لاہور: سابق چیف سلیکٹر و لیگ سپنر عبدالقادر نے عبدالرزاق کو ون ڈے اور شاہد آفریدی کو ٹی 20 کا کپتان بنانے کا مطالبہ کر دیا۔ شاہد آفریدی اور عبدالرزاق میچ وننگ کھلاڑی ہیں۔ میڈیا سے گفتگو کرتے ہوئے سابق چیف سلیکٹر کا کہنا تھا کہ پاکستان نے سری لنکا کیخلاف ٹی 20 میچ میں کافی غلطیاں دہرائیں، عثمان شنواری نئے بال سے اچھی باﺅلنگ کرواتا ہے تاہم اسے سری لنکا کیخلاف صحیح طریقے سے استعمال نہیں کیا گیا۔ انہوں نے کہا کہ شاہد آفریدی کو تنقید کی بجائے عزت دینا چاہیے کیونکہ وہ پاکستان کا سرمایہ ہیں۔ عبدالرزاق اور شاہد آفریدی میچ وننگ کھلاڑی ہیں، عبدالرزاق کو ایک روزہ اور شاہد آفریدی کو ٹی 20 ٹیم کا کپتان بنایا جائے۔

سڈنی: آسٹریلوی اوپنر ڈیوڈ وارنر امریکی بیس بال ایونٹ میں قسمت آزمائی کریں گے ۔ڈیوڈ وارنر کے منیجر ٹونی کونلی نے میڈیا سے گفتگو کرتے ہوئے کہا کہ امریکا میں ہونے والے بیس بال ایونٹ میں شرکت کے لئے وارنر ٹرائلز میں شرکت کریں گے ۔ ٹونی کا مزید کہنا تھا کہ ٹرائلز میں بہترین پرفارمنس کے بعد وارنر ایونٹ میں شرکت کے تمام آپشن پر غور کریں گے ۔

لاہور: پاکستان ہاکی فیڈریشن نے جونیئر ہاکی ورلڈ کپ میں ٹیم کے نویں پوزیشن حاصل کرنے کے بعد جونیئر ٹیم کی تشکیل نو کرنے کا فیصلہ کرلیا ۔ جونیئر ٹیم کے لئے نئی انتظامیہ کا اعلان قومی ہاکی چیمپئن شپ کے بعد کیا جائے گا ۔ موجودہ انتظامیہ کے پاکستان ہاکی فیڈریشن کے ساتھ تمام معاہدے ختم ہوگئے ہیں ۔

لاہور: بھارت کی بیس بال ٹیم آئندہ سال جنوری میں پاکستان کا دورہ کرے گی ۔دورے کے دوران پاکستان اور بھارت کے درمیان تین میچوں کی سیریز کھیلی جائے گی ۔ پنجاب بیس بال ایسوسی ایشن کے سیکریٹری مظہر شیخ نے سری لنکا میں منعقد ریفری و ججز کورس کے دوران بھارتی بیس بال فیڈریشن کو پاکستان کے دورے کی دعوت دی تھی ۔فیڈریشن کے سیکریٹری سید خاور شاہ کے مطابق جنوری کے تیسرے ہفتے میں شیڈول سیریز کے میچ لاہور ،گوجرانوالہ اور فیصل آباد میں کھیلے جائیں گے ۔