راولپنڈی (پی پی آئی) پاکستان نے ابابیل ویپن سسٹم کا کامیاب تجربہ کر لیا۔پاک فوج کے شعبہ تعلقات عامہ(آئی ایس پی آر)  نے بتایا کہ پاکستان نے ہتھیاروں کے نظام ابابیل کا کامیاب تجربہ کر لیا جس کا مقصد مختلف ڈیزائن، تکنیکی پیرامیٹرز اور ہتھیاروں کے مختلف نظاموں کی کارکردگی کا جائزہ لینا ہے اور خطے میں ڈیٹرنس کو مضبوط بنانا ہے۔پی پی آئی کے مطابق آئی ایس پی آر کی جانب سے مزید بتایا گیا کہ چیئرمین جوائنٹ چیفس آف سٹاف کمیٹی جنرل ساحر شمشاد نے ابابیل ویپن سسٹم کے تجربے کا مشاہدہ کیا۔ سٹریٹجک فورسز کمانڈ کے افسران، سائنسدانوں اور انجینئرز نے بھی تجربے کو دیکھا۔اس موقع پر چیئرمین جوائنٹ چیفس آف سٹاف کمیٹی جنرل ساحر شمشاد نے سائنسدانوں اور انجینئرز کی لگن اور مہارت کو سراہا اور انہیں مبارکباد بھی دی۔صدر مملکت عارف علوی، نگران وزیراعظم انوارالحق کاکڑ، آرمی چیف جنرل عاصم منیر سمیت سروسز چیفس نے بھی  سٹریٹجک فورسز کے تمام اراکین کو مبارکباد دی۔

کراچی (پی پی آئی) ملک بھر کی نان ایکسپورٹ انڈسٹری کیلئے گیس ٹیرف کا یکساں نظام متعارف کروانے کی تجویزپیش کی گئی ہے۔ذرائع کے مطابق نئے نظام سے سوئی سدرن کی نان ایکسپورٹ انڈسٹری کیلئے گیس فی ایم ایم بی ٹی یو 26 سو روپے کرنے کی تجویز دی گئی ہے۔پی پی آئی کے مطابق یکساں نظام ٹیرف سے سوئی نادرن کی انڈسٹری کو گیس فی ایم ایم بی ٹی یو 3340 روپے ملے گی جو کہ سوئی سدرن کی نان ایکسپورٹ انڈسٹری کو اس وقت 3650 روپے فی ایم ایم بی ٹی یو مل رہی ہے۔آئی ایم ایف نے بھی ملک بھر کی نان ایکسپورٹ انڈسٹری کیلئے یکساں نظام ٹیرف کی تجویز دی تھی، یکساں نظام ٹیرف متعارف کروانے کیلئے سمری آئندہ ای سی سی میں پیش کیے جانے کا امکان ہے۔

کراچی (پی پی آئی)شہر قائد کراچی کے علاقے نیپئر میں مبینہ پولیس مقابلے کے دوران 3 ڈاکو ہلاک ہو گئے ہیں۔ڈی آئی جی ساؤتھ نے بتایا ہے کہ نیپئر کے علاقے میں عید گاہ پولیس نے موٹر سائیکلوں پر سوار 3 ملزمان کو ناکے پر رکنے کا اشارہ کیا تو انہوں نے فائرنگ شروع کر دی اور فرار ہو گئے۔ پی پی آئی کے مطابق پولیس حکام نے مزید بتایا کہ فرار ہونے والے ملزمان کا پولیس نے تعاقب کیا تو فائرنگ کے تبادلے میں تینوں ملزم گولیاں لگنے سے موقع پر دم توڑ گئے، ہلاک ملزمان متعدد وارداتوں میں ملوث تھے۔