انچیون:ایشین گیمز ہاکی میں پاکستان نے سری لنکا پر گولز کی بارش کردی ،گرین شرٹس نے 0-14 کے بڑے مارجن سے سری لنکاکو شکست دے دی۔جنوبی کوریا میں جاری ایونٹ میں دفاعی چیمپئن پاکستان نے سری لنکا کے خلاف شاندار کھیل پیش کیا اور 14گولز کرڈالے ۔پاکستانی کپتان محمدعمران اور عمر بٹہ نے 4-4جبکہ محمد عرفان اور محمد رضوان نے2,2گول کیے۔نوجوان کھلاڑی بھی گول کرنے میں پیچھے ن رہے ،محمد توثیق اور محمد وقاص نے1,1گول کرکے ٹیم کو بڑے مارجن سے فتح دلائی۔

کولمبو:سری لنکاکرکٹ ٹیم کے فاسٹ بولر لاستھ ملنگا ٹخنے کی انجری کے باعث اگلے تین ماہ تک کسی بھی میچ میں حصہ نہیں لے سکیں گے۔لاستھ ملنگا اپنے علا ج کے لیے جلد آسٹریلیا روانہ ہوں گے۔سری لنکا کرکٹ ٹیم کے سلیکٹر پراموڈایا کا کہنا تھا کہ انگلینڈ کے خلاف 26نومبر سے شروع ہونے والی ایک روزہ سریز میں ملنگا کی کمی محسوس ہوگی،تاہم انھوں نے امید ظاہر کی ہے کہ نیوزی لینڈ کے خلاف جنوری میں ہونے والی سریز میں ملنگا ٹیم کا حصہ ہوں گے۔واضح رہے سری لنکا ٹیم نومبر میں انگلینڈ کے خلاف سات میچوں پر مشتمل ایک روزہ سیریز کھیلے گی۔

ممبئی:لیجنڈری کرکٹر سچن ٹنڈولکر کے بیٹے ارجن ٹنڈولکر نے ماسٹر بلاسٹر ٹورنامنٹ میں اپنے اسکول کی جانب سے جارحانہ سنچری بناڈالی۔ارجن ٹنڈولکر نے ماسٹر بلاسٹر ٹورنامنٹ میں امبانی انٹرنیشنل اسکول کی جانب سے صرف48گیندوں پر 118رنز بناڈالے، ٹورنامنٹ میں بھارت بھر سے ایک سو 2اسکول حصہ لے رہے ہیں،ٹورنامنٹ کے فائنل میں سچن ٹنڈولکر کامیاب ٹیم کو ٹرافی دیں گے۔میچ سے قبل سچن ٹنڈولکر نے میڈیا سے بات چیت کرتے ہوئے کہا کہ ارجن کو کھیلنے دیا جائے ان پرغیر ضروری دباﺅ نہ ڈالاجائے۔سچن ٹنڈولکر کا کہنا تھا کہ جب میں اس عمر میں کھیلتا تھا تو میرے والد ادب کے پروفیسر تھے اور انھوں نے کبھی پریشر نہیں ڈالا ان کے نقش قدم پر چلتے ہوئے میں بھی اپنے بیٹے پر دباﺅ نہیں ڈلنا چاہتا۔ٹنڈولکر نے میڈیا سے درخواست کرتے ہوئے کہا کہ میرے بیٹے نے ابھی کرکٹ شروع کی ہے اورانھیں عام بچوں کی طرح اپنی مرضی سے جینے اور کھیلنے دیں۔

سنگاپور: سنگا پورگراں پری ریس کاپریکٹس ریس میں برطانوی ڈرائیورلوئس ہملٹن نے پہلی پوزیشن حاصل کرلی۔ سنگا پور کے ٹریک پر ہونے والی ایف ون پریکٹس ریس میں ڈرائیوروںنے شاندار کارکردگی کا مظاہرہ کیا۔ لوئس ہملٹن نے مقررہ فاصلہ 1 منٹ 47 اعشاریہ چار نو سیکنڈز میں طے کر کے پہلی پوزیشن اپنے نام کی۔پہلے سیشن کے کامیاب ہسپانوی ڈرائیور فرنانڈو الونسو صفر اعشاریہ ایک تین سیکنڈکے فرق سے دوسرے نمبر پر رہے۔ آسٹریلیا کے ڈینئیل ریکارڈو تیسری پوزیشن کے حقدار قرار پائے جبکہ فن لینڈ کے کیمی ریکونن نے چوتھے نمبر پررہے۔

دبئی: افغانستان کرکٹ ٹیم اپنے پہلے ورلڈ کپ 2015کی تیاریوں کے سلسلے میں آسٹریلیا کا دورہ کرے گی۔افغان ٹین دورہ آسٹریلیا میں پرتھ کرکٹ گراﺅنڈ میںآکلینڈ اور ناردرن ڈسٹرک کے خلاف دو ایک روزہ میچ کھیلے گی۔افغانستان کرکٹ ٹیم پہلی بار 50اوور کے میگا ایونٹ ورلڈ کپ میں شرکت کرنے جارہی ہے۔اس سے قبل افغانستان کرکٹ ٹیم تین دفعہ 2010،12اور2014کے ٹی ٹوئنٹی ورلڈکپ مقابلوں میںحصہ لے چکی ہے۔

سنگاپور:فارمولا ون گورننگ باڈی نے سنگاپور گراں پری ریس کے پہلے مرحلے میںریڈیو پیغامات کے تبادلے پر پابندی ملتوی کردی۔فارمولا ون گراں پری ریس کی گورننگ باڈی نے گزشتہ ہفتے یہ فیصلہ کیا تھا کہ دوران ریس ڈرائیوروں اور ٹیم انتظامیہ کے درمیان ریڈیو پیغامات پر پابندی ہوگی اور اس کا اطلاق فوری طور پر سنگاپور ریس سے ہوگالیکن جمعے کو ایک دفعہ پھر باڈی نے اپنے فیصلے پر نظر ثانی کرتے ہوئے اگلے مرحلے تک اس فیصلے کو ملتوی کر دیا ہے ۔نئے فیصلے کے مطابق ڈرائیور کی اپنی کارکردگی کے حوالے سے پیغامات پر پابندی ہوگی تاہم کار کے حوالے سے پیغامات کو 2015تک ملتوی کر دیا جائے گا جس کا مقصد ٹیموں کو اس حوالے سے تیاری کے لیے وقت دینا ہے۔ایف آئی اے کے مطابق 11فارمولا ون ٹیموں کے منیجروں سے ملاقات کے بعد یہ فیصلہ کیا گیا ہے کہ اس فیصلے کو 2015تک ملتوی کردیا گیا ہے۔