے مطابق چئیرمین ایل پی جی انڈسٹریز ایسوی ایشن عرفان کھو کھر نے کہا کہ زہریلی ایل پی جی فروخت کرنے والے سستی گیس مہنگی بیچ کر ناجائز منافع کمانے میں مصروف ہیں جبکہ ایل پی جی میں ملاوٹ کرنےوالی غیر معیاری زہریلی گیس 15 روپے کلو میں امپورٹ کی جارہی ہے ۔ چئیرمین ایل پی جی انڈسٹریز نے کہا کہ سستی گیس امپورٹ کرنے کے بعدزہریلی ایل پی جی 250 سے 280 روپے کلو میں عوام کو فروخت ہورہی ہے،غیر معیاری اور مضر صحت،خطرناک ایل پی جی منگوا کر پیشر مکس کیا جاتا ہے جبکہ مکس کرنے سے اس کا پریشر بہت بڑھ جاتا ہے ۔ عرفان کھوکھر نے کہا کہ سی او ٹو مکس کرنے سے سلینڈر بلاسٹ کے جان لیوا حادثات ہورہے ہیں ،ایران میں پانچ ریفائنریاں جہاں پر یہ زہریلا مواد ضائع کرنے کے بجائے وہ جعلی جی ڈی پر پاکستان آرہا ہے جبکہ پڑوسی ملک سے پانچ ریفائنریوں سے زہریلی گیس کی ملاوٹ والی ایل پی جی پاکستان امپورٹ کی جارہی ہے ۔ انہوں نے کہا کہ عالمی مارکیٹ میں ایل پی جی کی قیمتوں میں اضافے کے بعد منافع خوروں نے غیر معیاری گیس کی امپورٹ میں اضافہ کردیا ہے،غیر میعاری ایل پی جی ملک میں امپورٹ ہونے سے معیاری ایل پی جی کے امپورٹرز کا کام شدید متاثر ہوا ہے،موسم سرما میں ایل پی جی کی قلت پیدا ہونے کا بھی خدشہ ہے،جبکہ نومبر،دسمبر اور جنوری میں ایل پی جی کی ڈیمانڈ ڈیڑھ لاکھ ٹن ہو جائے گی،حکومت اور انتظامیہ غیر معیاری زہریلی گیس کی امپورٹ پر فوری پابندی لگائے ۔

لاہور)پی پی آ ئی )پاکستان ویمنز ایمرجنگ کیمپ کے لیے 28 کھلاڑیوں کے ناموں کا اعلان کردیاگیا ۔ تفصیلات کے مطابق پاکستان ویمنز ایمرجنگ کیمپ 7 سے 17 اکتوبر تک لاہور کنٹری کلب مریدکے میں ہوگا،سیریز اور ٹورنامنٹ کے شیڈول کا اعلان بعد میں کیا جائے گا،سلیکشن کمیٹی کیمپ کے اختتام پر 15 رکنی کمیٹی ٹیم کا اعلان کرے گی ۔ کیمپ کے لیے اعلان کردہ 28 کھلاڑیوں میں پانچ کھلاڑیوں میں گل فیروزہ, رامین شمیم، شوال ذوالفقار، سیدہ عروب شاہ اور طوبٰی حسن جو پہلے ہی پاکستان کی نمائندگی کرچکی ہیں ۔ سلیکٹرز نے کیمپ میں 12 بیٹرز،8 اسپنرز، 6 فاسٹ بولرز اور 2 وکٹ کیپرز کو شامل کیا ہے ۔ کھلاڑیوں میں کائنات، انوشے ناصر، ایمان فاطمہ، فرزانہ فاروق، وکٹ کیپر، فاطمہ خان، فاطمہ شاہد بٹ،فاطمہ زہرا، گل فیروزہ، گل رخ، حمنہ بلال، خدیجہ چشتی، لبنی بہرام، ماہم منظور،ماہ نور قیوم، معصومہ زہرا، نجیہہ علوی،وکٹ کیپر،نورین یعقوب، رامین شمیم، صائمہ ملک، صائقہ ریاض،شوال ذوالفقار،سیدہ عروب شاہ،تسمیہ رباب، طوبی حسن، وجیہہ منیر، وردا یوسف، یسری عامر اور زونیش عبدالستارشامل ہیں ۔

لاہور) پی پی آ ئی ) معذوری بھی علم کی راہ میں رکاوٹ نہ بن سکی، معذور طالب علم نعمان بشیر نے سپیشل ایجوکیشن بورڈ کے تحت میٹرک کے سالانہ امتحان میں پنجاب بھر میں پہلی پوزیشن حاصل کی ہے ۔ پیدائشی طور پر ٹانگوں سے معذور طالب علم نعمان بشیر 8 سال سے گورنمنٹ سپیشل ایجوکیشن سکول حافظ آباد میں زیر تعلیم ہے ۔ نعمان بشیر نے میٹرک کے سالانہ امتحان میں 1100 میں سے 758 نمبر حاصل کرکے صوبے بھر میں پہلی پوزیشن حاصل کی ہے جس پرصوبائی سیکرٹری سپیشل ایجو کیشن پنجاب صائمہ سعید اور یونیسف کے نمائندے نے نعمان بشیر اور ٹیچر عاصمہ بتول کو اعزازی سرٹیفکیٹ اور میڈل سے نوازا ۔ اس موقع پر نعمان بشیر نے بتایا کہ وہ سکول سے واپس آکر اپنے والد کے ساتھ جوتے بنانے کا کام کرتا ہے تاکہ اپنی پڑھائی کے اخراجات پورے کر سکے ۔ ہونہار طالبعلم کمپیوٹر کی تعلیم حاصل کرنے کا خواہشمند ہے اور اس کی خواہش ہے کہ وہ اعلیٰ تعلیم حاصل کر کے ملک و قوم کا نام بلند کر ے ۔