لاہور (پی پی آئی )پیپلز پارٹی اور (ن) لیگ کے رہنماوں کے درمیان عام انتخابات کی تاریخ کو لے کر لفظی گولہ باری میں اضافہ ہورہا ہے۔پی پی آئی کے مطابق ن لیگ کے بیشتر رہنماؤں کا کہنا ہے کہ کیا بلاول بھٹو کو نہیں پتا کہ نئی مردم شماری نوٹیفائی ہوگی تو حلقہ بندیاں ہوں گی؟ جب مردم شماری کو نوٹیفائی کیا گیا تو کیا ان کو نہیں پتا تھا کہ الیکشن آگے جائیں گے؟ کس کے کہنے پر مردم شماری نوٹیفائی کی گئی؟لیگی رہنما نے کہا کہ جمہوری ہونے کے ساتھ آپ کو حقیقت پسند بھی ہونا چاہیے، جس شہر میں آپ موبائل فون لے کر نہیں گھوم سکتے وہاں کون سرمایہ کاری کرے گا۔دوسری جانب رانا ثنااللہ نے کہا کہ فروری میں عام انتخابات پر کوئی گھبراہٹ نہیں، نواز شریف الیکشن مہم میں پارٹی کو لیڈ کریں گے۔لیگی رہنماؤں کے بیان پر جواب دیتے ہوئے پیپلز پارٹی کی لیڈر شپ  نے کہا کہ طلال چوہدری پہلے تنظیم سازی پر توجہ دیں پھر پنجاب میں ہمارا سیاسی مقابلہ کریں، الیکشن 90 دن کے اندر اندر لازمی ہیں، حلقہ بندیاں 90 دن کے اندر انتخابات کرانے میں رکاوٹ نہیں، انتخابات الیکشن کمیشن کو کروانے ہیں، (ن) اور جے یو آئی نے نہیں۔

کراچی (پی پی آئی) طبی ماہرین نے ا?شوب چشم سے شدید متاثر مسافروں کو از خود فضائی سفر نہ کرنے کی تجویز دے دی۔آنکھوں کے انفیکشن آشوب چشم کے پھیلاو کے حوالے سے بارڈر ہیلتھ سروسز کے ڈائریکٹر ڈاکٹر مرتضیٰ شاہ نے فضائی مسافروں کے لیے الرٹ جاری کردیا ہے۔ پی پی آئی کے مطابق ڈاکٹر مرتضیٰ شاہ نے بتایا کہ ایئرپورٹس پر تعینات طبی عملہ اور ایئرلائنز کو آشوب چشم سے متعلق ہدایات جاری کر دی گئی ہیں۔ہدایات میں کہا گیا ہے کہ ایئر لائنز آشوب چشم سے متاثر مسافر کو ایئرپورٹ پر محکمہ صحت کے ڈاکٹر سے رجوع کرنے کو کہیں۔ڈاکٹر مرتضیٰ شاہ نے بتایا کہ آشوب چشم سے متاثر مسافروں کے سفر پر پابندی عائد نہیں کی جا رہی، تاہم محکمہ صحت کے ڈاکٹر متاثرہ مسافر کی حالت دیکھتے ہوئے سفر کے بارے میں ہدایات دیں گے۔ڈاکٹر مرتضیٰ شاہ نے آشوب چشم سے شدید طور پر متاثر مسافروں کو ہدایت کی ہے کہ وہ از خود سفر سے گریز کریں کیونکہ آشوب چشم ایک متعدی مرض ہے یہ مرض ایک فرد سے دوسرے فرد میں منتقل ہو سکتا ہے۔

 اسلام آباد (پی پی آئی)  پی ٹی آئی  کے چیئرمینعمران خان اور شاہ محمود قریشی کی درخواست ضمانت بعد از گرفتاری پر بغیر سماعت کارروائی ملتوی کر دی گئی۔پی پی آئی کے مطابق  آفیشل سیکرٹ ایکٹ کی عدالت کے جج ابوالحسنات ذوالقرنین رخصت پر ہیں، عدالتی عملے کی جانب سے جج کی رخصت بارے آگاہ کر دیا گیا۔ چیئرمین پی ٹی آئی عمران خان اور شاہ محمود قریشی کی درخواست ضمانت بعد از گرفتاری پر بغیر سماعت کارروائی ملتوی کر دی گئی۔ سماعت 11 ستمبر تک ملتوی کی گئی ہے۔یاد رہے کہ گزشتہ 2 سماعتوں پر بھی جج کی رخصت پر بغیر کارروائی سماعت ملتوی ہو گئی تھی۔