ویانا: فرانس کے جوولفریڈ سونگا اور ٹامی ہاس نے آسٹریا اوپن ٹینس ٹورنامنٹ کے سیمی فائنل کے لئے کوالیفائی کرلیا۔ویانا میں جاری ٹورنامنٹ کے کوارٹرفائنل میں ٹاپ سیڈ فرانس کے جوولفریڈ سونگا نے آسٹریا کے ڈومینک تھیم کو دلچسپ مقابلے کے بعد زیر کرتے ہوئے آخری چار کھلاڑیوں میں جگہ بنائی۔فیصلہ کن سیٹ میں دونوں کھلاڑیوں کے درمیان کانٹے کا مقابلہ ہوا۔جس میں سونگا نے ٹائی بریک پر کامیابی حاصل کی۔ فرانسیسی کھلاڑی کی فتح کا اسکور چھ چار، تین چھ اور سات چھ رہا۔ ایک اور میچ میں سیکنڈ سیڈ جرمنی کے ٹامی ہاس نے جمہوریہ چیک کے راڈک اسٹیپنک کو اسٹریٹ سیٹس میں سات چھ اور چھ تین سے شکست دے کر سیمی فائنل تک رسائی حاصل کی۔ادھر موسکو میں جاری کریملن کپ ٹینس میں اٹلی کی سویتلانا کزنتسووا اور آسٹریلیا کی سمانتھا اسٹوسر نے سیمی فائنل میں جگہ بنالی ہے۔کزنتسووا نے روبرٹا ونسی اور اسٹوسر نے اینا ایوانووچ کے خلاف کامیابی حاصل کی۔

الماتے: پاکستانی باکسر محمد وسیم ورلڈ باکسنگ چیمپئن شپ کے پہلے ہی میچ میں شکست کھا کر ایونٹ سے باہر ہوگئے ۔ قازقستان کے شہر الماتے میں جاری عالمی باکسنگ ایونٹ کے پہلے روز 52کلو گرام ویٹ کیٹیگری میں پاکستان کے محمد وسیم کا مقابلہ ترکمانستان کے زیریپ جمعایوف سے تھا ۔ جس میں اُنہیں سخت مقابلے کے 27کے مقابلے میں 30پوائنٹس سے ہار کا سامنا کرنا پڑا ۔واضح رہے کہ محمد وسیم نے چیمپئن شپ سے قبل الماتے ہی میں 20روزہ کوچنگ پروگرام کے تحت عالمی باکسنگ کوچوں سے تربیت حاصل کری تھی ۔

الماتے: پاکستان ہاکی فیڈریشن نے جونیئر ورلڈ کپ کی تیاریوں کے لئے قومی ٹیم کے ممکنہ کھلاڑیوں کو تربیتی کیمپ میں 20اکتوبر کو طلب کرلیا ۔ جونیئر ورلڈ کپ چھ سے پندرہ دسمبر تک نئی دہلی میں کھیلا جائے گا۔ کھلاڑیوں کو ہدایت کی گئی ہے کہ وہ 20اکتوبر تک ٹیم کے ہیڈ کوچ و منیجر منظور الحسن کو رپورٹ کریں ۔کیمپ میں بلائے گئے 41کھلاڑیوں میں مظہر عباس ،امین یوسف ،عدنان شکور ،امجد علی ،علی حیدر ،طلال خالد ،مشتاق ،زوہیب اشرف ،علیم بلال ،حافظ عما رطیب ،اسد عزیز،وسیم عباس،علی منصور ،کاشف جاوید ،تصور عباس ،حسن فراز ،کامران آصف ،نیّر عدنان ، ایم شعیب ،عثمان تنویر ،ایم عرفان ،ایم عمیر ،عدنان انور ،محسن صابر ،ایوب علی ، احمد زبیر ،علی شان ،عبدالقیوم ،محمد رضوان ،اوین عبدالخالق ،وسیم اسلم عبدالکریم ،فہداﷲ،اکبر علی ، صابر علی ، حماد، آصف علی اور اسد بشیر شامل ہیں ۔

لاہور: پاکستان بلائنڈ کرکٹ کونسل کے تعاون سے نیشنل بینک ٹی 20بلائنڈ کرکٹ کپ 21سے 25اکتوبر تک لاہور میں کھیلا جائے گا ۔ لاہور بلائنڈ کرکٹ کلب کے صدر عبدالرزاق نے پاکستان بلائنڈ کونسل کے ڈائریکٹر نفیس احمد اور اسپانسر ادارے نیشنل بینک کے سپورٹس انچارج محمد جمیل کے ہمراہ پریس کانفرنس کرتے ہوئے کہا کہ ایونٹ میں ملک بھر کے آٹھ شہروں کی ٹیمیں شرکت کررہی ہیں ۔ جنہیں دو پول میں تقسیم کیا گیا ہے ۔

کراچی: آل کراچی جشن سعودیہ فٹ بال ٹورنامنٹ میں شہر کی 4معروف فٹ بال ٹیموں نے کوارٹر فائنل تک رسائی حاصل کرلی۔ سعودیہ اسپورٹس فٹ بال کلب ملیر کے زیر اہتمام ملیر فٹ بال گراﺅنڈ میں جاری آل کراچی جشن سعودیہ اسپورٹس فٹ بال ٹورنامنٹ میں چار میچ کھیلے گئے ۔ٹورنامنٹ کا پہلا میچ ینگ عزیز آباد نے ایک کانٹے دار مقابلے کے بعد لسبیلہ اسٹوڈنٹس کو پنالٹی ککس پر 4-3سے زیر کردیا۔دوسرے میچ میں گلشن اسپورٹس شاہ فیصل ٹاﺅن نے جانباز اسپورٹس سلطان آباد کو سخت جد وجہد کے بعد 1-0سے ہرا کر ٹورنامنٹ کے کوارٹر فائنل میں جگہ بنا لی۔تیسرے میچ میں نوجوان کھلاڑیوں پر مشتمل امتیاز اسپورٹس کالا پل نے پنالٹی ککس پر عرفان میموریل لانڈھی کو 5-2سے مات دیکر کوارٹر فائنل کھیلنے کا اعزاز حاصل کرلیا جبکہ ٹورنامنٹ کے چوتھے اور اہم میچ میں قدیم فٹ بال ٹیم مکران اسپورٹس نے ڈرگ روڈ یونین کو 2-1سے شکست دے کر کوارٹر فائنل کی دوڑ میں شامل ہو گئی ۔ریفری کے فرائض محمد ریاض ،عبدالطیف بلوچ،سلیم شاہ ،اور منصور علی نے انجا م دیئے جبکہ میچ کمشنر کے فرائض امیر محمد خان اور میڈیا کوارڈینٹر شیر افضل تھے۔